Kasano a Makatulong Dagiti Nagannak?

KASTOY ti imparegta ti maysa nga organisasion dagiti edukador idiay Estados Unidos kadagiti estudiante iti haiskul: “Ipakitayo a kayatyo nga aramiden ti amin a kabaelanyo.” Gapu ta naparegtada a mangragpat kadagiti kalatda, napalalo ti panangigaed ti dadduma nga agtutubo uray no saanen a kabaelan ti bagida. Insurat ni Madeline Levine a nadakamaten iti immuna nga artikulo: “Adu nga estudiante ti agpegpeggaden ti salun-atda gapu ta adu unay ti pakakumikomanda a kas kadagiti kurso a mangsaklaw iti ad-adu nga impormasion iti isu met la a kapaut ti gagangay a kurso, nagadu nga ekstrakurikular nga aktibidad, nasapa a panagsagana iti panageskuelada iti haiskul wenno kolehio, agraman kadagiti espesial nga instruktor ken mannursuro a matangdanan tapno tumulong a mangparang-ay iti panagadalda.” Agsagaba ti bagi ken emosion dagiti estudiante nga adda iti kasta a kasasaad.

No maseknanka kadagiti pakarigatan ti anakmo iti eskuelaan, mapanka a mismo iti eskuelaan. Kasaritam dagiti mannursuro, mamalbalakad, ken administrador. Ibagam kadakuada dagiti mapalpaliiwmo. Adda karbengam a mangaramid iti kasta.

Iparparegta ti Biblia kadagiti nagannak a siputanda a naimbag ti panagrang-ay dagiti annakda bayat a dumakdakkelda. Kinuna ni Moises kadagiti nagannak iti nasion ti Israel: “Masapul nga iyukuokmo ida [dagiti linteg ti Dios] iti anakmo ken sawem ti maipapan kadagita no agtugawka iti balaymo ken no magnaka iti dalan ken no agiddaka ken no bumangonka.”—Deuteronomio 6:7.

Ti napasnek a pannakaseknanmo iti edukasion ti anakmo dina kaipapanan a bibiangam ti personal a biagna. Ipakpakitam laeng ti naayat a panangsuportam kenkuana. Ket dakkel ti maitulong dayta tapno mapalag-anan ti anakmo kadagiti pakarigatanna iti eskuelaan.

[Ladawan iti panid 8, 9]

Ipakaammom kadagiti mannursuro ken mamalbalakad iti eskuelaan ti kakaro ti pakarigatan ti anakmo