Ti Panangmatmat ti Biblia

Ti Ngay Panagkabbalay Sakbay ti Panagkasar?

GATANGEM kadi ti maysa a kawes uray no dimo pay impadas dayta? Siempre, saan. Ngamin, inton isuotmo ket matakuatam a saan met gayam nga umanay kenka, sinayangmo laeng ti tiempo ken kuartam.

Kasta met la ti rason ti adu a tattao no maipapan iti panagasawa. Nasaysayaat kano nga agkabbalay nga umuna ti lalaki ken babai sakbay nga agkasarda. Kunada a no didanto agkatunosan, nalakadanto laeng nga agsina ta awan ti problemada a mangipagna iti adut’ rekititosna ken nangina a proseso ti panagdiborsio.

Nalabit kasta ti panagrasrason dagidiay nakakitan iti kasado a gayyemda a mangib-ibtur iti abusado a karelasion. Wenno mabalin a nakitadan a mismo dagiti makadidigra nga epekto ti relasion ti agassawa a din agin-innayat. Gapuna, mabalin a matmatanda a nainsiriban ti panagkabbalay lattan.

Ania ti kuna ti Biblia maipapan iti daytoy a banag? Tapno maammuantayo ti sungbat, nasken nga usigentay nga umuna ti ibagbaga ti Sao ti Dios maipapan iti panagasawa.

“Maymaysa a Lasag”

Isursuro ti Biblia a ti panagasawa ket nadayaw. Saan a nakaskasdaaw dayta ta ni Jehova a mismo ti nangaramid ken nangipasdek iti dayta nga urnos. (Genesis 2:21-24) Sipud idi un-unana, panggep ni Jehova a babaen iti panagasawa, ti lalaki ken babai ket agbalin a “maymaysa a lasag.” (Genesis 2:24) Kalpasan a kinotarna ti teksto iti Biblia a nangipaganetget iti dayta, innayon ni Jesus: “Ti pinagsinnangol ti Dios saan koma a pagsinaen ti tao.”—Mateo 19:6.

Agpayso met ketdi nga adda dagiti agkasar ngem agdiborsiodanto met laeng inton agangay.a Ngem no mapasamak dayta, saan a gapu ta adda depekto ti urnos ti panagasawa. Imbes ketdi, mapasamak dayta agsipud ta ti maysa wenno ti agassawa a mismo ket dida tinungpal ti nagkinnarianda idi nagkallaysada.

Kas panangyilustrar: Ipapantayon nga adda lugan ti agassawa ngem dida manmanteneren sigun kadagiti instruksion ti nangaramid iti dayta. No madadael ti lugan, siasino ti mapabasol? Ti kadi nangaramid wenno dagiti makinlugan a di nangmantener iti dayta?

Umasping met laeng dayta iti panagasawa. No manteneren ti agassawa ti relasionda ken determinadoda a mangsolbar kadagiti problemada babaen iti panangyaplikarda kadagiti prinsipio ti Biblia, adayo nga agdiborsioda. Natalged ti riknada a dua ta naikumitda iti maysa ken maysa. Ti ngarud panagasawa ket agbalin a pamuon ti naayat a relasion.

“Adaywanyo ti Pannakiabig”

Kaskasdi a nalabit pampanunoten ti dadduma: ‘No agkabbalaykami sakbay nga agkasarkami, saan kadi nga ipakpakitami laeng a raraemenmi ti kinasagrado ti panagasawa?’

Nalawag ti sungbat ti Biblia. Insurat ni Pablo: “Adaywanyo ti pannakiabig.” (1 Tesalonica 4:3) Ti termino a “pannakiabig” tukoyenna ti amin a seksual a relasion iti saan nga asawa. Karaman iti dayta ti panagdenna ti dua uray pay no panggepdanto met laeng ti agkallaysa. Sigun ngarud iti Biblia, dakes ti panagkabbalay ti saan pay nga agassawa—uray no panggepda ti agkasar inton agangay.

Ti kadi isursuro ti Biblia ket saanen a praktikal iti kaaldawantayo? Nalabit kasta ti ipagarup ti dadduma. Ngamin, iti adu a pagilian, gagangayen ti panagkabbalay ti saan nga agassawa—adda man wenno awan ti panggepda nga agkasar inton agangay. Ngem panunotem dagiti resultana. Naammuan kadin dagiti agkabkabbalay ti sekreto iti panagballigi ti pamilia? Naragragsakda kadi ngem kadagiti nagkallaysa? Dagidiay kadi nagkabbalay sakbay ti panagkasarda ket ad-adda a matalekda kalpasan ti panagkallaysada? Saan, sigun kadagiti panagadal. Kinapudnona, ad-adu ti problema dagidiay nagkabbalay sakbay a nagkasar ken masansan nga agdiborsiodanto met laeng.

Kuna ti dadduma nga eksperto a saan nga umiso dagiti kasta a resulta ti panagadal. “Dagidiay mangikeddeng nga agkasar nga umuna sakbay nga agdennada ket siguden a naiduma ti kababalinda ngem kadagidiay mangikeddeng a makikabbalay nga umuna,” insurat ti maysa a sikologo. Ipettengna a saan a ti panagkabbalay nga umuna ti kangrunaan nga isyu no di ket ti “panangipateg iti panagasawa.”

No agpayso man dayta, maipaganetget laeng ti kinapateg ti panangtuladtayo iti panangmatmat ti Dios iti panagasawa. Kuna ti Biblia: “Ti panagasawa nadayaw koma iti tengnga dagiti isuamin.” (Hebreo 13:4) No agkinnari ti lalaki ken ti babai nga agtalinaedda a maymaysa a lasag ken ipakitada a raraemenda ti urnos ti panagasawa, saan a kaskarina a mawaswas ti nasinged a relasionda.—Eclesiastes 4:12.

Isu a no subliantayo ti panglukat nga ilustrasion, pudno a nainsiriban nga ipadas nga umuna ti maysa a kawes sakbay a gatangen dayta. Ngem saan nga iti panagkabbalay nga umuna ti pagaplikaran dayta no di ket iti panangbusbos iti umdas a tiempo tapno maam-ammom a naimbag daydiay panggepmo a pakiasawaan. Daytoy a napateg ngem masansan a maliwayan nga addang ket maysa kadagiti adu a sekreto ti panagballigi ti pamilia.

[Footnote]

NAPANUNOTMO KADIN?

◼ Apay a ti laeng agassawa ti ipalubos ti Biblia nga agdenna? —Salmo 84:11; 1 Corinto 6:18.

◼ Aniada a galad ti rumbeng a sapulem iti pakiasawaam?—Ruth 1:16, 17; Proverbio 31:10-31.

[Kahon iti panid 29]

“AGBASBASOL A MAIKANIWAS ITI BUKODNA A BAGI”

Kuna ti Biblia: “Ti mangyugali iti pannakiabig agbasbasol a maikaniwas iti bukodna a bagi.” (1 Corinto 6:18) Kadagiti kallabes a dekada, napaneknekan ti kinaumiso dagita a sasao gapu ta minilion ti natayen iti AIDS ken dadduma pay a sakit a mayakar babaen iti panagdenna. Ngem saan la a dayta. Ipakita dagiti panagadal a kadagiti agtutubo a makidendenna, ad-adu kadakuada ti agsagsagaba iti depresion ken masansan nga aggandat nga agpakamatay. Ti pannakidenna iti nadumaduma a kapareha ket agresulta met iti di kinayat a panagsikog, a no dadduma ket mangituggod iti panagparegreg. Gapu kadagita a kinapudno, maikunatayo a ti moral a pagalagadan ti Biblia ket saan a kadaanan.