Ti Panangmatmat ti Biblia

Ti Dios—Pudno Kadi a Persona?

GAPU ta masmasdaawda iti nakaparsuaan, kapilitan a mamati ti adu a tattao iti maysa a dios wenno puersa a nabilbileg ngem iti tao. Pagsidsiddaawam kadi ti kinakomplikado ti uniberso, ti makapaamanga a bambanag ditoy daga, ken ti komplikado a disenio ti bagitayo?

No wen, nalabit mamatika met iti kaadda ti nadiosan a pannakabalin. Isursuro ti dadduma a relihion a dayta ket agnanaed iti kabambantayan, kaykayo, tangatang, ken dadduma pay a paset ti uniberso. Sigun iti sabsabali, dagiti naimbag ken dakes nga espiritu dagiti inapo ket nagtitipon a misterioso a puersa. Dagita kanon ti mangbukel iti Kangatuan a Persona—ti Dios!

Aniaman kadagita, patien ti kaaduan a daytoy nabilbileg ngem tao a puersa ket awanan iti personalidad. Saan a patien ti dadduma a ti Dios ket addaan iti panunot, rikna, panggep, ken tarigagay. Pudno kadi a persona ti Dios? Adda nalawag a sungbat ti Biblia—a maysa kadagiti kabayaganen a sagrado a libro a magun-odanen iti intero a lubong.

Ti Personalidad ti Tao Ipalgakna no Ania a Talaga ti Dios

Isursuro ti Biblia a ti tao ket naparsua a mangiparangarang kadagiti galad ti Dios. Kuna ti Genesis 1:27 a ti “Dios pinarsuana dagiti tattao, nga inaramidna ida nga umasping kenkuana.”—Today’s English Version.

Nalawag a dagita a sasao dina kaipapanan a dagiti immuna a tao ket eksakto a kalanglanga ti Dios. Sigun iti Biblia, ti Dios ket maysa a di makita nga espiritu, idinto ta dagiti tattao ket naaramid kadagiti makita nga elemento ditoy daga. (Genesis 2:7; Juan 4:24) Malaksid iti dayta a nagdumaan ti Dios ken tattao, maammuantayo no ania a talaga ti Dios no usigentayo dagiti galad ti tao.

Addaan dagiti tattao iti abilidad a mangusar iti pannakabalinda ken mangaramid kadagiti umiso ken inggagara a tignay. Dagita ket mabalin a resulta dagiti galad a kas iti kinaasi, kinahustisia, abilidad nga agpanunot, ken praktikal a kinasirib. Makarikna dagiti tattao iti kinadungngo, gura, ken pungtot. Adda bassit nagdudumaantayo gapu iti agsasabali a kombinasion dagita a rikna. Wen, adda naisangsangayan a personalidad ti tunggal maysa kadatayo. Dagiti tattao ket persona.

Nainkalintegan kadi a parsuaennatayo ti Dios kas komplikado a persona no isu a mismo ket maysa laeng a puersa nga agalla-alla iti lubong dagiti espiritu? No dagiti tattao ket naaramid iti ladawan ti Dios, adu ngarud ti pagpadaan ti personalidad ti tao ken personalidad ti Dios. Usigem dagiti sumaganad.

Adda personal a nagan ti Dios. Kuna ti Biblia iti Isaias 42:8: “Siak ni Jehova. Dayta ti naganko.” Kayat ti Dios a maipakaammo ti naganna. Kuna pay ti Biblia: “Agbalin koma a bendito ti nagan ni Jehova manipuden ita ken agingga iti tiempo a di nakedngan. Manipud iti ileleggak ti init agingga iti ilelennekna ti nagan ni Jehova maidaydayaw.” (Salmo 113:2, 3) No ngarud dagiti agdaydayaw iti Dios masansan nga usarenda ti naganna, ibilbilangda isuna kas persona.

Naisalsalumina ti Dios. Isursuro ti Biblia a ti Dios ket talaga a naisalsalumina. (1 Corinto 8:5, 6) “Dayta ti makagapu a pudno a naindaklanka, O Soberano nga Apo Jehova; ta awan sabali nga umasping kenka,” kuna ti Biblia. (2 Samuel 7:22) Iti Biblia, nadeskribir pay ni Jehova kas “ti pudno a Dios iti langlangit sadi ngato ken iti daga ditoy baba. Awanen ti sabali.”—Deuteronomio 4:39.

Ni Jehova a Dios kagurana ti kinadakes. Persona laeng ti makarikna iti gura. Kuna ti Biblia kadatayo a ti Namarsua kagurana dagiti banag a kas iti “napalalo a matmata, ulbod a dila, ken im-ima nga agibukbukbok iti awanan basol a dara, puso a mangparpartuat kadagiti makapasakit a gandat, saksaka nga agdardaras a tumaray nga agturong iti kinadakes, ulbod a saksi nga agyesngaw kadagiti kinaulbod, ken asinoman a mangparnuay kadagiti rinnupir iti nagtetengngaan dagiti agkakabsat.” (Proverbio 6:16-19) Imutektekam met ta karimon ti Dios dagiti kababalin ti tao a makapasakit iti sabsabali. Maammuantayo ngarud a maseknan ti Dios iti pagimbagantayo ken kagurana dagiti banag a makadangran kadatayo.

Ni Jehova ket managayat a Dios. Ilawlawag ti Biblia a ti Dios ay-ayatenna unay “dagiti tattao iti daytoy a lubong.” (Juan 3:16, Contemporary English Version) Deskribiren pay dayta a ti Dios ket nadungngo nga ama a kayatna ti kasayaatan para kadagiti tattao nga annakna. (Isaias 64:8) Adu a bendision ti masagrap dagiti tattao no bigbigenda ti saad ti Dios kas ti naayat nga Amada.

Mabalinmo ti Makigayyem iti Dios

Nalawag nga isursuro ti Biblia a ti Namarsua ket maysa a persona nga addaan iti nagan ken personalidad. Ti Dios ket addaan iti abilidad a mangusar iti pannakabalinna ken mangaramid kadagiti umiso ken inggagara a tignay a resulta dagiti natan-ok a galad a kas iti kinaasi, kinahustisia, ken kinasirib. Saan nga adayo wenno di maasitgan. Kastoy ketdi ti kinunana: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”—Isaias 41:13.

Adda panggep ti Dios para iti sangatauan. Kuna ti Biblia: “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Yantangay ammotayo a ni Jehova ket naisalsalumina ken addaan iti naisangsangayan a pakabigbigan, nalaklakan ti makisinninged kenkuana ken agsagrap kadagiti bendision nga ipaayna kadagidiay agbalin a gagayyemna.—Deuteronomio 6:4, 5; 1 Pedro 5:6, 7.

NAPANUNOTMO KADIN?

● Adda kadi personal a nagan ti Dios?—Isaias 42:8.

● Adu kadi ti dios?—1 Corinto 8:5, 6.

● Mabalin kadi a makisinninged dagiti tattao iti pudno a Dios?—1 Pedro 5:6, 7.

[Ladawan iti panid 29]

Parsuaennatayo ngata ti Dios kas komplikado a persona no isu a mismo ket maysa la a puersa?