No Apay a Tinallikudak ti Pagbaknangan a Karera

Kas insalaysay ni Martha Teresa Márquez

PAGAAYATKO ti agkanta. Agkankantaak pay iti radio idi ubingak. Malaksid iti kindergarten, diakon nakapageskuela pay. Ngem idi agangay idiay Mexico City, adda direktor ti symphony orchestra ti pagilian a nangisuro kaniak no kasano a sumayaat pay ti panagkantak.

Idi 1969, iti edadko a 24, inawisnak ti gayyemko a sumasala a maki-audition iti La Rampa Azul a nalatak idi a restawran. Kinantak ti sikat a Cucurrucucú Paloma a pinutar ti Mexicano a kompositor a ni Tomás Méndez, ket nagustuan dayta dagiti agbuybuya. Daydi ti nangrugian ti karerak kas propesional a kumakanta. Limmatakak kas solo a kumakanta babaen iti nagan a Romelia Romel.

Nakipagtrabahoak ken Tomás Méndez, ken iti dadduma a kumakanta ken nalaing a kompositor iti kanta, karamanen da Cuco Sánchez ken Juan Gabriel. Makaparagsak a makita ti naganko kadagiti periodiko, magasin, ken billboard. Nagkantaak kadagiti nightclub, radio, ken nagkonsiertoak pay iti nadumaduma a lugar iti Mexico ken Belize. Nakipagtrabahoak met iti popular a Mexicana a komediante a ni Leonorilda Ochoa idi kabbaro pay laeng ti programana iti telebision iti Mexico.

Idi agangay, agdindinamagakon ken adun ti kuartak isu a kabaelakon ti agbiag a naluho ken maaddaan kadagiti alahas, nangina a kawes, ken agnaed iti nakapimpintas a balay. Kasla adda amin kaniakon ngem saanak a naragsak. Nariknak nga adda kurang iti biagko. Uray napadakkelak kas Romano Katoliko, mabainak a makimisa. Panagriknak ket narugitak unay gapu iti imoral a panagbiagko.

No Kasano nga Inayatko ni Jehova

Bayat ti panagpraktisko para iti umuna a plakak, impudnok ti kaririknak iti gayyemko a ni Lorena Wong, maysa a kumakanta iti ranchera wenno dagiti kanta maipapan iti ayat. Imbagak kenkuana a kayatko ti agmadre ken tumulong kadagiti marigrigat. “Madre? Agbagtitka kadin?” kinunana.

Idi kuan dinamagna: “Ammom kadi ti nagan ti Dios?”

“Ni Apo Jesu-Kristo,” insungbatko.

“Saan, ti naganna ket Jehova,” kinunana. “Ni Jesus ket Anakna.”

“Jehova?” insaludsodko. Daydi ti damo a pannakangngegko iti dayta a nagan. Inikkannak ni Lorena iti Biblia ken inkarina a pasarungkarannak iti Saksi ni Jehova a mangisursuro kenkuana.a

Kada makitak ni Lorena, saludsodek no kaano nga umay ti mangisursuro kenkuana iti Biblia. Kayatko a maammuan ti ad-adu pay maipapan iti Dios.

Kabayatanna, rinugiak a basaen ti Biblia a bukbukodko ket nakitak a talaga a Jehova ti nagan ti Dios. (Salmo 83:18) Nasdaawak. Nabasak met ti Sangapulo a Bilin ket naklaatak iti maysa kadagita a nagkuna: “Dika makikamalala.” (Exodo 20:14) Iti daydi a tiempo, makikabkabbalayak iti maysa a kasado nga ama ti maikadua nga anakko a walo bulan pay laeng. Sabali ti ama ti inauna nga anakko ken dikami nagkasar.

Naminsan, bayat nga agprakpraktisak iti kanta, adda nagtuktok iti ridaw. Dayta ti mangisursuro ken Lorena—ni Mauricio Linares ken ni baketna. Insuroda kaniak ti panggep ti Dios para iti sangatauan ken inikkandak iti libro a Ti Kinapudno a Mangiturong iti Biag nga Awan Inggana.b Naungpotko a binasa dayta iti agpatnag laeng nupay nagpakarigatak kadagiti nauuneg a sasao. Daydi ti tiempo a rinugiakon nga ayaten ni Jehova.

Binalbaliwak ti Kabibiagko

Bayat a tinulongandak dagiti Saksi nga agadal iti Biblia ken mangpasayaat iti panagbasak, naamirisko a masapul a balbaliwak ti kabibiagko tapno maparagsakko ni Jehova. Imbellengko dagiti rebultok, medalion, ken anting-antingko, nupay balitok dagita.

Ngem narigatanak a nangisardeng iti panagsigarilio ken nalabes a panaginum. No lumabasak iti paggatangan iti arak, makain-inumak manen. Nasken nga isardengkon ti makikadua iti amin a gagayyemko agsipud ta painumendak ken awisendak nga aginum ken mangan kadagiti agkakangina a restawran. Ammok a sigurado nga agtungpal dayta iti nalabes a panaginum.

Narigatanak met a mangisardeng iti idadar-ay kadagiti party dagiti nabaknang ken nalatak a tattao. Idi naawisak iti kasangay ti nalatak a boksingero ti Cuba, inkararagko: “Daytoyen ti maudi Apo Jehova. Diakton pulos dumar-ay iti kastoy nga okasion wenno makipaset iti aramid a kaguram.” Tinungpalko dayta.

Nakisinaak iti ama ti maikadua nga anakko nupay nakabakbaknang ken nagadu ti inkarina nga itedna no la ket diak panawan. Narigatanak ta ay-ayatek isuna ken ammona dayta. Sipapangas a kinunana: “Siak ti Diosmo! Siak ti Kristom!”

“Idi,” kinunak, “ngem ni Jehova itan ti Diosko.” Impangtana nga iyadayona kaniak ti anakmi ken dangrannak.

Adda idi dagiti mangibaga a ti panagkanta ket kas met la iti dadduma a trabaho—mabalinko kano a paggiddanen ti kina-Saksi ken panagkanta. Ngem kinuna met ti dadduma: “Awanto ti alad a pannakaproteksionmo iti panagsigarilio, panaginum, ken kadagiti imoral a singasing dagiti fans-mo.” Naamirisko a nainsiriban ti naud-udi a balakad.

Idi nalatakak a kumakanta, adu ti mangted kaniak iti adu a kuarta tapno maalada ti kaykayatda kaniak. Determinadoakon a mangiliklik iti bagik kadagita a sulisog. Isu nga idi 1975, kinanselarko ti kontratak nga agkonsierto idiay China. Kalpasan ti innem a bulan, nabautisaranak kas maysa kadagiti Saksi ni Jehova.

Dagiti Karit ken Rag-o

Kasano a masuportarak ti bagik ken ti pamiliak? Diak nakapageskuela ken awan ti ammok nga aramiden no di agkanta. Nakadepende kaniak ni manangko nga Irma, ti tallo nga annakna, ken ti dua nga annakko. Kasapulanen a panawanmi ti nangina nga apartmentmi ket umakarkamin iti dua a babassit a kuarto. Talaga a karit ta ti naluho a panagbiagmi ket kellaat a rimmigat. Adda idi tiempo nga inumsinak ni manangko ken dagiti annakmi. Pilpilitendak nga itultuloyko ti karerak kas kumakanta ngem desididoak latta a mangaramid iti umiso tapno makapagserbiak ken Jehova.

Rinugiakon nga ilako dagiti agkakangina a sanikuak—dagiti alahasko, kawesko, ken ti kotsek—ket ti naglakuak ti nangalaanmi iti pinagbiagmi. Idi agangay, naibusen ti kuartak. Tapno maliklikanmi ti panangriribuk ti ama ti maikadua nga anakko, immakarkami idi 1981 iti siudad iti sabali a paset ti pagilian bareng dinakami matunton.

Iti daytoy a lugar, sinuruandak dagiti Saksi nga agaramid iti tamales, doughnut, ken dadduma pay a taraon a mailako. Idi agangay, nakastrekak iti paktoria ket nagtrabahoak iti rabii. Ngem naapektaran ti pannakigimongko ken panagserbik iti Dios isu a nagikkatak iti dayta a trabahok ket nagaramidak lattan iti tamales idiay balaymi. Ikabilko kadagiti basket sa ilakok dagita iti kalsada. Kasta ti pangsupsuportak iti bagik iti amin tiempo a ministerio.

Ti Desision a Diak Pulos Nagbabawyan

No damagen kaniak dagiti tattao ti kaririknak iti panangtallikudko iti pagbaknangak a karera kas kumakanta, ibagak kadakuada a diak isukat iti aniaman ti pannakaammok maipapan ken Jehova ken ti pannakaawatko maipapan kadagiti nagsayaat a panggepna. Maragsakanak a makakita iti irarang-ay dagiti annakko iti pannakaammoda iti Biblia, iti panangidedikarda iti biagda ken Jehova, ken iti panangikallaysada iti kapammatian. Ti dua nga annakko ket tultulongan ti assawada tapno mapadakkelda dagiti annakda nga agserbi ken Jehova a Dios.

Dandanin 30 a tawen nga agserserbiak kas payunir, ti pangawag dagiti Saksi ni Jehova kadagidiay mangaskasaba iti amin-tiempo. Iti tulong ti Dios, adun ti natulongak a mangammo kadagiti kinapudno iti Biblia ken mangidedikar iti biagda iti Dios. Karaman kadakuada ni manangko nga Irma ken ti anakna a babai. Makaparagsak no agkikitakami kadagiti “naespirituan nga annakko” ken maammuak nga agtultuloyda nga agbiag maitunos iti kinapudno—ken adu met kadakuada ti agserserbi kas payunir. (3 Juan 4) Ita, iti edad a 64, addaanak iti 18 nga iyad-adalan iti Biblia.

Napennek ti naespirituan a kinakawaw a nariknak idi agtutuboak pay a kumakanta ken natungpal ti tarigagayko a tumulong iti sabsabali babaen ti panagtulnogko iti bilin ni Jesus nga ‘inkayo ken mangaramidkayo iti ad-adalan.’ (Mateo 28:19, 20) Anian a yamanko ta tultulongannak ni Jehova sipud idi agingga ita! Talaga a ‘nananamko ken nakitak nga isu ket naimbag.’—Salmo 34:8.

[Footnotes]

[Ladawan iti panid 25]

Dagiti annak ken mamanugangko, agraman ni manangko a kaduak nga agpaypayunir

[Ladawan iti panid 26]

Agar-aramidak iti tamales ken ilaklakok dagita iti kalsada tapno masuportarak ti amin-tiempo a ministeriok