Dagiti Masursurotayo iti Nakaparsuaan
“Anian a nagadu ti aramidmo, O Jehova! Isuda amin inaramidmo buyogen ti kinasirib.”—Salmo 104:24.
ADU ti mangus-usar iti sao a “nakaparsuaan” no tukoyenda ti gubuayan ti disenio dagiti sibibiag a banag. Kas pagarigan, kinuna ti Marso 2003 a ruar ti pagiwarnak a Scientific American: “Kadagiti amin a kalupkop ti bagi a dinisenio ti nakaparsuaan, dagiti dutdot ti kaaduan iti kita ken awan a pulos umartap iti kinamisterioso dagita.” Nupay nalabit ipagarup ti nangisurat iti dayta a ti nakaparsuaan ket puersa laeng, kunana a ti nakaparsuaan ti “nangdisenio” kadagiti dutdot. Kabaelan kadi ti puersa ti mangdisenio iti bambanag?
Ti “panagdisenio” kaipapananna ti “panagplano (iti banag) nga addaan iti espesipiko a panggep wenno ranta.” (The New Oxford Dictionary of English) Dagiti laeng persona ti makabael nga agdisenio ken agimbento. No kasano nga adda nagan dagiti imbentor, adda met nagan ti Namarsua. Ni Jehova ti nangdisenio iti nakaparsuaan. Isu laeng “ti Kangatuan iti intero a daga,” ken ‘nangparsua iti amin a bambanag.’—Salmo 83:18; Apocalipsis 4:11.
Ania ti masursurotayo iti sangaparsuaan? Kangrunaan nga isurona kadatayo ti maipapan ken Jehova ken dagiti agkakaimbag a galadna, a pakairamanan ti siribna. “Dagiti di makita a kualidadna ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid, ti mismo nga agnanayon a pannakabalin ken kina-Diosna.” (Roma 1:20) Masursurotayo iti nakaparsuaan a nasirsirib ti Dios ngem datayo. No nasaysayaat ti panangdiseniona iti bambanag ngem kadagiti imbentor, saan kadi a nainkalintegan laeng a nasaysayaat met ti balakadna ngem kadagiti mamalbalakad a tattao?
Saan a ti nakaparsuaan ti kangrunaan nga us-usaren ti Dios a mangyallatiw iti balakadna kadatayo. Imbes ketdi, ipapaayna dayta babaen iti Biblia, ti naisurat a Saona. Masarakam iti dayta ti aglaplapusanan a praktikal a kinasirib. Kuna ti Biblia: “Amin a Kasuratan impaltiing ti Dios ken makagunggona.”—2 Timoteo 3:16.
No paginteresam ti maipapan kadagiti imbentor, matakuatamto nga ad-adda a makapainteres ti agsursuro maipapan iti Namarsua. Kas pagarigan, kayatmo la ketdi a maammuan ti sungbat kadagiti saludsod a kas iti: Apay nga agsagsagabatayo ken mataytayo inton agangay? Dayta kadi a talaga ti panggep ti Dios para iti tao? No saan, apay nga ipalpalubosna ti panagsagaba?
Admitirenda man wenno saan, ni Jehova ti nakasursuruan dagiti sientista iti disenioda. Nagadu met ti masursurom iti Namarsua kadatayo. Kas pagarigan, masursurom no kasano nga agbalin a naragsak ti panagasawa, no kasano ti naballigi a panangpadakkel kadagiti annak, no ania ti panggep ti Dios para iti daga, ken nakaad-adu pay a mamagbalin iti biagmo a makapnek. Makatulong kenka ti libro nga Ania a Talaga ti Isursuro ti Biblia? nga impablaak dagiti Saksi ni Jehova, tapno adu ti magunggonam manipud iti Sao ti Dios.