Sirib Maipaay iti Puso ken Salun-at

“Ti natalinaay a puso isu ti biag ti nainlasagan a bagi.”—PROVERBIO 14:30.

“Ti puso a narag-o nasayaat a pangagas.”—PROVERBIO 17:22.

● Dagita a simple ken nainsiriban a sasao ket imbaga ni Ari Solomon ti Israel agarup tallo ribu a tawenen ti napalabas.a Ngem pudno kadi dagita? Ania ti kuna ti moderno a medisina?

Kas panamagdilig iti addaan natalinaay a puso ken iti nalaka nga agpungtot, kastoy ti dinakamat ti Journal of the American College of Cardiology: “Sigun kadagiti agdama a takuat, dakes ti epekto ti panagpungtot ken gura no adda sakit ti puso (CHD [coronary heart disease]).” Isu a kuna ti Journal: “Ti naballigi a panangliklik ken panangagas iti CHD mabalin a ramanenna . . . saan la a ti gagangay a pisikal terapi ken panagtomar iti agas, no di pay ket ti panangkontrol iti emosion nangruna iti panagpungtot ken gura.” Iti ababa a pannao, makapasalun-at ti natalinaay a puso, kas kunaen ti Biblia.

Adda pay umasping a nasayaat nga ibunga ti puso a narag-o. Ti maysa nga opisial idiay Scotland a ni Dr. Derek Cox kinunana iti report ti BBC News: “No naragsakka, posible a manmanonto laeng ti sakitmo no idilig kadagidiay naliday.” Kuna ti isu met la a report: “Dakdakkel ti proteksion dagiti naragragsak a tao kontra iti bambanag a kas iti sakit ti puso ken istrok.”

Apay nga adayo a nasirsirib ni Solomon ken ti dadduma a mannurat iti Biblia ngem kadagiti kapanawenanda? Simple ti sungbat. “Ti Dios nagtultuloy a nangted ken Solomon iti sirib ken pannakaawat iti dakkel unay a rukod.” (1 Ar-ari 4:29) Kanayonanna, dayta a sirib ket naisurat iti wagas a nalaka a maawatan tapno magunggonaan ti amin. Libre pay dayta!

Apay a dimo iyugali ti kanayon nga agbasa iti Biblia? Minilion ti maragsakan unay ta napaneknekandan a “no ti sirib sumrek iti pusom ket ti met laeng pannakaammo agbalin a makaay-ayo iti mismo a kararuam, ti met laeng pannakabael nga agpanunot aywanannakanto, ti met laeng panangilasin saluadannakanto.” (Proverbio 2:10, 11) Saan kadi a makaparagsak unay dayta?

[Footnote]