Maikatlo a Sekreto: Panagtinnulong

“Ti dua nasaysayaat ngem iti maysa . . . No ti maysa kadakuada matuang, daydiay sabali mabalinna a bangonen ti kaduana.”—Eclesiastes 4:9, 10.

No ania ti kaipapananna. Dagiti naballigi nga agassawa raraemenda ti urnos ti Dios iti kinaulo kas nailanad iti Biblia. (Efeso 5:22-24) Nupay kasta, ti agassawa matmatandan ti bambanag kas “kukuata” imbes a “kukuak,” ken “duadan” a mangaramid iti bambanag imbes nga “agbukbukod” ti tunggal maysa kadakuada. No agtinnulong ti agassawa, didan matmatan ti bagida kas agwaywayas. Isudan ket “maymaysa a lasag”—termino iti Biblia a mangdeskribir iti kinapermanente ken kinasinged ti agassawa.—Genesis 2:24.

No apay a napateg. No dikay agtinnulong nga agassawa, dagiti babassit a banag ket alisto la nga agbalin a dadakkel a problema. Ti la pagkamkamalian ti tunggal maysa ti pampanunotenyon imbes a no kasanoyo a solbaren ti problema. Iti kasumbangirna, no agtinnulongkayo nga agassawa, agbalinkayo a kas iti piloto ken ti katulonganna nga addaan iti agpada a plano iti panagipatayab iti maymaysa nga eroplano imbes a dua a piloto iti agduma nga eroplano nga agdinnungpar inton agangay. No dikay agkapanunotan, agtinnulongkayo a mangsapul kadagiti solusion imbes a sayangenyo ti panawen ken pigsayo nga agpimpinnabasol ken agin-innakusar.

Padasem daytoy. Usigem ti panangmatmatmo iti panagtinnulong babaen iti panangsungbatmo kadagiti sumaganad a saludsod.

◼ Ibilangko kadi ti mateggedak kas “kukuak laeng,” yantangay nagbannogak dayta?

◼ Likliklikak kadi ti kakabagian ti asawak uray no isu ket nasinged kadakuada?

◼ Nasken kadi a diak kadua ti asawak tapno naan-anay a makapagaliwaksayak?

Mangngeddengka. Mangpanunotka iti maysa wenno dua a pamay-an tapno maparang-aymo ti pannakitinnulongmo iti asawam.

Apay a dimo kiddawen iti asawam no ania ti maisingasingna?

[Ladawan iti panid 5]

Ti panagtinnulong kaipapananna a dakayo ket kas iti piloto ken ti katulonganna nga addaan iti agpada a plano iti panagipatayab iti maymaysa nga eroplano