Siasino a Talaga ti Adda iti Likudan ti Okulto?

KUNA ti Biblia maipapan iti Namarsua kadatayo: “Ti Dios ket silaw ken awan a pulos ti sipnget a naikaykaysa kenkuana.” (1 Juan 1:5) Nangruna a pudno dayta iti naespirituan nga anag. No kasta, ti Dios kadi ti pannakabalin nga adda iti likudan ti okulto? Wenno adda nainaig a dakes nga espiritu?

Ti kangrunaan a paset ti okulto ket panagpadles ken espiritismo. Karaman iti dayta ti astrolohia, numerolohia, orasion, panagpalad, panagkulam, ken pannakisarita kadagiti “natay.” Kalkala pay a maar-aramid dagita. Kaaduan ket sipud pay idi panawen ti nagkauna a Babilonia, a rebrebbana laengen ti masarakan idiay Iraq. (Isaias 47:1, 12, 13) Manipud Babilonia, simmaknap ti okultismo iti intero a lubong idi un-unana ken naibinggasen iti adu a kultura ken sibilisasion.

Usigem ti napasamak iti siudad ti Filipos iti nagkauna a Macedonia. Ti bassit a grupo ti Kristiano sadiay, a pakairamanan ni apostol Pablo ken ti mangngagas a ni Lucas, ket nakasabat iti balasitang nga addaan iti naokultuan a pannakabalin. Paliiwem no kasano nga impalgak ni Lucas a mannurat iti Biblia ti gubuayan ti pannakabalin ti balasitang. Insuratna: “Maysa nga adipen a babai nga addaan espiritu, maysa a sairo iti panagpadles, ti simmabat kadakami. Ipapaayanna idi dagiti appona iti adu a magunggona babaen ti panangannurot iti arte ti panagpadles.”—Aramid 16:16-18.

Maysa ngarud a sairo, wenno dakes nga espiritu, ti nagtaudan ti pannakabalin ti balasitang, saan nga iti pudno a Dios a ni Jehova. Gapu iti dayta, ti balasitang ket di inkankano ni Pablo ken ti kakaduana. Nalabit pampanunotemon: ‘Siasino dagiti sairo wenno demonio? Ken nagtaudanda?’ Paliiwem manen dagiti sungbat ti Biblia.

Siasino Dagiti Demonio?

Nabayagen sakbay a ni Jehova a Dios inaramidna dagiti tattao, pinarsuana ti di mabilang nga intelihente nga espiritu nga ‘annakna’ idiay langit. (Job 38:4, 7) Kas kadagiti tattao, adda wayawayada a mangngeddeng, ket iti nabayag a tiempo, nasungdoda amin kenkuana. Ngem kellaat a nagbaliw ti kasasaad. Kasano?

Kalpasan a pinarsua ti Dios dagiti tattao, adda espiritu a parsua a nangtarigagay iti banag a dina pakaikarian—isu ket mapagdaydayawan. Kas iti ventriloquist nga agus-usar iti puppet, nagusar daytoy dakes nga anghel iti serpiente a panggargarina iti kaunaan a babai, ni Eva, a sumukir iti Namarsua kenkuana. (Genesis 3:1-6) Awagan ti Biblia dayta rebelioso nga anghel kas “kadaanan a serpiente, daydiay naawagan iti Diablo ken Satanas.” (Apocalipsis 12:9) Ni Jesus dineskribirna ni Satanas kas “mammapatay” a “saan a nagtakder a di maisin iti kinapudno,” sana innayon: “No sawenna ti ulbod, agsao a maitunos iti bukodna a pagannayasan, agsipud ta isu maysa a managulbod ken ti ama ti kinaulbod.”—Juan 8:44.

Dimteng ti tiempo a kimmadua ken Satanas iti panagrebeldena ti dadduma pay nga “annak ti pudno a Dios.” (Genesis 6:1, 2) Natukoyda kas dagiti “anghel a nagbasol” ken “dagiti anghel a saan a nangtaginayon iti nakaisigudan a kasasaadda no di ket pinanawanda ti bukodda nga umiso a lugar a pagnaedan,” wenno ti naituding nga ayanda idiay langit. (2 Pedro 2:4; Judas 6) Idi agangay, naawagandan iti “sairo” wenno demonio. (Santiago 2:19) Kas iti inaramidda iti adu nga Israelita idi panawen ti Biblia, determinadoda met a pagtallikuden iti pudno a panagdaydayaw ti kaaduan a tattao inggat’ kabaelanda. (Deuteronomio 32:16, 17) Kas iti napalabas, dagiti narelihiosuan a kinaulbod ti sisisikap nga us-usaren ita ni Satanas ken dagiti demoniona.—2 Co 11:14, 15.

Salaknibam ta Bagim!

Nupay addaan dagiti dakes nga espiritu iti pannakabalin nga awan iti tao, kabaelantayo ti ‘agtakder a bumusor kadakuada’ ken agballigi babaen iti tulong ti Dios. (1 Pedro 5:9) Ngem tapno magun-odantayo dayta a tulong, nasken nga ammuentayo dagiti kalikaguman ti Dios ken iyaplikartayo dagita. Maipapan kadagiti Kristiano idi kaaldawanna, insurat ni apostol Pablo: “Saankami a namingga a mangikarkararag kadakayo ken agdawdawat tapno mapnokayo koma iti umiso a pannakaammo iti pagayatanna iti isuamin a sirib ken naespirituan a pannakaawat, tapno magnakayo a maikari ken Jehova iti panggep a panangay-ayo a naan-anay kenkuana.”—Colosas 1:9, 10.

Ti adu a tattao iti siudad ti Efeso a mangan-annurot iti okultismo ket karaman kadagiti nakagun-od iti dayta nga “umiso a pannakaammo.” Kitaem ti inaramidda idi naammuanda ti kinapudno. Kuna ti Biblia: “Adu kadagidiay nangan-annurot kadagiti arte ti panagsalamangka inyegda a pinagkaykaysa dagiti libroda ket pinuoranda ida iti sanguanan ti isuamin.” Nagdakkel ti gatad dagita a libro—“limapulo ribu a kapisi ti pirak”! (Aramid 19:17-19) Naisurat ti mapagwadan a kinaturedda tapno magunggonaantayo.—2 Timoteo 3:16.

Dagiti Prinsipio a Mangsalaknib

Adda pay dagiti maaramidantayo tapno masalakniban ti bagitayo maibusor kadagiti demonio. Usigem dagiti sumaganad a pagannurotan ti Biblia.

“Saanyo a patien ti tunggal naipaltiing nga ebkas, no di ket subokenyo dagiti naipaltiing nga ebkas tapno makitayo no nagtaudda iti Dios.” (1 Juan 4:1) Mabalin nga agpayso ti dadduma nga ibagbaga dagiti astrologo, psychic, espiritista, ken baglan. Kas pagarigan, agpayso ti kinuna ti balasitang a naluganan iti demonio idiay Filipos maipapan iti grupo ni Pablo: “Dagitoy a tattao ad-adipen ida ti Kangatuan a Dios, isuda a mangibumbunannag kadakayo ti dalan ti pannakaisalakan.” (Aramid 16:17) Nupay kasta, isu ket saan nga inawat ni Pablo ken ti kakaduana. Pinaruar ketdi ni Pablo ti dakes nga espiritu a limmugan iti balasitang. Tapno maammuam no umiso ti isursuro dagiti relihion, idiligmo dagita iti ibagbaga ti Biblia.—Aramid 17:11.

“Ngarud, agpasakupkayo iti Dios; ngem busorenyo ti Diablo, ket isu agtalawto kadakayo.” (Santiago 4:7) Dagiti demonio ket kabusor ti Dios. Kabusormo met ida. Dika ngarud koma agusioso iti dakes nga ar-aramidda. Agpasakupka ketdi iti Dios babaen ti panangtungpalmo kadagiti naayat a bilinna. Saan a makapadagsen dayta. (1 Juan 5:3) Kas pagarigan, kinuna ti Dios iti nagkauna a nasion ti Israel: “Awan koma ti masarakan kenka nga asinoman a . . . mangaramat iti panagpadles, maysa a managsalamangka wenno asinoman nga agsapul kadagiti partaan wenno maysa a mangkukulam, wenno maysa a mangkayaw iti sabsabali babaen ti pagilabeg wenno asinoman nga umuman iti mannakiuman iti espiritu wenno maysa a propesional a managipadles kadagiti pasamak wenno asinoman nga agimtuod iti natay. Ta isuamin nga agar-aramid kadagitoy a banag ket nakarimrimon ken Jehova.” (Deuteronomio 18:10-12) Saan a nagbaliw ti panangmatmat ti Dios.—Galacia 5:19, 20.

“Awan ti dakes a pagilabeg maibusor [kadagiti agserserbi ken Jehova].” (Numeros 23:23) Dagiti demonio ket di rumbeng a pagbutngan ti amin a mayat a mangparagsak ken Jehova. Kinapudnona, ‘agpigerger’ dagita a dakes nga espiritu iti sanguanan ti Dios ta ammoda nga awan ti makasarked iti pannakabalinna a pangdadaelnanto kadakuada. (Santiago 2:19) Ti Dios “ipakitana ti pigsana maigapu kadagidiay a ti pusoda naan-anay kenkuana,” ken “saannanto a pulos ipalubos nga agdiwengdiweng daydiay nalinteg.”—2 Cronicas 16:9; Salmo 55:22.

“Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” (Eclesiastes 9:5) Isursuro ti Sao ti Dios a dagiti natay ket talaga a natay! Saan ida a rumbeng a pagbutngan ta dida kabaelan a dangran ti asinoman. (Isaias 26:14) Tapno maallilawda ti tattao, agpammarang no dadduma dagiti demonio kas espiritu dagiti natay. Mabalin a dayta ti makagapu a madlaw dagiti tattao a ti “espiritu” ti sigud a nasingpet a tao ket naiduman iti daydiay dati nga am-ammoda.

“Dikay mabalin ti makiraman iti ‘lamisaan ni Jehova’ ken iti lamisaan dagiti sairo.” (1 Co 10:21, 22) Amin a pudpudno nga agayat ken Jehova adaywanda dagiti libro, pelikula, ken computer game a nainaig iti okulto wenno mangitampok iti naokultuan nga aramid ken sursuro.a Kuna ti Salmo 101:3: “Saankonto nga isaad iti sanguanan dagiti matak ti aniaman a banag nga awan kaes-eskanna.” Malaksid iti dayta, dagiti naokultuan a paglinglingayan masansan nga itampokda ti kinaranggas ken imoralidad a kagura dagiti “managayat ken Jehova.”—Salmo 97:10.

Kanayon nga ikagkagumaan dagiti demonio nga ilemmeng ti pudno a kinasiasinoda kadagiti tattao. Ngem dida naan-anay nga agballigi. Babaen iti Biblia, ibutbutaktak ni Jehova ti pudno a kinasiasinoda—naulpitda a managulbod ken nakadakdakes a kabusor ti sangatauan. Naidumada unay iti Namarsua kadatayo a ni Jehova a Dios! Kas ipakita ti sumaganad nga artikulo, ay-ayatennatayo, kanayon nga ibagbagana kadatayo ti kinapudno, ken kayatna nga agbiagtayo a naragsak iti agnanayon.—Juan 3:16; 17:17.

[Footnote]