Bisikleta a Pagasa iti Kutsilio
BABAEN ITI MANNURAT TI AGRIINGKAYO! IDIAY TANZANIA
◼ Ania ti mapanunotmo no makakitaka iti lalaki a nakatugaw a patallikud iti maysa a bisikleta, a nakaparpartak ti panagpedalna ngem di met makaadayo? Iti dadduma a paset ti daga, kas ditoy Makindaya nga Africa, mabalin a ti agas-asa iti kutsilio ti makitkitam—maysa a lalaki a mangmangged babaen ti panangipaayna iti serbisio a kasapulan dagiti umili.
Gagangay laeng ti bisikletana ngem adda sumagmamano a napateg a paset a nainayon iti dayta. Addaan dayta iti sirkulo a pangasaan a naiplastar iti napatibker a kargaderana. Ti mangpatayyek a naylon a koria ket naipalikaw iti napisi nga alus a rim ken naiwelding iti makinlikud a ligay ti bisikletana.
Saan a masierto no kasano a nangrugi a mausar ditoy Africa ti kasta a naisangsangayan ti pannakasangalna a pagasa. “Naammuak a naaramaten dagiti kasta a bisikleta idiay Dar es Salaam, ti kabesera ti Tanzania, sakbay pay a naadda ti kasta ditoy siudad ti Moshi, a pagnanaedak,” kinuna ni Andrea nga agas-asa kadagiti kutsilio iti kastoy a pamay-an sipud pay idi 1985. “Nangrugi a nausar ti kasta ditoy idi 1982,” innayonna.
Kasano a maaddaan ti maysa iti bisikleta a pagasa? Ilawlawag ni Andrea: “Mapankami iti fundi, ti Swahili nga awag iti nasigo nga agsangal, ket pabaliwanmi ti bisikletami sigun iti kayatmi a diseniona.” Kadawyan a malpas dayta iti maysa wenno dua nga aldaw.
Rissik ken Ling-et!
Mangrugi ni Andrea iti agarup alas siete ti agsapa no agbisikletan a mapan iti aduan-tao a lugar. No nakadanonen, ipukkawna: “Agpaasakayo apo! Agpaasakayon!” Batingtingenna met dagiti kampanilia ti bisikletana. Di agbayag, addan tuman-aw a misis. Ayabanna ni Andrea sana ipaasa ti dua a namudel a kutsilio. Adda kaarruba a mangipan iti buneng; adda met barbero a mangyeg iti kartibna. Agasa met ni Andrea kadagiti gabion, barrena, ken gistay amin a banag nga adda tademna.
No isaganana ti pagasa, mangbirok ni Andrea iti nasimpa a daga sana ibaba ti tukal ti bisikletana tapno ngumato ti makinlikud a ligay. Kalpasanna, ikamangnan ti naylon a koria, agtugaw iti sabali pay a silieta a sumango iti likudan, sa agpedal. Agrissik ti pangasaan ken agkaling-etan metten ni Andrea bayat a patpatademenna ti nagduduma a naiyeg kenkuana. Inton agalas-saisen ti malem, agawiden ni Andrea.
Ti bisikleta a pagasa ket maysa laeng a pagarigan no kasano a “dagidiay nasaet” mausarda ti laing ken panangipamuspusan tapno maaddaanda iti nadayaw a pagsapulan, uray narigat ti kasasaadda.—Proverbio 13:4.