Kontrolem ti Tiempom
“Iti tunggal banag adda naituding a tiempo.”—Eclesiastes 3:1.
TAPNO adda tiempom kadagiti napateg a banag, nasken nga ammom dagita. Nalaklaka daytoy no nalawag iti panunotmo dagiti napateg kenka, dagiti kalatmo, ken dagiti eksakto nga aramidem tapno maragpatmo dagita.
Umuna, nasken ngarud a kabesadom dagiti napateg kenka. Padasem nga isurat ti tunggal mapanunotmo a napateg kenka, kas iti pamilia, pannakigayyem, napinget a panagtrabaho, adal, balligi, nasayaat a langa, kuarta, kinaragsak, panagasawa, kinaimbag, salun-at, ken relihion. Inton naisuratmon, isaludsodmo iti bagim, ‘Ania kadagita ti kapatgan kaniak?’
Kalpasanna, usigem amin a kalat a kayatmo a maragpat iti biag. Ania ti nagdumaan dagiti banag a napateg ken dagiti kalat? Iti daytoy nga artikulo, maikunatayo a dagiti banag a napateg ket agtultuloy, idinto ta dagiti kalat ket mabalin a maragpat iti masanguanan ken agpatingga apaman a naragpatmon dagita.
Ania dagiti kalat a nalabit kayatmo a maragpat? Kayatmo kadi nga ad-adu ti tiempom para iti pamiliam? Makabirok iti ad-adda a maitutop a trabaho? Lumaing iti paboritom a pagesman? Maaddaan iti baro a paglaingan? Patanoren ti maysa a galad? Agbakasion? Agbasa iti libro? Agsurat iti libro?
Sumaganad, ikeddengmo no ania kadagita a kalat ti kapatgan kenka. Siertuem a maitunos dagita kadagiti banag a napateg kenka. Kas pagarigan, no kalatmo ti agbalin a nakabakbaknang idinto ta napateg kenka ti pamiliam, dakkel ti posibilidadna nga agproblemakanto.
Ita, kadagiti kalat nga inkeddengmo, panunotem dagiti aktibidad a makatulong kenka a mangragpat iti tunggal maysa kadagita. Kas pagarigan, no agpakuttong ti maysa kadagiti kalatmo, maragpatmo dayta no agehersisioka.
Kasano a Makatulong Kenka Daytoy a Panangusig?
No dagiti kalatmo ket maitunos kadagiti napateg kenka ken aramidem dagiti aktibidad a makatulong iti panangragpatmo kadagiti kalatmo, adda masnup a direksion ti biagmo. Ad-adunton ti tiempom kadagiti napateg kenka. Siempre, di kaipapanan dayta a dimon ikabilangan dagiti kasapulan ken tarigagay ti sabsabali. (Filipos 2:4) Kaipapananna laeng a nalaklakamon a mailasin ken pagkedkedan dagiti gundaway nga awan pakainaiganda kadagiti banag a talaga a makagunggona.
Awan duadua nga addanto latta dagiti pakaipasanguam a karit. Nalabit adda dagiti banag a saan unay a napateg ngem nasken nga aramidem latta. Mabalin a dagita ti mangibus iti orasmo iti agmalem, isu a bassitton wenno awan pay ketdin ti mabati para iti kapatgan kenka. Mabalin a rumsua dagiti di mapakpakadaan a pasamak. Ken mabalin a madadael ti eskediulmo gapu kadagiti panagbalbaliw ti kasasaad ti biagmo. Ngem no aramidem dagiti praktikal a pamay-an tapno ad-adu ti tiempom iti bambanag a napateg, ad-addanton a makontrolmo ti tiempom ket naragragsakto ti biagmo.
[Kahon/Ladawan iti panid 6]
MAKAINUT KADI ITI TIEMPO DAGITI ELEKTRONIKO A GADYET?
Iti dadduma a tattao, makainut dayta iti tiempo. Ngem iti sabsabali, mangsayang dayta iti panawen. Kas pagarigan, ti personal digital assistant (PDA) ket addaan iti kalendario, listaan dagiti adres ken numero ti telepono, listaan ti agsasaruno nga aramiden, word processor, memo pad, kamera, e-mail, ken Internet. Mabalinmo nga usaren ti kasta nga alikamen tapno makainutka iti tiempo no taginayonem a baro dagiti linaonna nga impormasion ken kanayonmo nga itugot dayta. Nupay kasta, nalaka la a masayang ti tiempom no adu ti di nesesita a basbasaem wenno lukluktam iti dayta, no ti la adda a kudkuditem wenno baliwbaliwam, no gumatangka kadagiti di nesesita nga aksesoria, wenno no itulokmo a ti panagusar iti dayta ti makagapu a mabaybay-am dagiti napateg a relasion wenno responsabilidadmo.
Singasing: Tingitingem a naimbag sakbay a gumatangka. No adda elektroniko a gadyet a pagaammo a masansan nga agpalia, adu ngarud a tiempo ti mabusbos a mangtarimaan iti dayta. Ken makatulong laeng ti aniaman a gadyet depende iti agusar iti dayta. No ngarud addaanka iti kasta, usarem tapno makainut, saan ket a mangsayang iti tiempo.
[Ladawan iti panid 4, 5]
Maiwayaam kadi ti bambanag a napateg?