Tulong Manipud ‘iti Dios ti Liwliwa’

NAGSAGABA ni Ari David iti nakaro a pannakatuok ti rikna ken adu a ‘pannakariribuk ti panunot.’ Kaskasdi nga agtalek a naan-anay a maawatannatayo ti Namarsua. “O Jehova, sinukimatnak, ket ammonak,” insuratna. “Sika naammuam ti panagtugawko ken itatakderko. Naimutektekam ti panunotko manipud adayo. Ta awan pay uray maysa a sao iti dilak, ngem, adtoy! O Jehova, ammomon amin dayta.”​—Salmo 139:1, 2, 4, 23.

Makapagtalektayo met a maawatannatayo ti Namarsua ken ti nakaro nga epekto ti depresion iti imperpekto nga isip ken bagitayo. Ammona no ania ti pakaigapuan ti depresion ken no ania ti kasayaatan a panangdaer iti dayta iti sidong ti agdama a kasasaadtayo. Maysa pay, impalgakna no kasanona nga ikkaten nga agnanayon ti depresion. Awanen ti sabali pay a nasaysayaat a makatulong kadatayo no di ti naasi a “Dios, a mangliwliwa kadagidiay naipababa.”​—2 Corinto 7:6.

Ngem mabalin a panunoten dagidiay malmaldaangan no kasano a matulongan ida ti Dios no agpasarda iti emosional a pannakariribuk.

◼ Makaadani kadi iti Dios dagidiay malmaldaangan?

Asideg ti Dios kadagiti malmaldaangan nga adipenna nga arigna a makipagnaed kadagiti ‘nailupitlupit ken napakumbaba ti espirituna, tapno paungarenna ti espiritu dagidiay napakumbaba ken tapno paungarenna ti puso dagidiay mailupitlupit.’ (Isaias 57:15) Anian a makaliwliwa a “ni Jehova asideg kadagidiay nadunor ti pusoda; ket dagidiay a naidagel iti espiritu isalakanna”!​—Salmo 34:18.

◼ Kasano a dagiti malmaldaangan makagun-odda iti liwliwa manipud iti Dios?

Iti aniaman nga oras, dagiti agdaydayaw iti Dios mabalinda ti umadani iti “Managdengngeg iti kararag,” daydiay makatulong kadatayo a mangdaer kadagiti makariribuk a rikna ken kasasaad. (Salmo 65:2) Ti Biblia idagadagna nga ipeksatayo kenkuana ti linaon ti pusotayo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.”​—Filipos 4:6, 7.

◼ No ngay pampanunotentayo a saan a maipangag dagiti kararagtayo gapu ta mariknatayo nga awan serserbitayo?

Gapu iti depresion, nalabit nga ipapantayo a saan nga umdas dagiti panangikagumaantayo a mangay-ayo iti Dios. Nupay kasta, ti nailangitan nga Amatayo matarusanna ti imperpekto a riknatayo, “a laglagipenna a tapoktayo.” (Salmo 103:14) Uray no ‘kondenarennatayo ti pusotayo,’ mabalintayo a kombinsiren ti pusotayo a “ti Dios dakdakkel ngem kadagiti pusotayo ket ammona ti amin a bambanag.” (1 Juan 3:19, 20) No kasta, mabalinyo nga iyebkas dagiti kararagyo babaen kadagiti sasao a masarakan kadagiti teksto ti Biblia a kas iti Salmo 9:9, 10; 10:12, 14, 17; ken 25:17.

◼ Kasano no mariribukantayo unay ket ditay maipeksa ti rikriknatayo?

Uray no nadudog unay ti pusotayo a ditay payen ammo ti ibagatayo, ditay koma sumuksuko! Itultuloytayo ti umadani iti “Ama dagiti nadungngo nga asi ken ti Dios ti amin a liwliwa,” nga ammotayo a maawatanna ti rikrikna ken kasapulantayo. (2 Corinto 1:3) Ni Maria, a nadakamat itay, kunana: “Kadagiti gundaway a mariribukanak unayen, diak ammo no ania ti ikararagko. Ngem ammok a maawatan ken tulongannak ti Dios.”

◼ Kasano a sungbatan ti Dios dagiti kararagtayo?

Saan nga ibaga ti Biblia nga ikkaten ti Dios ti amin a pakarigatantayo ita. Nupay kasta, pabilgennatayo ti Dios tapno madaerantayo ti “amin a bambanag”​—agraman ti depresion. (Filipos 4:13) “Idi damo a nagsagabaak iti depresion,” kuna ni Martina, “inkararagko ken Jehova a paimbagenna koma a dagus ti sakitko gapu ta kasla diak kabaelanen. Ngem ita, umdasen nga ikararagko a pabilgennak koma iti inaldaw tapno maandurak dayta.”

Ti Biblia ket napateg a gubuayan ti naespirituan a pammabileg kadagiti agsagsagaba iti depresion tapno madaeranda dayta. Ni Sarah, a makidangdangadang iti depresion iti 35 a tawen, nakitana a mismo ti pagsayaatan ti inaldaw a panagbasa iti Biblia. Kunana: “Talaga nga apresiarek ti naitulong kaniak dagiti doktor. Ngem kangrunaan iti amin, nakitak ti naespirituan ken praktikal a kinapateg ti panagbasa iti Sao ti Dios. Inyugalikon a basaen dayta.”

Agnanayon nga Awanton ti Depresion!

Idi adda ditoy daga ni Jesu-Kristo, impakitana ti naggapu iti Dios a pannakabalinna a mangpaimbag kadagiti naut-ot nga an-annayen. Magagaran ni Jesus a mangyeg iti bang-ar kadagiti agsagsagaba iti nakaro a sakit. Napasaranna a mismo ti tuok nga itden ti nakaro a pannakariribuk. Iti rabii sakbay ti nasaem nga ipapatayna, “nangidaton ni Kristo kadagiti araraw ken kasta met kadagiti dawat iti Daydiay a makabalin a mangisalakan kenkuana iti ipapatay, buyogen dagiti napigsa nga ikkis ken lulua.” (Hebreo 5:7) Nupay nagpasar ni Jesus iti nakaro a pannakariribuk, nagunggonaantayo iti dayta gapu ta “kabaelanna ti bumadang kadagidiay masubsubok.”​—Hebreo 2:18; 1 Juan 2:1, 2.

Ibaga ti Biblia a panggep ti Dios nga ikkaten ti amin a makariribuk a kasasaad a mangpakpakaro iti depresion. Inkarina: “Mangparsuaak iti baro a langlangit ken baro a daga; ket dagiti immun-una a banag saandanto a maipalagip, saandanto met a tumpuar iti puso. Ngem agragsakkayo ket agrag-okayo iti agnanayon iti daydiay parsuaek.” (Isaias 65:17, 18) Ti “baro a langlangit” (ti Pagarian ti Dios) isublinanto ti perpekto a pisikal, emosional, ken naespirituan a salun-at iti “baro a daga” (ti kagimongan dagiti nalinteg a tattao ditoy daga). Awanton ti sakit iti agnanayon.

[Blurb iti panid 9]

“Inawagak ti naganmo, O Jehova, manipud iti kaadalman a kita ti abut. Ti timekko denggem koma. Dika ilemmeng ti lapayagmo iti pakagin-awaak, iti panagpatulongko. Immasidegka idi aldaw a panangaw-awagko kenka. Kinunam: ‘Dika agbuteng.’”​—Un-unnoy 3:55-57

[Kahon/Dagiti Ladawan iti panid 7]

“AGSAOKAYO ITI MALALIWLIWA KADAGITI MALMALDAANGAN

Tunggal malapunos ni Barbara iti depresion ken iti pannakarikna nga awan serserbina, teleponuanda ken lakayna ti gayyem ti pamiliada a ni Gerard, maysa a Kristiano a panglakayen. Siaanus nga umimdeng bayat nga agan-anug-og ni Barbara a mangipekpeksa kadagiti pakariribukanna a nayebkasna idin.

Imbes a mangkritikar wenno mangkondenar, ammo ni Gerard ti umimdeng. (Santiago 1:19) Kas ibalakad ti Biblia, ammona ti ‘agsao iti makaliwliwa kadagiti malmaldaangan.’ (1 Tesalonica 5:14) Siaanus nga ipanamnamana ken Barbara nga isu ket ipatpateg ni Jehova a Dios, ti pamiliana, ken dagiti gagayyemna. Masansan nga ibasaanna ni Barbara iti maysa wenno dua a makaliwliwa a teksto ti Biblia, uray pay no naibasana idin ti dadduma kadagita. Kalpasanna, kanayon a makipagkararag kadakuada iti telepono, banag a makaliwliwa unay iti daytoy nga agassawa.​—Santiago 5:14, 15.

Ammo ni Gerard nga isu ket saan a doktor, ken saanna met nga al-alaen ti akem ti doktor ni Barbara. Ngem ipapaayna ken Barbara ti maysa a banag nga ipapaay ti manmano a doktor​—dagiti makaliwliwa a kararag ken teksto ti Biblia.

Tapno makaipaaykayo iti ‘sasao a makaliwliwa kadagiti malmaldaangan’

Mabalinyo a kunaen: “Kanayon a pampanunotek ti kasasaadmo. Ammok nga adda dagiti gundaway a saan a nasayaat ti riknam. Komustakan ngay?”

Laglagipenyo: Naimpusuan koma ti panagsaoyo ken umimdengkayo buyogen ti empatia, uray pay no ti malmaldaangan ket isaritana manen ti nayebkasnan idi.

Mabalinyo a kunaen: “Apresiarek ti maar-aramidam (wenno “Apresiarek dagiti Nakristianuan a galad nga iparparangarangmo”) iti laksid ti kasasaadmo. Ammok a kayatmo nga ad-adu pay koma ti maaramidam. Kaskasdi, ay-ayaten ken apresiarennaka ni Jehova, ken kasta met kadakami.”

Laglagipenyo: Mannakipagrikna ken naasikayo koma.

Mabalinyo a kunaen: “Nabasak daytoy a makaparegta a teksto ti Biblia.” Wenno “Nalagipka idi binasak manen daytoy a paboritok a teksto ti Biblia.” Kalpasanna, basaen wenno ibagayo lattan ti linaon ti teksto.

Laglagipenyo: Saankayo koma a kasla agsersermon.

[Kahon iti panid 9]

Liwliwa Manipud iti Kasuratan

Makapabileg ken Lorraine ti kari ni Jehova a masarakan iti Isaias 41:10: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.”

Kuna ni Álvaro a masansan a makaliwliwa kenkuana ti sasao ti Salmo 34:4, 6: “Nagimtuodak ken Jehova, ket sinungbatannak, ket kadagiti amin nga aliawko inispalnak. Daytoy a naparigatan immawag, ket nangngeg ni Jehova a mismo. Ket kadagiti amin a rigatna isu insalakanna.”

Kuna ni Naoya a kanayon a makaliwliwa kenkuana ti panangbasa iti Salmo 40:1, 2: “Sipapasnek a nanginanamaak ken Jehova, ket ngarud inyallingagna kaniak ti lapayagna ket nangngegna ti panagpatulongko. . . . Impasdekna a sititibker dagiti addangko.”

Ti Salmo 147:3 ipanamnamana ken Naoko a ni Jehova “paimbagenna dagidiay nasnaayan ti pusona, ket bedbedanna dagiti naut-ot a pasetda.”

Dagiti sasao ni Jesus a nailanad iti Lucas 12:6, 7 ti timmulong ken Eliz nga agtalek iti panangaywan ni Jehova: “Saan kadi a ti lima a billit-tuleng mailako iti dua a sinsilio a bassit ti pategna? Kaskasdi awan uray maysa kadakuada ti malipatan iti sanguanan ti Dios. Ngem uray dagiti buok ti ul-uloyo nabilang aminen. Dikay agbuteng; napatpategkayo ngem iti adu a billit-tuleng.”

Dadduma pay a teksto ti Biblia:

Salmo 39:12: “Denggem ti kararagko, O Jehova, ket iti panagpatulongko umimdengka. Iti luluak dika agulimek.”

2 Corinto 7:6: Ti Dios ‘liwliwaenna dagidiay naipababa.’

1 Pedro 5:7: “Iyallatiwyo [iti Dios] ti isuamin a pakaringgoranyo, agsipud ta isu maseknan kadakayo.”