Pakasarakantayo iti Giya?
ASINO ti makaiturong kadatayo iti pudno a balligi—saan a balligi iti sekular no di ket iti personal a biag? Nadakamaten iti immuna nga artikulo a ti pudno a balligi ket mainaig iti panagbiag maitunos kadagiti nalinteg a prinsipio ken biag nga addaan iti nadayaw a panggep—saan ket nga agpannuray iti kinalatak, kinabaknang, wenno impluensia.
Pakasarakantayo kadagiti nainsiriban a prinsipio ken sungbat kadagiti saludsod maipapan iti panggep ti biag? Datayo kadi a mismo ti makaipaay? Bigbigentayo koma a gapu ta imperpektotayo, addaantayo kadagiti dakes a tarigagay a mangituggod kadatayo iti di umiso a dana. (Genesis 8:21) Gapuna, minilion a tattao ti agtultuloy a mangikagkagumaan a mangragpat kadagiti kinaubbaw a tinukoy ti Biblia kas “ti derrep ti lasag ken ti derrep dagiti mata ken ti panangiparammag iti sanikua a pagbiag ti maysa.” (1 Juan 2:16) Saan a pudno a balligi dayta ken agturong laeng iti pannakapaay ken ladingit. Adda ngarud naimbag a rason nga agpannuraytayo iti Namarsua agpaay iti sungbat kadagiti napateg a saludsod iti biag.a
Rumbeng Kadi nga Agpannuraytayo iti Dios?
Apay a rumbeng nga agpannuraytayo iti Namarsua? Ammona ngamin no apay a pinarsuanatayo, iti kasta, ammona no ania a talaga ti panggep ti biagtayo. Ammona met ti pisikal, mental, ken emosional a pakabuklantayo. No kasta, ammo ti Dios no ania dagiti kasayaatan a prinsipio a masapul nga annuroten dagiti tattao. Maysa pay, ti Dios ti kangrunaan a pagwadantayo iti ayat, isu a kayatna nga agbalintayo a pudno a naragsak ken naballigi. (1 Juan 4:8) Pakasarakantayo iti naayat a panangiwanwanna? Iti Nasantuan a Biblia, nga insagana ti Dios maipaay kadatayo ket inusarna ti agarup 40 a tattao a mannurat, wenno sekretario.b (2 Timoteo 3:16, 17) Ngem kasanotayo a masigurado a mapagpiaran ti giya a linaon daytoy a libro?
“Ti kinasirib mapaneknekan a nalinteg babaen iti ar-aramidna,” wenno resultana, kinuna ni Jesu-Kristo, ti kangrunaan a pannakabagi ti Dios. (Mateo 11:19; Juan 7:29) Ti nadiosan a sirib iturongnatayo iti dana ti balligi ken manayon a kinaragsak—“ti intero a turongen ti naimbag”—idinto a ti natauan a sirib a di mangikankano iti Dios ket agturong iti pannakapaay ken ladingit.—Proverbio 2:8, 9; Jeremias 8:9.
Usigenyo ti dekada 1960, idi nga inlungalong dagiti agtutubo ti saan a panagpasakup kadagiti nataengan, panagdroga, di panangikabilangan iti masanguanan, ken seksual a wayawaya. Ngem talaga kadi a nainsiriban ti kasta a panagbiag? Nakaipaay kadi dayta iti pudpudno a panggep ti biag ken kadagiti kasayaatan a prinsipio a mangyeg iti talna ti panunot ken manayon a kinaragsak? Ipakita ti historia a saan a nangyeg dayta iti nasaysayaat a panagbiag no di ket ad-adda a nangpakaro iti moral a kinalulok ti natauan a kagimongan.—2 Timoteo 3:1-5.
Maisupadi kadagiti natauan a pilosopia, napaneknekan a kanayon a makagunggona ti sirib a linaon ti Biblia. (Isaias 40:8) Makitayo dayta bayat a basbasaenyo ti sumaganad nga artikulo, yantangay usigenna ti innem a prinsipio ti Biblia a nakatulong iti minilion a tattao manipud iti dandani amin a nasion tapno agbalinda a pudno a naragsak ken naballigi—aniaman ti kasasaad ti biagda.
[Footnotes]
a Kitaenyo ti kahon a “Dagiti Di Umiso a Panangmatmat iti Balligi.”
b Kitaenyo ti Nobiembre 2007 nga espesial a ruar daytoy a magasin, a nangisalaysay iti tema a “Mapagtalkanyo Kadi ti Biblia?” Dagiti artikulo a linaon dayta a ruar ket mangipaay kadagiti ebidensia ti arkeolohia, historia, siensia, ken dadduma pay a mangpaneknek a ti Dios ti nangipaltiing iti Biblia.
[Kahon iti panid 5]
DAGITI DI UMISO A PANANGMATMAT ITI BALLIGI
Patien ti adu a tattao nga awan ti Dios ken timmaud lattan ti biag babaen ti ebolusion. No pudno dayta a panangmatmat, agparang a ti biag ket resulta laeng ti agsasaruno a kemikal ken biolohikal nga aksidente. No kasta, awan serserbi ti panagbiroktayo iti panggep ti biag ken kadagiti nainsiriban a prinsipio.
Patien ti dadduma a pinarsuanatayo ti Dios ngem binaybay-annatayo. Pagparangen daytoy a panangmatmat nga ulilatayo iti naespirituan a pamay-an, iti kasta, awanantayo iti pudno a panggep ti biag ken iti mangiwanwan a prinsipio. Panunotenyo: Ti Dios inikkanna ti tunggal animal iti nainkasigudan a sirib a kasapulan tapno maibanag ti nakaipanggepanda. Kas resultana, naiparangarang ti naindaklan a siribna iti aglawlawtayo. Panagkunayo, inaramidnatayo ngata dayta a Namarsua sanatay binaybay-an? Saan la ketdi!—Roma 1:19, 20.
Gapu iti ateistiko a pilosopia a ti balligi ket agpannuray iti panangragpat kadagiti material wenno sekular a kalat, agparang nga awan serbina ti panagbiroktayo iti panggep ti biag ken kadagiti nainsiriban a prinsipio.
[Ladawan iti panid 5]
Ti sirib a linaon ti Biblia ket napaneknekan a makagunggona babaen kadagiti agkakaimbag a resultana