Ti Kinapateg ti Panangipakita iti Dungngo
“MASANSAN nga arakupem ida!” kinuna ti maysa a propesor ti child psychiatry iti maysa nga agdadamo nga ina a kaan-anakna iti singin. Nagpabalakad kenkuana dayta nga ina maipapan iti kasayaatan a panangpadakkelna iti annakna. Kastoy pay ti imbaga ti propesor: “Ti ayat ken dungngo ket nasken a maipakita iti nagduduma a pamay-an kas iti panangarakup ken panangbisong, panangyebkas iti nabara a panangipateg, pannakaawat, kinaragsak, kinaparabur, panangpakawan, ken nainkalintegan a disiplina no kasapulan. Ditay pulos ipapan nga ammo lattan ti annaktayo nga ay-ayatentayo ida.”
Kasla kasta met laeng ti kapanunotan ni Tiffany Field a direktor ti Touch Research Institute iti University of Miami, idiay Florida, U.S.A. Kinunana: “Kas iti taraon ken ehersisio, ti panangapros ket nagpateg iti panagdakkel ken salun-at ti maysa nga ubing.”
Kasapulan met kadi dagiti adulto ti pisikal nga ebkas ti dungngo? Wen. Ti clinical psychologist a ni Claude Steiner natakuatanna manipud iti panagsirarakna a ti berbal ken pisikal a pammaregta ket napateg iti emosional a salun-attayo, aniaman ti edadtayo. Kinuna ti nars a ni Laura a mangay-aywan iti dakkel a grupo dagiti nataengan: “Nakitak a talaga a dakkel ti maitulong ti panangyebkas iti dungngo kadagiti lallakay ken babbaket. No aprosam ken nasayaat ti panangtratom kadakuada, agtalekda kenka ken sidadaanda a mangtungpal kadagiti ipaannurotmo kadakuada. Ipakita pay dagita a nadungngo a panangtrato a raraemem ti dignidadda.”
Kanayonanna, magunggonaan nga agpadpada dagidiay mangipakpakita ken mapakpakitaan iti dungngo. Kas iti kinuna idi ni Jesu-Kristo, “ad-adu ti kinaragsak iti panangted ngem iti panangawat.” (Aramid 20:35) Nangnangruna a makagunggona no dagidiay maburburiboran, malmaldaangan, wenno madandanagan ti mapakitaan iti dungngo. Adu ti salaysayen ti Biblia maipapan kadagidiay nakagun-od iti kasta a kita ti tulong.
Panunotem no kasano a naliwliwa unay ti “maysa a lalaki a napno iti kukutel” ken maipupuera iti kagimongan idi siaasi nga inaprosan a mismo ni Jesu-Kristo!—Lucas 5:12, 13; Mateo 8:1-3.
Panunotem no kasano a napabileg ni lakayen a propeta Daniel idi adda anghel ti Dios a sibabara a nangparegta ken namitlo a nangsagid kenkuana. Dagidiay a naayat nga apros ken makaparegta a sasao ti apag-isu idi a kasapulan ni Daniel tapno kumired manen ti napaksuyan a bagi ken panunotna.—Daniel 10:9-11, 15, 16, 18, 19.
Naminsan, dagiti gagayyem ni apostol Pablo nagdaliasatda iti 50 a kilometro manipud Efeso agingga idiay Mileto tapno makitada isuna. Imbaga ni Pablo kadakuada a mabalin a daytan ti maudi a panagkikitada. Sigurado a naparegta ti apostol idi isu ket ‘inapungol ken inagkan’ dagiti nasungdo a gagayyemna kas panagpakadada kenkuana!—Aramid 20:36, 37, Ti Baro a Naimbag a Damag Biblia.
Gapuna, agpadpada a ti Biblia ken dagiti moderno a panagsirarak iparegtada kadatayo nga agdidinnungngotayo. Mangyeg iti pisikal ken emosional a gunggona ti panangpennek iti daytoy a kasapulan. Nabatad a ti naimpusuan ken maitutop nga ebkas ti dungngo ket saan laeng a para kadagiti ubbing.