Ti Panangmatmat ti Biblia

Umiso Kadi a Baliwam ti Relihionmo?

Idi mangrugi ni Avtar a makipagadal iti Biblia, nakapungtot ti pamiliana a Sikh. “Iti pagilianmi,” kunana, “ilaksidnaka ti komunidad no baliwam ti relihionmo. Uray dagiti naganmi, adda narelihiosuan a kaipapananda. Ti panangbaliw iti relihion ket maibilang a panangtallikud iti kinasiasinom ken kinaawan panagraem iti pamiliam.”

IDI agangay, nagbalin ni Avtar a Saksi ni Jehova. Umiso kadi a binaliwanna ti relihionna? Nalabit a ti sungbatmo ket kas iti panangmatmat ti pamilia ni Avtar. Mabalin a mariknam a saanen a rumbeng a baliwam ti relihionmo no daytan ti nabangonan ti pamiliayo.

Napateg ti panagraem iti pamilia. Kuna ti Biblia: “Umimdengka ken amam a nangputot kenka.” (Proverbio 23:22) Ngem napatpateg ti panangbirok iti kinapudno maipapan iti Namarsua kadatayo ken kadagiti panggepna. (Isaias 55:6) Posible kadi dayta? No wen, kasano kapateg kenka dayta a panangbirok?

Panangbirok iti Narelihiosuan a Kinapudno

Saan nga agtutunos ti isursuro dagiti nadumaduma a relihion. Lohikal ngarud a panunoten a saan nga amin a pannursuroda ket umiso. Gapuna, kas kuna ti Biblia, adu a tattao ti “adda regtada iti Dios; ngem saan a maitunos iti umiso a pannakaammo.” (Roma 10:2) Kaskasdi, kas nailanad iti 1 Timoteo 2:4, kuna ni apostol Pablo a pagayatan ti Dios nga “amin a kita ti tattao . . . dumtengda iti umiso a pannakaammo iti kinapudno.” Kasano a mabirokan dayta nga umiso a pannakaammo?

Usigem dagiti rason no apay a sukimatem ti Biblia. Kuna ni Pablo, a napaltiingan a mannurat iti Biblia: “Amin a Kasuratan impaltiing ti Dios ken makagunggona iti panangisuro.” (2 Timoteo 3:16) Kas paset ti panangbirokmo iti kinapudno, sukimatem dagiti pammaneknek nga umiso ti kuna ti Biblia. Usigem a mismo dagiti di maartapan a sirib a linaonna, kinaumiso dagiti salaysayna, ken dagiti natungpal a padtona.

Saan nga isuro ti Biblia nga amin a relihion ket anamongan ti Dios. Imbes ketdi, pakdaaranna dagiti agbasbasa a dida patien ti amin a mangngegda no di ket ‘subokenda dagiti naipaltiing nga ebkas tapno makitada no nagtaud dagita iti Dios.’ (1 Juan 4:1) Kas pagarigan, aniaman a pannursuro a naggapu iti Dios masapul a maitunosda iti personalidadna, a pakairamanan ti kangrunaan a galadna​—ti ayat.​—1 Juan 4:8.

Ipasigurado ti Biblia a kayat ti Dios nga isu ket ‘pudno a masarakantayo.’ (Aramid 17:26, 27) Gapu ta kayat ti Namarsua a mabirokantayo ti kinapudno, umiso ngarud nga agtignaytayo maitunos iti pammaneknek a masarakantayo​—uray kaipapanan dayta ti panangbaliw iti relihiontayo. Ngem kasanon no mangyeg daytoy kadagiti parikut?

Natimbeng a Kinasungdo iti Pamilia

No dagiti tattao baliwanda ti relihionda, mabalin nga ikeddengda ti saan a makiraman iti sumagmamano a narelihiosuan a kostumbre wenno piesta. No kasta, natural laeng nga agsakit ti nakem dagiti dadduma a miembro ti pamiliada. Binigbig daytoy ni Jesus. Kinunana kadagiti pasurotna: “Immayak a mangpataud iti pannakabingbingay, ti maysa a lalaki maibusor iti amana, ken ti anak a babai maibusor iti inana, ken ti maysa nga agtutubo nga asawa a babai maibusor iti katuganganna-a-babai.” (Mateo 10:35) Kayat kadi a sawen ni Jesus a dagiti pannursuro ti Biblia ket nairanta a mangpataud iti di maliklikan a panagririri? Saan. Nasaksakbay a nakitana no ania ti mapasamak no busoren dagiti kameng ti pamilia daydiay mangannurot iti pammati a naiduma iti nabangonanda.

Aramidem kadi ti aniaman tapno laeng saan nga agririri dagiti kameng ti pamiliam? Isuro ti Biblia a dagiti annak rumbeng nga agtulnogda kadagiti nagannakda ken agpasakup dagiti babbai kadagiti assawada. (Efeso 5:22; 6:1) Nupay kasta, ibilinna a dagiti agayat iti Dios masapul nga ‘agtulnogda iti Dios kas agturay imbes a kadagiti tattao.’ (Aramid 5:29) Gapuna, adda gundaway a ti kinasungdo iti Dios mabalin nga agresulta iti panangaramid iti desision a saan nga anamongan ti dadduma a kameng ti pamiliayo.

Nupay ipakita ti Biblia ti nalawag a nagdumaan ti pudno ken palso a pannursuro, ti Dios inikkanna ti tunggal maysa iti wayawaya nga agpili. (Deuteronomio 30:19, 20) Awan koma ti mapilit nga agdayaw iti pamay-an a saanna met a kayat wenno mapuersa nga agdesision no ania ti pilienna​—ti relihionna wenno ti pamiliana. Ti kadi panagadal iti Biblia rakrakenna ti pamilia? Saan. Kinapudnona, iparegta ti Biblia a dagiti agassawa agtalinaedda koma kas maysa a pamilia uray no saanda nga agkarelihionan.​—1 Corinto 7:12, 13.

Panangsaranget iti Buteng

Nalabit a madanaganka iti ibaga dagiti makaam-ammo kenka no agpayadalka iti Biblia kadagiti Saksi ni Jehova. Kinuna ni Mariamma: “Madanagan dagiti nagannak ken kakabsatko di la ket ta saanak a makabirok iti asawa a makabael a mangbiag kaniak. Gapuna, binusorda ti panagadalko iti Biblia.” Nagtalek ni Mariamma kenni Jehova ket intultuloyna ti nakipagadal. (Salmo 37:3, 4) Maaramidam met dayta. Imbes a panunotem dagiti mabalin a mapasamak, panunotem ketdi dagiti itdenna a gunggona. Ti mensahe ti Biblia pasayaatenna ti biag ken kababalin dagiti tattao. Masursuroda nga ipakita iti pamiliada ti di agimbubukodan nga ayat. Mabalin a maiwaksi dagiti dakes nga ugali, kas iti berbal ken pisikal a kinaranggas ken panangabuso iti arak ken droga. (2 Corinto 7:1) Ti Biblia itandudona dagiti nasayaat a kababalin kas iti kinasungdo, kinamapagpiaran, ken kinagaget. (Proverbio 31:10-31; Efeso 4:24, 28) Apay a dimo adalen ti Biblia ket kitaem dagiti gunggona nga itden ti panangyaplikarmo kadagiti pannursurona?

NAPANUNOTMO KADIN?

◼ Apay a masapul a sukimatem dagiti pannursuro ti relihionmo?​—Proverbio 23:23; 1 Timoteo 2:3, 4.

◼ Kasano a mailasinmo dagiti pudno a pannursuro?​—2 Timoteo 3:16; 1 Juan 4:1.

◼ Ipalubosmo kadi a lapdannaka ti pamiliam nga agadal iti Biblia?​—Aramid 5:29.

[Blurb iti panid 29]

Ti mensahe ti Biblia pasayaatenna ti biag ken kababalin dagiti tattao

[Ladawan iti panid 29]

Ni Mariamma ken ni lakayna