“Nasaknap a Kinaawan Panagtalek”

Idiay Makinlaud nga Africa, nayospital ti 12 anyos a barito a biktima ti peke nga agas ti malaria. Nagatang daytoy ni nanangna iti lisensiado a botika. “Kinse a tawenen nga adda dagiti mataktakuatanmi a mailaklako a peke nga agas,” kuna ti maysa a doktor iti ospital.a

Iti Asia, naklaat dagiti nagannak idi naammuanda a naglaon gayam iti makasabidong a substansia ti impagarupda a nasustansia a gatas nga ipaspasusoda iti kappasngay nga anakda. Nakalkaldaang ta natay ti maladaga.

Adda mapagtalkan nga Amerikano a negosiante a nangsuitik kadagiti klientena tapno makagun-od kadakuada iti binilion a doliar! Natakuatan ti rinibu a tattao a basta lattan naawan dagiti pensionda gapu iti inawaganda a “kakaruan a panagsuitik iti daytoy a siglo.”

ITI lubong ita, dandani napadasanen ti amin a tao ti nasuitik. Uray ti sangalubongan a krisis iti ekonomia ket kangrunaan a resulta ti inawagan ti Pranses a diario a Le Monde kas “nasaknap a kinaawan panagtalek.”

Ania dagiti makagapu iti “kinaawan panagtalek” ita? Adda pay kadi mabalinmo a pagtalkan?

[Footnote]