Manipud Kadagiti Agbasbasa

Dagiti Nagkauna a Manuskrito—Kasano a Naammuan ti Petsa ti Pannakaisuratda? (Pebrero 2008) Adda dillawek iti daytoy nga artikulo. Ammok a ti K.P. (C.E. iti Ingles) kaibatoganna ti “Kadawyan a Panawen” ken ti K.K.P. (B.C.E. iti Ingles) kaibatoganna ti “Kasakbayan ti Kadawyan a Panawen.” Iti 70 a tawenkon, napaliiwko a B.C. ken A.D. ti maus-usar a pangtukoy iti tiempo sakbay ken kalpasan ti pannakayanak ni Jesus. Para kaniak, ti panangusar iti K.K.P. wenno K.P. ket saan a mangpasingked iti pannakayanak ni Jesus.

R. W., United States

Sungbat ti “Agriingkayo!”: Nupay ti A.D. (Anno Domini, kayatna a sawen “iti tawen ti Apotayo”) ken ti B.C. (before Christ, iti Ingles) ket maus-usar kadagiti pagilian nga adu dagiti agkunkuna a Kristiano, pinilimi nga usaren ti K.P. (Kadawyan a Panawen) ken ti K.K.P. (Kasakbayan ti Kadawyan a Panawen). Apay? Umuna, adu ti pammaneknek a mangipatuldo iti tawen 2 K.K.P. kas petsa ti pannakayanak ni Jesus. Maikadua, dagiti literatura nga iyim-imprenta dagiti Saksi ni Jehova ket nasaknap a maipabpablaak kadagiti lenguahe a basbasaen ti adu a saan a Kristiano. Maikatlo, ti titulo a “Kristo” kaipapananna “Daydiay Napulotan.” Ni Jesus ket nagbalin a Mesias, wenno Kristo, idi napulotan iti espiritu ti Dios idi nagpabautisar idi 29 K.P. (Mateo 3:13-17) Gapuna, ni Jesus ket saan pay a Kristo idi nayanak; sa laeng nagbalin a Kristo iti tawen ti pannakabautisarna. Nakadkadlaw ta umad-adun ti mangus-usar iti K.P. ken K.K.P., ken agparangda iti dandani amin a moderno a diksionario ken iti adu nga insurat dagiti eskolar. Mangnamnamakayo a dagiti Saksi ni Jehova matmatanda nga adda napateg a paset ni Jesus ken ti datonna no maipapan iti pannakaibanag dagiti panggep ti Dios ken iti pannakaisalakantayo.

Agimtuod Dagiti Agtutubo . . . Kasano a Madaerak ti Parikutko iti Salun-at? (Pebrero 2008) Diak mailadawan no kasano kadakkel ti panagyamanko iti pannakaawatko iti daytoy a naintiempuan nga artikulo! Nagsakitak ket nayospitalak iti tallo a lawas. Karuruarko iti ospital idi naawatko daytoy a magasin. Adu ti nagpapadaanmi kadagiti agtutubo a nadakamat iti artikulo. Pagyamanan kadagiti naipaay a pagarigan ken balakad.

K. P., Canada

Natukay ti pusok iti pannakaammo a mangipapaay iti liwliwa ni Jehova a Dios, uray kadagiti baldado a kas kaniak. Idi ubingak pay, nadayagnos nga addaanak iti cerebral palsy. Nupay diak makapagna, maysaak nga auxiliary pioneer. Segseggaak ti tiempo inton amin dagidiay addaan iti pisikal a depekto ‘kumalay-atdanto a kas iti panagkalay-at ti kalakian nga ugsa’ iti umad-adanin a Paraiso a daga.—Isaias 35:5, 6.

J. J., Republic of Korea

Ulit-ulitek a basaen daytoy nga artikulo. Diak malapdan ti agsangit ta mariknak ti naayat a pannakaseknan ni Jehova. Arigna a kinabalannatayo tapno ditay madangran iti aniaman a pamay-an. Pagyamanan unay.

M. T., Japan

Ipapatay—Talaga Kadi a Dayta ti Pagpatinggaan ti Amin? (Disiembre 2007) Natay ni nanangko sumagmamano a bulan ti napalabasen, ket pudno a natukay ti pusok iti panangilawlawag daytoy a serye dagiti artikulo, nangnangruna dagiti kari maipapan iti panagungar. Pagyamanan unay. Nangted dayta kaniak iti pudno a liwliwa ken pammaregta.

M. R., Madagascar