Maikanem a Sekreto: Panagpinnakawan
“Itultuloyyo nga anusan ti maysa ken maysa ken sibubulos a pakawanen ti maysa ken maysa.”—Colosas 3:13.
No ania ti kaipapananna. Ti naballigi nga agassawa makasursuroda kadagiti naaramidanda iti napalabas; ngem dida ingpen dagiti sakit ti nakemda sadanto isidir dagita babaen ti nalabes a pammabasol a kas iti “Kanayonka la a maladaw” wenno “Pulos a dinak dengdenggen.” Patien ti agassawa a ‘pakaidayawanda no palabsenda ti biddut’ ti tunggal maysa.—Proverbio 19:11, Ti Baro a Naimbag a Damag Biblia.
No apay a napateg. Ti Dios ket “sisasagana a mamakawan,” ngem saan a kanayon a kasta dagiti tattao. (Salmo 86:5) No saan a napakawan dagiti nabayagen a biddut, kumaro ti sakit ti nakem agingga a kasla imposiblen ti panangpakawan. Mabalin a din kayat ti tunggal maysa kadagiti agassawa a pagsaritaan ti maipapan iti kaririknada ken didan ikabkabilangan ti rikna ti tunggal maysa. Makuna nga agassawada pay laeng ngem didan agpimpinnateg.
Padasem daytoy. Buyaem dagiti retratoyo idi nabiitkay pay nga agassawa wenno idi agnobiokayo pay laeng. Padasem a pabaraen manen daydi ayat a nariknam sakbay a rimsua dagiti parikut a namagbalbaliw iti panangmatmatmo. Kalpasanna, panunotem dagiti galad a nagustuam iti asawam idi nabiitkay pay nga agam-ammo.
◼ Aniada a galad ti asawam ti magusgustuam unay itan?
◼ Panunotem dagiti nasayaat nga epektona kadagiti annakmo no ad-adda a manangpakawanka.
Mangngeddengka. Mangpanunotka iti maysa wenno dua a wagas a maliklikam ti mangisidir kadagiti napalabas a biddut no adda rumsua a diyo pagkinnaawatan iti asawam.
Apay a dimo padayawan ti asawam gapu kadagiti ap-apresiarem a galadna?—Proverbio 31:28, 29.
Mangaramidka kadagiti pamay-an a maipakitam kadagiti annakmo ti kinamanangpakawan.
Apay a diyo pagsasaritaan kadagiti annakmo ti maipapan iti panangpakawan ken no kasano a magunggonaan ti amin iti pamilia no tunggal miembro ket manangpakawan?
[Ladawan iti panid 8]
No pinakawanmon ti maysa, arigna a nabayadannan ti utangna kenka. Dimo padasen a singiren manen