Maikadua a Sekreto: Pannakaikumit

“Ti pinagsinnangol ti Dios saan koma a pagsinaen ti tao.”—Mateo 19:6.

No ania ti kaipapananna. Ti naballigi nga agassawa matmatanda ti panagasawada kas permanente a panagtipon. No adda rumsua a problema, ikagumaanda a solbaren imbes a dayta ti panggapuanda nga agsina. No naikumit ti agassawa iti maysa ken maysa, natalged ti riknada. Agtalek ti tunggal maysa kadakuada nga itultuloyda a raemen ti panagasawada.

No apay a napateg. Iti adu a wagas, ti pannakaikumit ti pannakaadigi ti relasion ti agassawa. Ngem kalpasan ti masansan a panagsupiat, mabalin a ti pannakaikumit ket kasla ad-addan a maibilang a pagbaludan imbes a pagkamangan. No ar-arigen, ti karinkari a “ni laeng patay ti mamagsina kadata” ket agbalinen a basta katulagan—a no la koma mabalin ket malusotanda. Nalabit saanda a literal a tallikudan ti panagasawada ngem aramidenda dayta iti sabali a wagas—kas pagarigan, didan pagtungtongan dagiti napateg a banag a nasken a pagsaritaanda koma.

Padasem daytoy. Usigem ti katibker ti pannakaikumitmo babaen iti panangsungbatmo kadagiti sumaganad a saludsod.

◼ No kabara ti panagrikiarmi, masansan kadi a pagbabawyak nga isu ti nakiasawaak?

◼ Masansan kadi nga ar-arapaapek a makikadkaduaak iti saanko nga asawa?

◼ No dadduma, ibagbagak kadi iti asawak ti “Panawankan” wenno “Mangsapulak iti sabali a mangipateg kaniak”?

Mangngeddengka. Mangpanunotka iti maysa wenno dua a mabalinmo nga aramiden tapno tumibker ti pannakaikumitmo. (Kas pagarigan: Pasaray suratam ti asawam, mangidispleyka kadagiti retratona idiay pagtrabahuam, wenno inaldaw nga awagam no addaka idiay pagtrabahuam tapno laeng maammuanna a pampanunotem isuna.)

Apay a dika mangpanunot iti dadduma pay a pamay-an ken damagem kenkuana no ania kadagita ti magustuanna unay?

[Ladawan iti panid 4]

Kas iti bangen iti igid ti kalsada, ti pannakaikumit salaknibanna ti panagasawayo

[Credit Line]

© Corbis/age fotostock