Ti Problema iti Relihion

NO TI relihion ti kangrunaan a makagapu iti amin a panaggiginnura, kayat ngarud a sawen dayta a manmano ti gubat no awan ti relihion. Nainkalintegan kadi ti kasta nga argumento? Mapukaw ngata ti gubat babaen laeng ti panangpukaw iti relihion? Aniaman ti sungbatmo, daytoy ti di mailibak a kinapudno: Ti relihion dina napagkaykaysa ti sangatauan. Usigem ti sumagmamano a makagapu a pudno dayta.

Pinagsisina ti Relihion

Ti sangatauan ket pinagsisina ti relihion. Kanayon nga agririnnisiris dagiti kangrunaan a relihion. Adda kadi pamatiantayo a dumtengto ti tiempo a sitatalna a makapagkakadua dagiti Budista, Hindu, Judio, Kristiano, ken Muslim?

Makapaladingit met ti mapaspasamak a panagsisina iti uneg a mismo ti tunggal maysa kadagita a kangrunaan a relihion. Kas pagarigan, sigun iti maysa a pattapatta, ti Kakristianuan ket nabingaybingay iti nasurok a 30,000 a sekta. Nabingaybingay met ti Islam gapu iti nagduduma a patpatienda. Sigun iti maysa nga ahensia ti media idiay Makintengnga a Daya, nabiit pay nga inamin ti Muslim nga eskolar a ni Mohsen Hojjat a ti “di panagkaykaysa dagiti Muslim ti ramut dagiti problema kadagiti Muslim a pagilian.” Ti dadduma pay a napigsa ti impluensiana a relihion a kas iti Budismo, Hinduismo, ken Judaismo ket nasinasina met iti adu nga agkokontra a sekta.

Pannakinamin ti Relihion iti Politika

Kasla adda impluensia ti relihion iti dandani amin a paset ti biag ti tao. Sigun iti periodiko a The Economist, “nabulbulos itan dagiti tattao a mangyebkas kadagiti narelihiosuan a patpatienda iti amin a tay-ak, agraman iti negosio ken ekonomia.” Gapuna, agsisina ti tattao imbes nga agkaykaysada. Ngem ti nakarkaro pay nga impluensia ket adda nakainaiganna iti nabayagen a pannakinamin ti relihion iti politika.

Iti nabiit pay a damag a nadakamat iti kalkalpas nga artikulo, kinuna ti maysa a grupo dagiti historiador a “relihion ti ad-adda a pakaigapuan ti gubat no nasinged unay ti relihion ken gobierno.” Ipakita dayta ti maysa pay a di mailibak a kinapudno: Sipud idi agingga ita, nairut ti pannakaisinggalut ti relihion iti politika ken militar.

Nakapegpeggad a Panagtipon

Iti adu a pagilian, dagiti kangrunaan a relihion ti nagbalin a simbolo ti panagayat iti nasion ken puli. Gapu iti dayta, dandani saanen a mapaggigidiat ti panaggiginnura dagiti di agkakailian, panangidumduma iti puli, panagririri dagiti tribu, ken panagaapa dagiti relihion. Daytoy napeggad a panaglaok ti relihion ken politika ket umdas a mamagsisina iti lubongtayo.

Ti adatna, kaaduan a relihion ti agkunkuna nga ireprepresentarda kano ti Namarsua, ti Dios iti Biblia. Nainkalintegan kadi a ti mannakabalin-amin, kasisiriban, ken naayat a Namarsua ket nainaig kadagiti relihion a mamagsisina ken nakabasol iti panangibukbok iti dara?

[Ladawan iti panid 6]

Rinibu a Saksi ni Jehova ti maibalbalud gapu ta inkeddengda ti agbalin a neutral