Nadisenio Kadi?
Ti Payak ti Tuwato
● Adda dagiti tuwato a makapagalindayag iti 30 a segundo a di unay agbaliw ti kangatoda. Apay? Nasayag ngamin dagiti payakda a naiduma iti aniaman a payak a pinartuat dagiti agar-aramid iti eroplano!
Usigem: Nakaing-ingpis ti payak ti tuwato ken addaan kadagiti karenken isu a saan a makulpi dayta. Nadiskobre dagiti sientista a gapu kadagita a karenken, napigpigsa ti puersa ti payakna nga agalindayag. Kuna ti magasin a New Scientist: “Agrikus ngamin ti angin iti nagbabaetan dagiti karenken. Gapuna, naan-annayas ti ilalasat ti angin kadagiti payak isu a laklakaenna ti agtayab.”
Kalpasan nga inadalna ti payak ti tuwato, kastoy ti konklusion ti aerospace engineer a ni Abel Vargas ken dagiti katrabahuanna: “Ti disenio dagiti natural a payak ket makatulong unay iti pannakadisenio dagiti nagbabassit nga alikamen a makatayab.” No makabitan iti kamera wenno dadduma pay nga aparato, adu ti pakausaran dagiti kasta a babassit nga alikamen, kas koma iti panangkalap iti impormasion kadagiti lugar a nadidigra, ken panangmonitor iti kakaro ti polusion.
Ania ti makunam? Naiparna la kadi a timmaud ti nakaing-ingpis ken addaan karenken a payak ti tuwato? Wenno nadisenio dayta?
[Ladawan iti panid 25]
Ti “dragonfly microdrone” (bassit nga alikamen a makatayab) nga agdagsen iti 120 miligramo (.004 onsa), agakaba iti 6 a sentimetro (2.4 pulgada), addaan iti nakaing-ingpis a payak a naaramid iti silicon, ken makapagpayakpak no masuplayan iti koriente
[Credit Line]
© Philippe Psaila/Photo Researchers, Inc.