Ti Harpy Eagle Mangnganup iti Napuskol a Kabakiran
BABAEN ITI MANNURAT TI AGRIINGKAYO! IDIAY ECUADOR
◼ Nalabit a nagamanga dagiti nagkauna nga eksplorador iti Abagatan nga America idi damo a makitada daytoy a dakkel a tumatayab. Gapuna, pinanagananda dayta iti harpy—ti awag idi iti nakabutbuteng nga ulimaw a kagudua a tumatayab ken kagudua a babai iti mitolohia dagiti Griego.
Agingga ita, makapaamanga pay laeng ti langa daytoy a tumatayab. Agtayag iti 91 a sentimetro ken agingga iti 2 a metro ti kaatiddog ti nakaukrad a payakna. Masarakan daytoy iti napuskol a kabakiran ti Sentral ken Abagatan nga America. Maysa daytoy kadagiti kadakkelan ken kapigsaan nga agila iti lubong. Daddadakkel dagiti kabaian ken agdagsenda iti siam a kilo.
Gapu iti kadakkelda, addaan dagiti harpy eagle iti natibker a kawwet nga umatiddog iti agarup 13 a sentimetro, dua a daras nga at-atiddog ngem iti kawwet ti bald eagle. Maysa pay, sigun iti National Geographic Today, nakapigpigsa dagiti kawwet ti harpy eagle nga uray la kabaelanna a rumeken “dagiti tulang ti sloth, sunggo, ken dadduma a masippayutna manipud iti napuskol a kabakiran, isu a masansan a matay a dagus dagiti biktimana.” Ngem iti laksid dagiti nabileg a kawwet ken kinadakkel ti harpy eagle, nakaul-ulimek nga agtayab a dimo pay madlaw ti ilalabasna.
Agpegpeggad a Tumatayab
Nupay ti harpy eagle ket saan a rumbeng a pagbutngan dagiti tattao, adda rason nga agbuteng daytoy a tumatayab kadagiti tattao. Ti ilegal a panaganup ken panangdadael kadagiti kabakiran ti makagapu nga agpegpeggad a maungaw daytoy a tumatayab isu a manmanon a makita daytoy kadagiti kabakiran. Tapno maisalbar ti harpy eagle, ti Panama indeklarana daytoy kas nailian a tumatayab, ken nadagsen ti dusa dagidiay matiliwan nga aganup.
Ikagkagumaan met ti Ecuador nga isalbar dagiti harpy eagle. Idi ininterbiu ti Agriingkayo! ti beterinario a ni Dr. Yara Pesantes iti Guayaquil Historic Park, kunana a sa la mabalin nga agpaadu dagiti harpy eagle no uppat wenno lima ti tawendan. Ngem kaskasdi a kada dua laeng a tawen a makapaaduda, ken maysa wenno dua laeng ti mayitlogda. Gapu iti nabayag a panagpaaduda, maysa a karit ti panangsalbar kadakuada. Ngem ti programa ti panagpaadu nga insayangkat ti Guayaquil Historic Park ket nakapatauden iti maysa a nasalun-at a sibong, kuna ni Dr. Pesantes.
Ngem iti din agbayag, saanton a parikut ti panangsalbar iti dayta a tumatayab. Apay? Ti Namarsua, ni Jehova a Dios, naan-anayto nga imatonanna dagiti aramid ditoy daga ken paneknekanna a sigurado a saan nga ubbaw ti panangparsuana iti planetatayo ken kadagiti nakaskasdaaw a parsua nga adda iti dayta.—Salmo 104:5; Isaias 45:18.
[Ladawan iti panid 25]
Panagsagana a mangikabil iti tanda ti agila
[Credit Line]
Pete Oxford/Minden Pictures
[Picture Credit Line iti panid 25]
Tui De Roy/Roving Tortoise Photos