Timmulong ti Agriingkayo! a Nangispal iti Di Pay Naipasngay nga Ubing

● Ti Mexicana a ni Anita ket tallon ti annakna ken masikog manen.a Imbagana ken lakayna a dinan kayat a manayonan pay ti annakda ken aramidenna ti amin tapno maregreg dayta. Nasaona pay a kayatnan ti agpakamatay! Makipagad-adal idin ni Anita iti Biblia iti maysa kadagiti Saksi ni Jehova ngem dina unay iyap-aplikar ti maad-adalna. “Natangsitak idi,” kinunana.

Ti Saksi a mangyad-adal ken Anita inlawlawagna dagiti maibagay kenkuana a prinsipio ti Biblia. Kas pagarigan, impakaammona ken Anita a ti biag ti di pay naipasngay ket sagrado iti imatang ti Dios. Iti nagkauna nga Israel, no adda nangdangran iti masikog a nagresulta iti pannakatayna wenno ti sikogna, ti tao a nakadangran ket maukom kas mammapatay sigun iti Linteg ti Dios. (Exodo 21:22, 23)b Ngem di impangag ni Anita dayta ta desididon nga agparegreg.

“Adda nangibaga kaniak a no maineksionannak iti maysa a kita ti agas,” kuna ni Anita, “dagus a maregreg ti sikogko. Isu a ginatangko ti agas sa kiniddawko iti gayyemko nga iyineksionna dayta kaniak. Inaramidna ngem awan met ti napasamak. Naammuak idi agangay a dina kayat ti mairamraman isu a sililimed a sinuktanna ti agas iti nadalus a danum.”

Kaskasdi a porsegido ni Anita. Iti maikapat a bulan, nakabirok iti doktor a mayat a mangregreg iti sikogna. Innem nga aldaw sakbay ti tulaganda, isu ket inikkan ti Saksi iti kopia ti artikulo a “Diary ti Di Pay Naipasngay nga Ubing,” a naipablaak iti Setiembre 22, 1980 a ruar ti Agriingkayo! Kastoy ti nagnguduan ti “diary”: “Ita nga aldaw pinataynak ni nanangko.” Naklaat ni Anita kadagita a sasao isu a no mano nga oras a nagsangsangit. Kinunana, “Dayta nga artikulo ti nanglawlawag iti panunotko iti kinadagsen ti basol a gistay naaramidko.”

Nagpasngay ni Anita iti nasalun-at a maladaga a babai. Kunana, “Maragsakanak unay itan ta naam-ammok ni Jehova nga ay-ayatek iti amin a pusok.” Isursurona met iti anakna ti Sao ti Dios tapno ayatenna met ni Jehova. Wen, bigbigen ti balasangna nga utangna iti Dios ti biagna—gapu ta ti Dios ti Gubuayan ti biag, ken gapu ta dagiti pannursuro ti Biblia a nailawlawag iti Agriingkayo! ti nangispal kenkuana.

[Footnotes]