“Nalabit Maysa Laeng a Kanta”

● Ni nana Juliana ket madungdungngo a Kristiano a baket a taga-Pilipinas. Isu ket naaddaan iti Alzheimer’s disease. Dina payen malasin dagiti mismo nga annakna. Ngem sarungkarak latta isuna no addaak iti lugarda.

Naidaliten ni nana Juliana ken masansan a nakamuttaleng lattan iti tawa. Maladingitanak a makakita iti kasasaadna ta dinak pay malagipen. Minulenglengannak ngem awan ti pakakitaan a mailasinnak. “Mapampanunotyo kadi pay ni Jehova?” dinamagko. Inestoriaak ken nagsalsaludsodak pay ngem awan latta ti reaksionna. Idi kuan, nagkantaak ket makaparagsak unay ti simmaganad a napasamak!

Kinitanak ket nangrugin a nakipagkanta kaniak! Ngem nagsardengak ta diak unay kabesado ti liriko ti kanta iti Tagalog. Ngem intultuloy ni nana Juliana ti nagkanta. Naileppasna ti intero a kanta. Dagus a kiniddawko iti kaduak a bumulod iti songbook iti kaarruba a Saksi. Alisto met a nakabulod. Diak ammo ti numero ti kanta ngem naiparna a naukradko ti eksakto a panid! Isu a duakamin a nangkansion iti intero a kanta! Idi dinamagko no addada pay sabali nga ammona, kinansionna ti maysa a kadaanan a Tagalog a kanta maipapan ken ayat.

Kinunak, “Nana, saan a dagiti kanta iti radio no di ket dagiti kantatayo idiay Kingdom Hall.”a Kalpasanna, nagkantaak iti sabali pay iti songbook, ket dagus a nakidanggay kaniak. Agminar kadagiti matana ti ragsakna. Saanen a nakamuttaleng ken inggat’ lapayagen ti isemna.

Nangngeg dagiti kaarruba ti panagkankantami isu nga immayda immaribungbong iti tawa. Makaparagsak a makita ti epekto ti musika iti puso ni nana Juliana! Dayta ti nangipalagip kenkuana kadagiti liriko ti kanta.

Adda naadalko iti daytoy a kapadasan. Ditay ammo no ania ti mabalin a mangabbukay kadagidiay saan unayen a makaawat wenno makakomunikar. Nalabit maysa laeng a kanta.

Di nagbayag kalpasan dayta, natay ni nana Juliana. Naipalagip kaniak dayta a kapadasak bayat a dumdumngegak kadagiti baro a kanta nga inruar dagiti Saksi ni Jehova idi 2009. Mabalinmo ti agdamag kadagiti kalugaram a Saksi no kasanoka a maaddaan kadagitoy a nagpipintas ken makaabbukay a kanta.

[Footnote]