Naragsakak ta Nagbalinak a Pastor

Kas Insalaysay ni Alymbek Bekmanov

Tallo pay la ti tawenko idi mangrugiak nga agaywan iti karnero ket nagustuak dayta. Idi agtawenak iti 17, nalaingakon a pastor. Idi agangay, nasursurok ti maipapan iti sabali a kita ti pastor—daydiay pastor ti tattao. Palubosandak a mangilawlawag no apay a naragragsakak iti kasta a panagserbi.

NAIPASNGAYAK idi 1972. Ti dakkel a pamiliami a Kirghiz ket agnanaed iti bario ti Chyrpykty, iti igid ti napintas a danaw ti Issyk Kul. Ti aglawlaw ti danaw ket nalatak a pagpasiaran dagiti turista iti Kyrgyzstan, a dati a republika ti Soviet Union. Ita, agnanaedkamin ken ni baketko a Gulmira iti Bishkek, a kabesera a siudad ti Kyrgyzstan, agarup 200 a kilometro manipud iti dimmakkelak a lugar.

Pastor ken Dagiti Karnero

Idi ubingak, ipanmi dagiti karnero kadagiti pagaraban iti nangato a bantay bayat ti primabera. Sumagmamano nga aldaw a sumang-atkami iti nasurok a 3,000 a metro. Pilien ti dadduma a pastor ti ab-ababa a ruta isu a nabibiitda a makadanon sadiay. Ngem dayta a ruta ket asideg kadagiti derraas ken rangkis isu a dagiti karnero a mayaw-awan ket madangran no dadduma—wenno matay pay ketdi.

Kadagita a ruta, pagaammo nga adda dagiti lobo a mamutbuteng wenno mangdarup kadagiti karnero. Pagsisinaenda ti arban sada papatayen ida. Isu a kaykayat ni ulitegko ti ruta a nataltalged nupay nabaybayag a daliasaten iti maysa wenno ad-adu pay nga aldaw. No dadduma, kayatko ti agapura ngem lapdannak ni ulitegko. “Alymbek,” kunana, “panunotem dagiti karnero, saan ket a ti bagim.”

Kadagiti napintas a pagaraban iti nangato a bantay, nagaramidkami kadagiti temporario a koral wenno kulongan a pagaponan dagiti karnero iti rabii. Adda dagiti pastor nga aldawen nga agriing isu a napudoten inton maipaarabda dagiti karnero ta timmangkayagen ti init.

Di agbayag, aglilinnetleten dagiti nakadumog ken agal-al-al a karnero. Gapu ta didan makapangan a naimbag, kumuttong ken kumapuydan. Naiduma ni ulitegko ta bumangonen uray no alas kuatro pay laeng ti parbangon. Ipannan dagiti karnerona iti nasayaat a pagaraban sakbay a sumingising ti init. Sadiay nga agpennekda nga agarab bayat ti napariir nga agsapa. Kas iti masansan nga ibaga dagiti tattao, “Makitam kadagiti karnero ti kinasiasino ti pastorda.”

Ti nasayaat a tiempo ti panangsukimat ken panangagas kadagiti karnero ket no agin-inanada kalpasan ti panagarabda. Maysa kadagiti kadakkelan a problema ket no agitlog dagiti insekto iti puseg dagiti karnero. Lumabbaga ken lumteg no kua dayta. No saan a nasapa a maduktalan, napalalo nga ut-ot ti sagabaen ti karnero isu a mabalin a mayaw-awan ken matay. Dandani inaldaw a sukimatenmi dagiti karnero tapno maagasanmi ida. Nupay makabannog ken adu a tiempo ti busbosenmi, magunggonaankami met ta nasalun-at ken kontento dagiti karneromi.

Kada rabii no agsublikamin iti koral, bilangenmi dagiti karnero. Sumrekda iti akikid a ruangan—no dadduma saggatlo wenno saguuppat laeng ti aggigiddan a sumrek. Ginasut ti arbanmi ngem nairuamkamin iti pamay-anmi isu a kabaelanmi a bilangen ti 800 a karnero iti las-ud ti 15 wenno 20 a minuto. Kasapulan ti adu a panagpraktis ngem nabaelanmi!

No maammuanmi a kurang ti arban, mangala ni ulitegko iti paltog ken baston sa mapanna sapulen ti mapukpukaw a karnero—uray no agtudtudo ken nasipnget. Agpukkaw nga uray la mapabutngan dagiti atap nga animal. Ngem tumalged la ketdi ti rikna ti karnero no mangngegna ti timek ni ulitegko.

Pinanagananmi ti tunggal karnero sigun iti langa wenno kababalinda. Iti kada pangen, kasla kanayon nga adda nasukir a karnero. Diak ammo no apay a basta dida kayat a suroten ti pastor. No dadduma, adda met sabsabali a karnero a sumurot iti nasukir a karnero. Isu nga ikagumaan ti pastor a sanayen ken disiplinaen dagiti nasukir. Kas pagarigan, ibatina dayta nga agmaymaysa iti koral. Inton agangay, agnakemen ti dadduma ken agtulnogdan iti pastor. Dagidiay nasukir latta ket maparti tapno sidaenmi.

Sabali a Kita ti Pastor

Idi 1989, nagadal ken nagbalinak a nasigo iti martial arts. Iti simmaganad a tawen, naayabanak nga agserbi iti militar ti Soviet. Bayat nga agserserbiak idiay Russia, dagiti kakaduak iti martial arts ket nangbuangay iti bukodda a sindikato. Idi nagawidak idiay Kyrgyzstan, imbagada a no makikaduaak kadakuada, maalak ti amin a kayatko. Ngem iti daydi met la a tiempo a naam-ammok dagiti Saksi ni Jehova.

Sinungbatan dagiti Saksi ti salsaludsod a mangburburibor kaniak sipud pay idi ubingak, a kas iti Apay a matay ti tattao? Manipud kadagiti saritaanmi, naawatak a ti ipapatay ket resulta ti basol ti immuna a tao a ni Adan. (Roma 5:12) Naammuak met iti Biblia a ti pudno a Dios a ni Jehova imbaonna ti Anakna a ni Jesus kas Mannubbottayo ket no maaddaantayo iti pammati kadakuada, maabbongan ti natawidtayo a basol. Iti kasta, mabalintayto ti agbiag nga agnanayon iti Paraiso a daga, maitunos iti orihinal a panggep ti Dios agpaay iti sangatauan.—Salmo 37:11, 29; 83:18; Juan 3:16, 36; 17:1-5; Apocalipsis 21:3, 4.

Nakalawlawag ken naglaka a maawatan ti impaay dagiti Saksi a sungbat ti Biblia kadagiti saludsodko nga uray la nakunak, “Kasta ah!” Diak kayaten ti makikadua kadagiti dati a gagayyemko. Namin-adu a kinombinsirdak nga agsubli iti grupoda. Ngem nabilbileg ti tarigagayko nga agadal ken mangyaplikar kadagiti kinapudno iti Biblia isu a napagkedkedak dagiti pannulisogda ket nakatulong dayta iti panagbalinko a naespirituan a pastor.

Agarup iti dayta met la a tiempo, adda nalatak a faith healer iti lugarmi a simmarungkar ken Nanang. Naminsan a panagawidko, madama a makium-uman dayta a babai kadagiti espiritu. Kinunana nga adda naisangsangayan a sagudayko ket ibabaonnak iti maysa a moske tapno alaek ti anting-anting a makatulong kano kaniak. Dandani nakombinsirnak a mangaramid iti dayta tapno maaddaanak iti pannakabalin a mangagas.

Kabigatanna, napanak kadagiti Saksi a mangyad-adal kaniak iti Biblia ket inestoriak ti isasarungkar ti faith healer. Impakitada kaniak iti Biblia a karimon ni Jehova ti amin a kita ti espiritismo ta konektado dayta kadagiti dakes nga espiritu. (Deuteronomio 18:9-13) Sumagmamano a rabii a diak makaturog gapu iti impluensia dagiti demonio. Idi sinuruandak dagiti Saksi no kasano ti agkararag maitunos iti pagayatan ni Jehova, saanakon nga agtagtagainep iti dakes. Nakombinsirak a nasarakakon ti pudno a Pastor, ni Jehova.

Naammuak a ni David a nangisurat iti adu a salmo iti Biblia ket pastor met idi agtutubo pay laeng. Inawaganna ni Jehova kas “Pastorko,” ket naapresiarko dagiti riknana maipapan ken Jehova. (Salmo 23:1-6) Kayatko a tuladen ti Anak ni Jehova a ni Jesus—daydiay naawagan “pastor dagiti karnero.” (Hebreo 13:20) Iti asamblea idiay Bishkek idi rugrugi ti 1993, insimbolok ti dedikasionko ken Jehova babaen ti panagpabautisarko iti danum.

Napateg a Taripnong

Adu a kakabagiak ken kaarrubak ti nangrugi nga agtataripnong tapno agadal iti Biblia. Agarup 70 iti bariomi ti nagtataripnong iti asideg ti danaw ti Issyk Kul. Interesado unay ti maysa a kabagiak a panguluen ti konseho iti lugarmi. Imbagana a mangyurnos iti dakkel a taripnong tapno mailawlawagmi ti kabbaro a pammatimi. Ngem dagiti panguluen ti relihion sinugsoganda dagiti umili a mangbusor iti panangasabami. Nagkukumplotda a manggundaway iti daytoy a taripnong tapno kontraendakami dagiti umili.

Idi dimteng dayta nga aldaw, agarup sangaribu ti immay agraman dagiti umili iti tallo nga asideg a bario. Adda met sumagmamano a Saksi, ket maysa kadakuada ti nangrugi a mangilawlawag kadagiti naibasar-Biblia a patpatienmi. Awan pay lima a minuto nga agsasao ti Saksi idi adda timmakder a nangibugkaw kadagiti mangarkarit a saludsodna. Simmarunon dagiti akusasion ken pangta ket naimpluensiaan ti tallaong a mangdangran kadakami.

Iti dayta a kanito, timmakder ti maysa kadagiti manongko a nabiit pay a makipagad-adal iti Biblia tapno ikaluyanakami. Isu ket kabuteng ken likliklikan ti amin gapu iti laingna a makilaban. Situtured a nagpatengnga iti nagbaetan dagiti bumusbusor ken dagiti Saksi isu a nakapanawkami nga awan ti napasamak a kinaranggas. Kadagiti simmaganad a tawen, adu kadagiti timmabuno iti daydi a taripnong ti nagbalin a Saksi. Ita, nagbalinen a Saksi ni Jehova ti nasurok a 50 iti agarup 1,000 nga umili iti bariomi.

Ti Balasang ti Maysa a Pastor

Sumagmamano a bulan sakbay ti dakkel a kombension dagiti Saksi ni Jehova idiay Moscow, Russia idi Agosto 1993, naam-ammok ni Gulmira. Isu ket Saksi manipud iti maysa a bario ti Kyrgyzstan. Agpaspastor met ti pamiliana. Idi 1988, nupay maiparit pay laeng ti trabaho dagiti Saksi iti Soviet Union, ti Nanang ni Gulmira ket nangrugin a makipagadal iti Biblia iti maysa a Saksi nga agnagan Aksamy. Idi dekada ti 1970, ni Aksamy ti kaunaan a Kirghiz a nagbalin a Saksi ni Jehova.

Di nagbayag, nakikadua metten ni Gulmira ken nanangna nga agpayadal iti Biblia ken Aksamy. Idi 1990, naggiddanda a nagpabautisar. Natukay ti puso ni Gulmira isu a di nagbayag, nagserbin iti amin-tiempo a ministerio kas payunir.

Iti simmaruno a dua a tawen, sagpaminsan laeng a nakitak ni Gulmira ta agarup 160 a kilometro ti kaadayo ti lugarmi. Maysa nga aldaw idi Marso 1995, nagpasiarak iti pagtaenganda ta kayatko nga ad-adda a makapaginnam-ammokami. Naklaatak idi imbagana a kabigatanna, mapanen agserbi iti sanga nga opisina idiay Russia, nasurok a 5,633 a kilometro ti kaadayona!

Iti dayta a tiempo, nangrugiakon nga agserbi iti amin-tiempo a ministerio ken agsursuro iti Russian, ta dagiti literatura dagiti Saksi ket di pay idi maipabpablaak iti Kirghiz. Tallo a tawen a nagsinsinnuratkami ken Gulmira ken nagtulagkami a pareho ti basaenmi a paset ti Biblia tapno makapagrinnanudkami kadagiti naespirituan a banag. Kabayatanna, nagserbiak iti kaunaan a Kirghiz ti lenguahena a kongregasion iti ili ti Balikchi.

Panagserbi ken Jehova a Kaduak ni Gulmira

Idi 1998, nagbakasion ni Gulmira iti Kyrgyzstan, ket nagkasarkami. Naawisak nga agserbi a kaduana iti sanga nga opisina idiay Russia. Naimbag laengen ta narugiakon ti agadal iti Russian! Idi agangay, natudinganak a makipagtrabaho kadagiti agipatpatarus iti lenguahe a Kirghiz, a mangipapaay kadagiti naibasar-Biblia a literatura iti dayta a lenguahe. Inkararagko ken Jehova nga ikkannak iti sirib ken suruannak nga aganus. Siempre, dakkel ti naitulong ti katrabahuak a ni Gulmira.

Idi 2004, ti grupomi nga agipatpatarus ket naibaon idiay Bishkek. Nadutokanak nga agserbi sadiay iti komite a mangay-aywan iti trabaho dagiti Saksi ni Jehova iti Kyrgyzstan. Iti intero a pagilian, pito la idi ti kongregasion iti lenguahe a Kirghiz ken nasurok a 30 iti Russian. Ita, addan nasurok a 20 a kongregasion ken adu a grupo iti lenguahe a Kirghiz, a mangbukel iti agarup 40% iti 4,800 a Saksi iti Kyrgyzstan.

Inkeddengmi ken Gulmira nga adalen ti Ingles tangay makatulong dayta iti ministeriomi. Gapuna, naawiskami a mapan iti sangalubongan a hedkuarter dagiti Saksi ni Jehova idiay Estados Unidos idi 2008. Sadiay a tinabunuak ti naisangsangayan nga eskuelaan dagiti mangidadaulo iti trabaho a panangasaba kadagiti bukodda a pagilian.

Mariknami itan ken Gulmira nga ad-addan a matulonganmi dagiti umili ti Kyrgyzstan tapno maam-ammoda ti Dios. Dagiti kapadasanmi ket nakatulong tapno makitami a mismo a ni Jehova ket talaga a naayat a pastor. Personal a nariknak ti kaitungpalan ti salmo, a nagkuna: “Ni Jehova ti Pastorko. Saanakto nga agkurang iti aniaman. Kadagiti naraber a pagaraban pagiddaennak; iti igid dagiti nasayaat-pannakapadanumna a lugar a paginanaan idalannak. Ti kararuak pabang-aranna. Iturongnak kadagiti desdes ti kinalinteg maipagapu iti naganna.”—Salmo 23:1-3.

[Ladawan iti panid 23]

Dagiti karneromi bayat nga agar-arabda

[Ladawan iti panid 23]

Rinabii a bilangenmi dagiti karneromi tapno masierto nga awan ti mapukpukaw kadakuada

[Ladawan iti panid 24]

Dakami ken Gulmira ita