Nadisenio Kadi?

Ti Naannayas a Panaglangoy ti Salmon

● Tapno makapagpaaduda, adu a kita ti salmon ti agpasurong a sumuba iti naapres nga ayus. Kasanoda a mabaelan ti narigat a panagdaliasat a dida mapaksuyan? Imbes nga agpaatiwda iti naapres a danum, gundawayanda ketdi dayta. Kasano?

Usigem: Saan a puersaen ti salmon a langoyen ti naapres a danum. Laklakaenna ketdi ti agpasurong ta gundawayanna dagiti babassit nga alikuno a mapataud no ti ayus ket maitupar iti batbato, sangsanga, wenno dadduma pay a banag. Gapu ta agalikuno iti agsumbangir a sikigan ti maysa a banag, agkinnikinni ti salmon iti nagbabaetan dagiti alikuno isu a maiduron nga agpasurong. (Kitaem ti ladawan.) Dadduma a grupo dagiti ikan gundawayanda ti agpaiduron kadagiti alikuno a napataud dagiti ikan a sarsarunuenda ken uray iti mismo nga alikuno a pataudenda!

Kayat nga ipakat dagiti managsirarak ti naadalda iti naannayas a panaglangoy dagiti salmon tapno makapataudda iti enerhia manipud iti danum a saan unay a napegges ti ayusna. Dagiti gagangay a makina a maus-usar a pagpataud iti enerhia manipud iti danum ket kadawyanna a makapataud laeng iti koriente no agarup 9.3 a kilometro kada oras ti ayus ti danum wenno napegpegges pay. Ita, addan naimbento a makina (a paandaren dagiti alikuno) a makapataud iti koriente manipud iti danum nga agay-ayus iti kapegges a 3.7 a kilometro laeng kada oras.a Ngem awan kaimudingan dayta a teknolohia no idilig iti kinasiglat ti salmon. Inadmitir ni Propesor Michael Bernitsas iti University of Michigan, U.S.A.: “Nalalaing pay la ita dagiti ikan ngem dakami.”

Ania ti makunam? Naiparna la kadi ti kinalaing ti salmon a mangusar iti enerhia manipud iti alikuno ti danum? Wenno nadisenio dayta?

[Footnote]

[Picture Credit Line iti panid 25]

Ngato: © photolibrary. All rights reserved.