Agimtuod Dagiti Agtutubo

Kasano a Mailiwliwagko ti Panagsinami?

“Innem a bulanen nga agdedeytkami ken lima a tawenen nga aggayyemkami. Idi kayatnan a gupden ti relasionmi, dina man la naitured nga imbaga kaniak. Basta dinak lattan kinasasao. Awan naaramidak. Napalalo ti pannakaupayko ken sangkadamagko iti bagik no ania ti nagbiddutak.”—Rachel.a

NUPAY naragsakka idi damo, lumdaangka la ketdi apaman nga agsinakayo iti kaayan-ayatmo. Usigem da Jeff ken Susan a dua tawenen nga agdedeyt. Simmingedda iti maysa ken maysa kabayatan dayta a tiempo. Iti agmalem, mamin-adu nga ag-text ni Jeff ken Susan kadagiti nadungngo a mensahe. Sagpaminsan a regaluanna ni Susan kas panangipakitana nga isu ket pampanunotenna. “Nakaan-anus ni Jeff a dumngeg kaniak ken maaw-awatannak,” kuna ni Susan. “Talaga a nariknak a napategak kenkuana.”

Di nagbayag, pagsarsaritaanen da Jeff ken Susan ti panagkallaysada ken no pagnaedandanto kas agassawa. Dinamag pay ketdin ni Jeff ti rukod ti singsing ni Susan. Ngem bigla met lattan a nakisina! Kasta unay ti panagleddaang ni Susan. Intultuloyna nga inaramid dagiti trabahona iti inaldaw ngem kasla nabibineg ti riknana gapu iti napasamak. “Napaksuyan ti panunotko ken bagik,” kinunana.b

No Apay a Nasaem

No napadasamon ti kas iti napadasan ni Susan, nalabit a pinampanunotmo metten: ‘Mailiwliwagko ngata daytoy?’ (Salmo 38:6) Gagangay laeng nga agladingitka. Nalabit a ti panagsinayo ti maysan kadagiti kasaeman nga inibturam. Kinaagpaysuanna, kinuna ti dadduma a kasla adda paset ti bagim a matay no makisinaka. Mabalin a mapasaram pay ti kaasping ti agsasaruno a marikna dagidiay lumlumdaang gapu iti ipapatay ti ay-ayatenda, kas iti:

Di panangaklon. ‘Imposible a nalpasen ti aminmi. Agbaliwto met laeng ti panunotna kalpasan ti maysa wenno dua nga aldaw.’

Pungtot. ‘Kasanona a naaramid daytoy kaniak? Diak mapalabes daytoy!’

Depresion. ‘Saanak a napateg. Awanton a pulos ti mangipateg kaniak.’

Panangakseptar. ‘Kabaelak daytoy. Nasaem ti panagsinami ngem mailiwliwagkonto met laeng.’

Nupay kasla mabayag pay, maakseptarmonto met laeng ti napasamak. Ti kabayag dayta ket agdepende iti sumagmamano a banag kas iti no kasano ti kasinged ken kapaut idi ti relasionyo. Kabayatanna, kasanom a mailiwliwag ti saem ti panagsinayo?

Mangabaruananka

Kuna ti dadduma a, Ti panawen agasanna amin a sugat. No nabiitkayo pay a nagsina, mabalin a kasla saan a pumayso dayta. Ti panawen ngamin ket paset laeng ti solusion. Kas panangyilustrar: Ti sugat iti kudilmo ket aglunit inton agangay ngem nasakit dayta ita. Nasken a pasardengem ti panagdarana ken ep-epem ti ut-otna. Masapul met nga annadam tapno saan a maimpeksion. Kasta met laeng no nasugat ti riknam. Nasaem dayta ita ngem adda dagiti maaramidam tapno maep-ep ti saemna ken saan a maimpeksion iti sakit ti nakem. Makatulongto ti panaglabas ti panawen, ngem ania met ngay ti maaramidam? Padasem dagiti sumaganad.

◼ Palubosam ti bagim nga agleddaang. Awan dakesna no agsangitka. Ngamin, kuna ti Biblia nga adda “tiempo ti panagsangit” ken “tiempo ti panagdung-aw.” (Eclesiastes 3:1, 4) Ti panagsangit dina kaipapanan a nakapuyka. Uray ni David a natured a mannakigubat kinunana idi nagladingit iti napalalo: “Iti rinabii a panagsangsangitko maslep ti iddak, mabasbasa ti punganko kadagiti luluak.”—Salmo 6:6, Ti Baro a Naimbag a Damag Biblia.

◼ Saluadam ti salun-atmo. Makatulong ti panagehersisio ken umiso a taraon tapno mapasubli ti pigsam a napukaw gapu iti saem ti panagsinayo. ‘Ti panagsanay iti bagi ket makagunggona,’ kuna ti Biblia.—1 Timoteo 4:8.

Ania a bambanag mainaig iti salun-atmo ti masapul nga asikasuem?

․․․․․

◼ Agbalinka nga okupado. Dimo isardeng nga aramiden ti bambanag a pagay-ayatmo. Ken nangnangruna ita a dimo iputputong ti bagim. (Proverbio 18:1) Makatulong ti pannakilangenmo kadagiti maseknan kenka tapno maipamaysam ti panunotmo kadagiti positibo a banag.

Aniada a kalat ti maikeddengmo tapno kanayon nga okupadoka?

․․․․․

◼ Ikararagmo iti Dios dagiti marikriknam. Nalabit saan a kaskarina dayta. Kalpasan ti panagsina, adda dagiti mangipagarup a pinaay ida ti Dios. Mabalin nga irasonda: ‘Inkarkararagko a makasarakak iti kaayan-ayatko, ngem ita, kastoy ketdin ti napasamak!’ (Salmo 10:1) Ngem rumbeng kadi nga ibilangtayo ti Dios kas maysa laeng a nailangitan nga albasiador wenno parasapul iti kapareha? Siempre saan; ken saan met a basol ti Dios no ti maysa kadagiti agayan-ayat ket kayatnan ti makiwinnaswas. Pagaammotayo daytoy maipapan ken Jehova: ‘Isu maseknan kenka.’ (1 Pedro 5:7) Babaen ti kararag, iparukpokmo ngarud kenkuana ti marikriknam. Kuna ti Biblia: “Maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.”—Filipos 4:6, 7.

Ania dagiti espesipiko a maikararagmo ken Jehova bayat nga ikagkagumaam nga iliwliwag ti saem ti panagsinayo?

․․․․․

Panunotem ti Masanguanan

No nagluniten ti sugatmo, adda pagsayaatanna no usigem a naimbag ti napalabas a pannakirelasionmo. Inton nakasaganakan a mangaramid iti dayta, nalabit makitamto a makatulong ti panangisuratmo kadagiti sungbatmo iti sumaganad a salsaludsod.

◼ Imbagana kadi kenka ti rason ti panagsinayo? No wen, isuratmo dayta iti baba, umanamongka man iti dayta wenno saan.

․․․․․

◼ Ania pay ti pagarupem a nalabit nakaigapuan ti panagsinayo?

․․․․․

◼ No subliam ti napasamak, adda kadi mabalinmo koma nga inaramid tapno naliklikan ti panagsinayo? No adda, ania daydiay?

․․․․․

◼ Adda kadi nasursurom iti dayta a kapadasan a makatulong iti espiritual wenno emosional nga irarang-aymo?

․․․․․

◼ Ania, no adda man, ti kayatmo a balbaliwan iti sumaruno a pannakirelasionmo?

․․․․․

Ipapantayon a saan a kas iti ninamnaman ti nagbanagan ti pannakirelasionmo, ngem laglagipem daytoy: Kabayatan ti bagyo, naglaka a maipamaysa ti atensiontayo iti nalulem a langit ken napigsa a tudo. Nupay kasta, agsardengto met laeng ti tudo ken agariwanasto manen ti langit. Naamiris dagiti agtutubo a nakotar iti rugi daytoy nga artikulo nga idi agangay, nabaelanda ti mangabaruanan. Mangnamnamaka a kastakanto met!

Ad-adu pay nga artikulo ti masarakam iti serye nga “Agimtuod Dagiti Agtutubo” iti Web site a www.watchtower.org/ype

[Footnotes]

UTOBEM DAGITOY

◼ Ania ti nasursurom maipapan iti bagim maibasar iti napalabas a pannakirelasionmo?

◼ Ania ti nasursurom maipapan iti kasungani a sekso?

◼ No kasla dimon kabaelan nga iliwliwag ti saem a maigapu iti panagsinayo, siasino ti mabalinmo a pangipeksaan iti marikriknam?

[Kahon iti panid 20]

SINGASING

Ni Susan a nadakamat itay ket nagaramid iti listaan dagiti teksto iti Biblia. Dagus a basaenna dagita no sumken manen ni liday ken saem. Mabalinmo met nga aramiden dayta babaen ti panangilistam iti dadduma a teksto iti daytoy nga artikulo.

[Ladawan iti panid 19]

Ti panagsina ket kas iti napanaas a sugat—nasakit ngem aglunitto met laeng