Nadisenio Kadi?

Ti Talukab ti Cyphochilus nga Abal-abal

◼ Ti talukab ti Cyphochilus nga abal-abal ket buklen dagiti nagrurutap a siksik a sangapulo a daras a naing-ingpis ngem iti buok ti tao. “Idi sinukimatko dagita iti mikroskopio, kaslaak la kumitkita iti naiduma a lubong,” kuna ni Dr. Pete Vukusic iti Exeter University idiay Britania. “Talaga a makapaamanga.”

Usigem: Natakuatan ni Vukusic no ania ti makagapu iti natayengteng a puraw a kolor ti abal-abal. Saan a maigapu iti aniaman a substansia no di ket iti kadakkel dagiti sag-ut a mangbukel kadagiti siksik ken iti distansia iti nagbabaetan dagiti sag-ut. Dayta ti makagapu a maiwaras ti lawag iti naisangsangayan a pamay-an. “Dagiti mailaklako a mineral a pangkalupkop, kas kadagidiay maus-usar kadagiti de kalidad a papel, plastik, ken dadduma a pintura, masapul a mamindua a napuspuskolda tapno makapataudda iti kasta a kapuraw,” kuna ti Science Daily.

Patien dagiti sientista a makatulong ti talukab ti Cyphochilus tapno bumagay daytoy iti puraw a fungi a masansan a pakasarakan kenkuana. Ngem ad-adda nga interesado dagiti eksperto no kasano a ti tao matuladna ti sekreto ti kolor daytoy a bassit nga abal-abal—kas pagarigan, iti panangpataud kadagiti nakapurpuraw a sintetiko a material. Kuna ni Vukusic a dagiti bambanag a kas iti papel a pagsursuratantayo, ti kolor ti ngipentayo, ken uray ti kinalawag ti silaw “ket ad-adda a mapasayaat no matulad ti teknolohia ti pannakadisenio daytoy nga abal-abal.”

Ania ti makunam? Naiparparna la kadi ti puraw a talukab ti Cyphochilus nga abal-abal? Wenno adda nangdisenio iti dayta?

[Ladawan iti panid 24]

Ti “Cyphochilus” nga abal-abal ket kas kadakkel laeng ti murdong ti ramaymo(napadakkel a ladawan)

[Credit Line]

Department of Entomology, Kasetsart University, Bangkok