Panangmatmat iti Lubong
◼ “Agarup 160,000 a displey iti museo ti mapukpukaw iti intero a Russia.” —RIA NOVOSTI, RUSSIA.
◼ “Ti Phoenix Mars Lander ti NASA natakuatanna dagiti agtintinnag a niebe manipud kadagiti ulep ti Mars.”—“NASA MISSION NEWS,” E.U.A.
◼ “Saan a naka-seat belt wenno nakahelmet ti 65 a porsiento kadagiti natay a drayber ken pasahero mainaig iti aksidente iti lugan iti Grecia.”—EIKONES, GRECIA.
Dagiti Mapukpukaw a Bagahe
Masansan nga adda dagiti mapukaw a bagahe bayat dagiti biahe iti eroplano. Impadamag ti International Herald Tribune nga idi 2007, “adda 42 a milion a bagahe a napukaw, nangatngato iti 25 a porsiento ngem idi 2006.” Kaaduan kadagita a bagahe ti naisubli kadagiti makinkukua iti uneg ti 48 nga oras, ngem 3 a porsiento kadagita, “maysa a bagahe iti tunggal 2,000 a biahero, ti saanen a nasarakan.” Naggasto dagiti kompania ti eroplano iti $3.8 a bilion idi 2007. Karaman kadagiti makagapu ket ti “umad-adu a pasahero, kinaababa ti oras a panagtalinaed ti eroplano iti eropuerto,” ken ti di umiso a panangasikaso ken panangmarka kadagiti bagahe.
Agkabkabbalay a Katoliko
Ipakita ti maysa a panagadal dagiti Pranses a “bumasbassit ti impluensia ti relihion” isu a nagbalbaliw ti estilo ti panagbiag ken moral dagiti tattao, aniaman ti relihionda, kuna ti magasin a Population & Sociétés. Kas pagarigan, agarup 88 a porsiento kadagiti agtutubo nga agtawen iti 18 agingga iti 24 idiay Francia ti agkuna a Katolikoda, ngem 80 a porsiento kadakuada ti saan a pulos a mapmapan iti simbaan malaksid no kasar, buniag, wenno pumpon. Agminar kadagiti pamilia ti pannakapukaw dagiti nasayaat a kababalin. Uppat a pulo a tawen ti napalabas, 1 iti tunggal 10 nga agassawa ti nagkabbalay sakbay a nagkasarda. Ita, ti promedio ket 9 iti tunggal 10. “Kadagiti mannakimisa a Katoliko, 75 a porsiento ti nagdenna sakbay a nagkasarda,” kuna ti panagadal.
Agsasaruno a Panagpakamatay Dagiti Mannalon a Taga-India
Sipud idi 2002, nasurok a 17,000 a mannalon idiay India ti agpakpakamatay iti kada tawen, masansan babaen kadagiti pestisidio, kuna ti diario a The Hindu. Karaman iti parikut dagiti mannalon ket ti tikag, ilalaka ti presio dagiti apit, ingingina dagiti mausar iti panagtalon, ken ti kinarigat ti panagutang iti banko. Kas resultana, adu ti bumulod kadagiti agpapautang, nga agpatubo iti dakkel nga interes, isu a mailumlomda iti utang. Tapno makabayadda, dadduma a mannalon ti mangilako kadagiti lalaemda. Ngem no saan a makatulong dayta a mangrisut iti parikutda, rinibu ti mangaramid iti ammoda a kakaisuna a solusion—ti panagpakamatay.
Komunikasion Sakbay a Mapessaan
“Agkokomunikar dagiti buaya uray addada pay la iti itlog,” tapno agsasarunoda a mapessaan, kuna ti The Times ti London. Nairekord ti uni dagiti di pay napessaan a buaya iti Nilo. Kalpasanna, naipangngeg dayta iti maysa a grupo dagiti itlog. Simmungbat dagiti di pay napessaan a buaya ken masansan nga aggaraw dagiti itlog nga ayanda ngem kadagiti saan a nakaipangngegan ti uni. “Dagidiay nakangngeg iti uni agsasarunoda nga agpessa iti baet a sangapulo a minuto,” kuna ti damag. Ngem saan a kasta ti napasamak kadagidiay di nakangngeg iti uni.