Panangmatmat iti Lubong
Sigun iti maysa a surbey, ti agarup 10.3% kadagiti makidendennan a taga-Brazil a lallaki nga agedad iti 15 agingga iti 64 ket nakidennadan iti maysa wenno ad-adu pay a naam-ammoda iti Internet bayat ti napalabas a 12 a bulan.—BRAZILIAN MINISTRY OF HEALTH.
Ti Taaw Artico ket nabayagen a naaplagan iti natuontuon a dadakkel a yelo nga agingga iti 80 a metro ti kabengbengda. Ita, dagita a “naurnong a yelo iti unos ti adu a tawen . . . ket dandanin interamente a marunaw. Gapu iti daytoy a karkarna a panagbalbaliw, nalaklakan ti mangaramid iti ruta dagiti barko nga agturong kadagiti rehion iti Artico.”—REUTERS NEWS SERVICE, CANADA.
Inyanunsion ti Moscow ken ti Vatican ti naan-anay a diplomatiko a relasionda a dua.—RIA NOVOSTI, RUSSIA.
Iti Kilimanjaro a kangatuan a bantay iti Africa, “narunawen ti 26% a niebena sipud idi 2000 agingga idi 2007.”—DAILY NATION, KENYA.
Panagimbubukod ken Depresion
Sigun kadagiti managsirarak, ti Britania “ti kangrunaan a managimbubukodan a kagimongan iti lubong. Ipangpangrunada ti bagida imbes a ti sabsabali,” kuna ti Daily Telegraph idiay London. Natakuatan pay ti sabali a panagadal nga agsagsagaba dagiti Briton iti dadduma kadagiti kakaruan a kita ti depression ken panagdanag. Patien ti dadduma nga eksperto nga adda pakainaigan dayta iti panagbalinda a managimbubukod. Dagiti kagimongan iti Makinlaud a pagpagilian ket naidilig kadagiti adda iti China ken Taiwan. Kadagiti kagimongan iti China ken Taiwan, ad-adda a maipangpangruna ti panagkaykaysa ti kagimongan imbes a ti bukod a pagayatan. Kasla dayta ti makagapu a dida unay agsagaba iti depresion. Iti Laud, ti “managimbubukodan a kagimongan . . . ti pakaigapuan ti depresion,” kuna ti Telegraph.
Kasar Dagiti Homoseksual Idiay Sweden
Idi Oktubre 2009, ti Lutheran Church of Sweden impalubosnan ti panagkasar dagiti homoseksual iti uneg ti simbaan. Sumagmamano a bulan sakbay dayta, adda linteg nga impaulog ti parliamento ti Sweden a maipalubosen ti panagkasar dagiti homoseksual. Dayta ti nakaibatayan ti desision ti simbaan. “Kaipapanan daytoy a kadagiti kangrunaan a relihion iti lubong, ti Church of Sweden ti maysa kadagiti kaunaan a simiasi iti nabayagen a panangmatmat iti panagasawa kas panagtipon ti lalaki ken babai,” kuna ti diario a Dagens Nyheter.
Ania a Lenguahe ti Sangit Dagiti Ubbing?
Dua pay la nga aldaw dagiti maladaga, agsangitdan sigun iti bengngat ti lenguaheda, kuna dagiti managsirarak iti Würzburg University idiay Germany. Inrekord dagiti managsirarak ti sangit ti kappasngay a 30 a French ken 30 a German. Inusigda ti kapartak, tono, ken kasinggit dagita. Nabangag sa suminggit ti sangit dagiti maladaga a French idinto ta nasinggit sa bumangag ti sangit dagiti maladaga a German. Ti sangitda ket kapada ti tono ti lenguahe ti nagannakda. Patien ngarud dagiti managsirarak a bayat a maisiksikog ti maladaga, makasursuron dayta iti lenguahe ket mangrugin a makikomunikar babaen iti dayta kadagiti damo a panagsangitna.