Taraon Idiay Thailand

BABAEN ITI MANNURAT TI AGRIINGKAYO! IDIAY MALAYSIA

BAYAT a magmagnaka iti igid ti natao a kalsada idiay Bangkok, Thailand, pagammuan ta adda nalang-abmo a naayamuom a taraon ket mabalin a dimo magawidan ti bagim a mangsapul iti pagtataudan dayta. Kadagiti igid ti kalsada, adda dagiti aglutluto kadagiti putahe a gagangay kadagiti Thai. Apaman a masay-upmo ken makitam dagiti nabanglo ken makaatrakar ti kolorda a taraon, nalabit maguyugoyka a mangraman kadagita.

Makaatrakar ti taraon dagiti Thai gapu kadagiti rekadona a napili a yerba, ramramut, bulbulong, ken bukbukel. Mangpataud dagitoy iti raman a kombinasion ti nasam-it, naalsem, naapgad, napait, ken nagasang agraman ti nagduduma nga ayamuom a talaga a mangguyugoy kenka a mangraman kadagita. Kasano a naaddaan dagiti Thai kadagiti kasta a naisangsangayan a putahe? Ti sungbat ket naibatay iti nabayagen a pakasaritaanda.

Internasional a Kombinasion Dagiti Raman

Ti Thailand ket masarakan iti paset ti Asia a pappapanan ti adu a tattao bayat ti panagdaliasatda iti nadumaduma a pagilian iti dayta a kontinente. Iti ginasut a tawenen, dagiti taga-China, Laos, Cambodia, Indonesia, Europa, ken dadduma pay ket dimmalanda iti Thailand bayat ti panagdaliasatda, sa inkeddeng ti adu kadakuada ti agnaeden sadiay. Inyegda dagiti kita ti taraon manipud iti nagtaudanda a pagilian, ket nagtalinaed idiay Thailand dagiti raman ken ayamuom dagita a nagduduma a taraon.

Adda idi tiempo a dagiti agdaldaliasat nga Indian insuroda dagiti Thai no kasano ti agusar iti curry iti panaglutoda. Idi maika-16 a siglo, nangisangpet dagiti Portugues kadagiti nagasang a sili ken nalabit kamatis pay. Ita, ti putahe ti Thailand ket addaan iti adu a nagduduma a rekado ken raman, ngem kaaduan a taraon sadiay ket narekaduan iti nagduduma a kita ti duyaw, berde, ken nalabaga a nagasang a sili, a nalaokan iti kakolkolorda a curry. Gapu iti naglaok a curry ken nagasang a sili, dagiti putahe dagiti Thai ket naayamuom ken nagimas a gagangay kadagiti taraon manipud Daya.

Ad-adu a Putahe, Ad-adu a Raman

Ti maysa a gagangay a taraon dagiti Thai ket buklen ti nagduduma a putahe, a pakaibilangan ti kaldo wenno sopas, salad, ginisa, curry, ken pagsawsawan. Kanayon nga adda ti napudot a puraw nga innapuy no manganda. Adda met ti sinam-itda, a mabalin a ti kangrunaan a ramenna ket asukar ken itlog. Us-usaren met dagiti Thai ti lasag ken getta ti niog iti panagaramidda iti sinam-it.

Iti sadinoman, ti sekreto ti naimas a taraon ket dagiti sadiwa wenno kappuros a ramen. Adu ti kasta idiay Thailand. Iti adu a tiendaan kadagiti siudad ken ili, adda dagiti magatang a sadiwa nga ikan, kappuros a prutas, nateng, ken rekado a kas iti baraniw, kulantro, bawang, laya, kumino, salamagi, galangal (kapamilya ti laya), ken cardamom. Kadagiti kasta a tiendaan, adu met ti magatang a dalayap ken nagasang a sili, a napateg a ramen iti taraon dagiti Thai.

Agpaspasiarka man idiay Thailand wenno il-iliwem ti makaraman iti luto a Thai iti pagiliam, padasem ti espesial a putaheda a tom yam goong, ti medio nagasang a sinigang a pasayan. Ti dadduma pay a naimas a pagpilian ket ti nagasang a salad a papaya, sotanghon a nalaokan iti natuno a manok wenno pato, nagiling a karne ti baboy, wenno ikan a nayuper iti rekado. Ti ma ho, a kaipapananna “dumalagudog a kabkabalio,” ket napaglalaok a karne ti baboy, lagdaw, ken mani a nalaokan iti kappuros a pinia sa naarkosan kadagiti nalabaga a nagasang a sili ken bulbulong ti kulantro. Sakbay nga agpalpaka, ramanam ti sinam-it a nagettaan a diket a napakuyogan iti naluom a mangga.

Kasano ti kasayaatan a pannangan iti taraon dagiti Thai? Iti dadduma a paset ti pagilian, gagangay ti panagkammet tapno mapekkel ti espesial ti pannakaisaganana a diket. Iti kasta, makaaramidka iti babassit a bolabola nga isawsawmo iti sarsa ken maisakmolmo a dagus. No manganka iti pansit, nalabit kaykayatmo ti ag-chopstick. Ngem no marigatanka nga ag-chopstick, mabalinmo latta ti agusar iti tinidor ken kutsara.

Makaramramanka kadin iti putahe dagiti Thai? Dagiti agkakaimas a taraon iti daytoy napintas a pagilian iti Asia ket mabalin a manggutugot kenka a mangammo iti ad-adu pay maipapan kadagiti agkakaimas a taraon iti Daya.

[Dagiti Ladawan iti panid 23]

1 Tom yam goong

2 Salad a sotanghon a nalaokan kadagiti pasayan ken nagiling a karne ti baboy

3 Nagasang a salad a papaya

4 Ma ho

5 Nagettaan a diket a napakuyogan iti naluom a mangga