Nadisenio Kadi?

Ti Di Mabasa a Bulong ti Lotus

◼ Plastik a baso a din kasapulan pay nga innawan? Tawtawa a di mabasa uray no matuduan? Dagiti bassiusit a makina a din agkasapulan iti seliado a kaha tapno di mabasa? Kuna dagiti sientista a dagita ti sumagmamano laeng a magun-odantayo a pagimbagan no matakuatantayo dagiti sekreto ti bulong ti lotus.

Usigem: Ti rabaw ti bulong ti lotus ket napno kadagiti bassiusit a tambukor sa napno met iti allid a kristal ti rabaw ti tunggal tambukor. Dagita ti manglapped iti idadanon dagiti taredted ti danum iti rabaw ti bulong isu a saan a maslep. Gapu ta nakairig ti bulong, agayus ti taredted sakbay pay a makadanon iti mismo a rabawna. Kas resultana, kanayon a namaga ken nadalus ti bulong ta dagiti rugit ken tapok ket mayayus kadagiti taredted.

Kayat dagiti sientista ti agaramid kadagiti materiales a saan a maslep a kas iti bulong ti lotus. Uray dagiti bassiusit a makina a nalaka a madadael no mabasa ket kayatda a pagbalinen a di maslep a kas iti dayta a bulong. “Nagadu ti mabalin a pakausaranna,” kuna ti Science Daily.

Ania ti makunam? Naiparna laeng kadi a timmaud ti bulong ti lotus? Wenno nadisenio dayta?