Panangmatmat iti Lubong
“Para iti nasurok a 50% kadagiti Ruso, ti panangpasuksok kadagiti opisial ti kasayaatan a ‘pangsolbar kadagiti problema.’”—REUTERS NEWS SERVICE, RUSSIA.
“Sigun iti surbey, 17.5% kadagiti adulto a Chinese ti adda depekto ti isipna . . . Babbai ti ad-adda a maaddaan iti depekto ti emosional a kasasaadda ken sakit gapu iti panagdandanag ngem kadagiti lallaki.”—CHINA DAILY, CHINA.
“Di kumurang a 28% iti amin nga aksidente ti lugan idiay U.S.—wenno 1.6 milion kada tawen—ket gapu iti panagusar dagiti drayber iti selpon wenno panag-text-da, sigun iti baro a pattapatta ti National Safety Council.”—UC BERKELEY WELLNESS LETTER, U.S.A.
“Nakababain a Pakasaritaan”
“Ipalgak ti Report of the Commission to Inquire Into Child Abuse ti maysa a nakababain a pakasaritaan ti Ireland,” kuna ti The Irish Times. Sigun iti diario, impalgak ti report ti sistematiko a pannakaabuso dagiti ubbing kadagiti narelihiosuan nga institusion dagiti Katoliko, kas iti “panangkabil iti ubbing gapu la ta adu ti kuto iti uloda” wenno agtultuloy a seksual a panangabuso. Di naikankano ti panangabuso gapu iti di umiso a kinasungdo iti “naan-anay nga autoridad ti Iglesia Katolika,” kuna ti diario. “Awan Babainyo, Gobierno ken Simbaan,” ti paulo iti Times, kas panangkotarna iti sinao ti maysa a nakipagrikna kadagiti biktima.
Danum Idiay Bulan
Nangipabettak dagiti sientista iti maysa a rocket iti rabaw ti bulan. Kinunada a nakakitada iti danum kadagiti tapok iti atipukpok a napataud. Nasukimat dagita babaen kadagiti spectrometer—instrumento a manganalisar iti pakabuklan dagiti material babaen ti panangbasa kadagiti wavelength ti lawag nga agsepen wenno iparuar dagita. “Madukduktalanmin dagiti misterio ti kaasitgan a kaarrubatayo ken uray iti solar system-tayo,” kinuna ni Michael Wargo, a chief lunar scientist iti hedkuarter ti NASA idiay Washington, D.C. Itay nabiit, ipalgak ti panagsirarak idiay bulan nga adda minilion a tonelada a danum iti north pole ti bulan.
Balitok Manipud iti Vending Machine
Iti sumagmamano a paset ti lubong, mabalinen nga inayon dagiti bareta a balitok iti adu a produkto a mabalin a maala kadagiti vending machine. Kas pagarigan, ti maysa a hotel idiay Abu Dhabi, United Arab Emirates, ket nangikabil iti kasta a machine a makairuar iti 320 a tagilako. Karaman kadagita ti binarbareta a balitok nga agingga iti 10 a gramo ti kadagsenda ken espesial a sinsilio a balitok. Kada 10 a minuto, mai-update ti balor ti balitok babaen iti kompiuter a nakakonekta kadagiti sangalubongan a merkado. Iti agdama, ti laeng kuarta iti dayta a pagilian ti awaten ti makina, ngem mabalinton a mausar ti credit card. Sigun iti report ti Reuters, dayta a pagilian ti napili a paglakuan “gapu ta adu dita ti mayat a gumatang iti balitok.”