Ti Panangmatmat ti Biblia

Kinamatalek iti Asawa—Ania a Talaga ti Kaipapananna?

Namnamaen ti kaaduan a tattao a dagiti agassawa ket agtalinaedda a matalek iti maysa ken maysa babaen ti dida pannakikamalala. Maitunos dayta iti Biblia ta kunana: “Ti panagasawa nadayaw koma iti tengnga dagiti isuamin, ket ti pagiddaan ti agassawa awan koma ti tulawna.”—Hebreo 13:4.

TI KADI laeng panangliklik iti pannakidenna iti di asawa ti intero a kaipapanan ti kinamatalek iti asawa? Ti ngay seksual a panagar-arapaap iti saanmo nga asawa? Maysa ngata a kita ti “di kinamatalek” ti nasinged a pannakigayyem iti dimo kasekso?

Awan Kadi ti Pagdaksan Dagiti Seksual a Panagar-arapaap?

Sigun iti Biblia, ti sekso ket natural ken nagsayaat a paset ti biag ti agassawa. Maysa dayta a gubuayan ti rag-o ken pannakapnekda a dua. (Proverbio 5:18, 19) Ngem patien ti adu nga eksperto ita a normal ken makapasalun-at pay ketdi no ti maysa a naasawaan ket agarapaap a makidenna iti dina asawa. Awan kadi ti pagdaksan ti kasta a panagar-arapaap no la ket ta saan nga aktual a maaramid dayta?

Ti seksual a panagar-arapaap ket naipamaysa iti panangpennek iti bukod a tarigagay. Ti kasta a managimbubukodan a kababalin ket maikontra iti balakad ti Biblia kadagiti naasawaan. No maipapan iti seksual a relasion, kastoy ti kuna ti Sao ti Dios: “Ti babai saanna a watwaten ti kinaturay iti bukodna a bagi, no di ti asawana; kasta met laeng, ti lalaki saanna a watwaten ti kinaturay iti bukodna a bagi, no di ket ti asawana.” (1 Corinto 7:4) No masurot ti balakad ti Biblia, ti panagdenna ket saan nga agbalin a pangpennek laeng iti kabukbukodan a derrep a rumsua gapu iti seksual a panagar-arapaap. Kas resultana, naragragsak dagiti agassawa.—Aramid 20:35; Filipos 2:4.

Ti seksual a panagar-arapaap ti maysa iti dina asawa kayariganna ti panagsaganana a mangaramid kadagiti banag a no ipaypaysona, agresulta iti nakaro a panagsakit ti nakem ti asawana. No kasta ti pampanunotenna, ad-addanto ngata a maaramidna ti makikamalala? Ti simple a sungbat ket wen. Ipakita ti Biblia ti panagnaig ti pampanunot ken ar-aramid: “Tunggal maysa masuot babaen ti pananggargari ken panangsulbog ti bukodna a derrep. Kalpasanna ti derrep, inton nayinawen, mangipasngay iti basol.”—Santiago 1:14, 15.

Kinuna ni Jesus: “Tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” (Mateo 5:28) No liklikam ti agar-arapaap a makidendennaka iti dimo asawa, ‘masaluadam ta pusom’ ken masalaknibam ti relasionyo nga agassawa.—Proverbio 4:23.

Apay a Liklikam a Suminged ti Riknam iti Dimo Asawa?

Ti naballigi a panagasawa kalikagumanna ti panangipaaymo iti “naipamaysa a debosion” iti asawam. (Kanta ni Solomon 8:6; Proverbio 5:15-18) Ania ti kaipapanan dayta? Nupay gagangay a maaddaanka kadagiti gagayyem a lallaki ken babbai, karbengan ti asawam nga isu ti kangrunaan a pangipaayam iti tiempom, atensionmo, ken emosional a pigsam. Aniaman a relasion a mangagaw iti dayta a karbengan ti asawam ket maysa a kita ti “di kinamatalek,” uray no saanka nga aktual a nakidenna.a

Kasano a tumanor ti kasta a relasion? Nalabit adda dimo kasekso a kasla natataer, napimpintas, wenno ad-adda a mannakipagrikna ngem iti asawam. Ti pannakikadkaduam iti dayta a tao iti pagtrabahuan wenno kadagiti sosial a taripnong ket mabalin nga agtungpal iti panagtungtongyo maipapan iti personal a bambanag agraman kadagiti problema wenno pakaup-upayam iti asawam. Tapno maliwliwaka, mabalin nga isu ti kanayonton a pangipeksaam iti riknam. Ti pannakikomunikarmo kenkuana iti man personal, telepono, wenno Internet ket mabalin nga agtungpal iti panangliputmo iti asawam. Maiparbeng a namnamaen ti agassawa nga adda bambanag a pagtungtonganda laeng a dua ken saan koma a maammuan ti sabsabali dayta a “kompidensial” a saritaanda.—Proverbio 25:9.

Agannadka di la ket ta ikalkalintegam nga awan met ti romantiko a riknam iti dayta a tao idinto ta kinaagpaysuanna ket mabalin nga addan! ‘Ti puso nagulib,’ kuna ti Jeremias 17:9. No nasingedka iti dimo kasekso, isaludsodmo iti bagim: ‘Ilimlimed wenno ikalkalintegak kadi daytoy a relasion? Alusiisenak ngata no mangngeg ti asawak ti pagsarsaritaanmi? Ania ngata ti mariknak no kasta met ti aramiden ti asawak?’—Mateo 7:12.

Ti di maiparbeng a pannakirelasion mabalin a pagsinaenna ti agassawa tangay ti kinasinged ti rikna ket mangituggod iti pannakikamalala. Kas impakdaar ni Jesus, “rummuar manipud puso dagiti . . . pannakikamalala.” (Mateo 15:19) Ngem uray no awan ti napasamak a pannakikamalala, narigaten nga isubli ti napukaw a panagtalek. Kinuna ti maysa nga asawa a babai nga agnagan Karen:b “Nadudog ti pusok idi naduktalak nga adda babai nga inaldaw ken masansan a sililimed a kasarsarita ni Mark iti telepono. Imposible nga awan pay ti napasamak kadakuada. Diak ammo no agtalekakto pay kenkuana.”

Malaksid iti asawam, dika unay makisinninged iti dimo kasekso. Saanmo a tagtagilag-anen ti kaadda ti di umiso a rikrikna wenno dimo ikalintegan dagiti di mayanatup a motibo. No madlawmo a ti kinasingedmo iti sabali pagpeggadenna ti relasionyo nga agassawa, agtignayka a dagus a manglimitar wenno mamagpatingga iti dayta. Kuna ti Biblia: “Nasaldet daydiay nakakita iti didigra ket rugianna ti aglemmeng.”—Proverbio 22:3.

Saluadam ti Relasionyo nga Agassawa

Pinanggep ti Namarsua kadatayo a ti panagasawa ti kasingedan koma a relasion ti dua a tao. Kinunana a ti agassawa a lalaki ken babai ket “masapul nga agbalinda a maymaysa a lasag.” (Genesis 2:24) Saan la a ti seksual a panagdenna ti ramanen ti panagtiponyo kas maymaysa a lasag. Ramanenna met ti nadekket a riknayo iti maysa ken maysa a paspasingeden pay ti panagpinnabus-oy, panagtinnalek, ken panagrinnaemyo a dua. (Proverbio 31:11; Malakias 2:14, 15; Efeso 5:28, 33) No iyaplikarmo dagitoy a prinsipio, masaluadam ti relasionyo nga agassawa manipud kadagiti makadadael a resulta ti mental ken emosional a panangliput.

[Footnotes]

NAPANUNOTYO KADIN?

◼ Ti kadi seksual a panagar-arapaap mabalin nga agtungpal iti pannakikamalala? —Santiago 1:14, 15.

◼ Mabalin kadi nga agpeggad ti relasionyo nga agassawa no nasingedka iti sabali a dimo kasekso-Jeremias 17:9; Mateo 15:19

◼ Kasanom a mapagbalin a nasingsinged ti relasionyo nga agassawa?—1 Corinto 7:4; 13:8; Efeso 5:28, 33.

[Blurb iti panid 29]

“Tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.”—Mateo 5:28