Mapasayaatmo ti Salun-atmo

KANAYON nga okupado ni Rustam a taga-Russia. Adda dagiti bisiona idi ngem ap-apitennan ti dakes a bunga dagita. Insardengnan ti agsigarilio ken aginum iti adu nga arak. Kaskasdi, gapu ta agmalmalem a nakasango iti kompiuter, kanayon latta nga aglaladut.

Nupay mangrugi nga agtrabaho ni Rustam iti alas otso ti agsapa, sa la naan-anay a mamurmurayan inton alas dies. Masansan met nga agsakit isu a binaliwanna ti rutinana. Ania ti resultana? “Iti napalabas a pito a tawen, diak pay nagsakit iti nasurok a dua nga aldaw iti makatawen,” kinunana. “Nagsayaat ti panagriknak—nasarantaak, alertoak, ken naragsakak!”

Ni Ram, ni baketna, ken ti dua a balasitangda ket agnanaed idiay Nepal. Narugit ti aglawlawda sa nakaad-adu ti lamok ken ngilaw. Masansan idi nga agsagaba ni Ram ken ti pamiliana kadagiti sakit iti aangsan ken impeksion iti mata. Nangaramidda met iti panagbalbaliw isu a dakkel ti simmayaatan ti salun-atda.

Aywanam ti Salun-atmo!

Nabaknangda man wenno napanglaw, adu ti di makaamiris nga adda pakainaigan dagiti bisioda iti salun-atda. Mabalin nga ibilangda a ti kinasalun-at ket naiparna laeng wenno saanda unay kabaelan a kontrolen. Gapuna, didan ikagumaan a pasayaaten ti salun-at ken kabibiagda.

Kinapudnona, nabaknangka man wenno marigrigat, adda dagiti simple a maaramidam tapno masalaknibam ken mapasayaatmo ti salun-atyo a sangapamiliaan. Makagunggona kadi ti kasta a panagregget? Wen! Mapasayaatmo ti kalidad ti biagmo ken mapaatiddogmo dayta.

Babaen ti sao ken aramid, maisuro ti nagannak kadagiti annakda dagiti naimbag nga ugali tapno nasalsalun-atda. Di masayang ti tiempo ken gastos ta maksayan ti panagsagaba, pannakaidalit, ken kuarta a mabusbos iti panagsakit ken panagpaagas. Kas kuna ti nabayagen a pagsasao, Naim-imbag ti agsakbay ngem ti magabay.

Kadagiti sumaganad nga artikulo, usigentayo ti lima a simple a pamay-an a nakatulongen kada Rustam, Ram, ken dadduma pay. Makatulong met kenka dagita!