Ti Panangmatmat ti Biblia
Supsuportaran Kadi ti Dios Dagiti Gubat Ita?
MAIPAPAN iti akemna kas mannakigubat, ni Ari David iti nagkauna nga Israel kinunana: “Isursuro [ti Dios] dagiti imak maipaay iti pannakigubat, ket dagiti takiagko nangitalmeg [wenno, nangibiat] iti bai a gambang.”—Salmo 18:34.
No kadagiti Kristiano, insurat ni apostol Pablo: “Nupay magnakami iti lasag, saankami a makigubat a maitunos iti kinasiasinomi iti lasag. Ta dagiti igam ti pannakigubatmi saan a nainlasagan.”—2 Corinto 10:3, 4.
Agkontra kadi dagita a teksto? Wenno adda kadi nainkalintegan a rason nga inanamongan ti Dios ti pannakigubat ti nagkauna nga Israel ngem iparitna dayta kadagiti Kristiano? Nagbaliw kadin ti panangmatmat ti Dios iti gubat? Nalawag dagiti sungbat no usigentayo ti tallo a kangrunaan a nagdumaan ti Israel ken ti pudno a kongregasion Kristiano.
Tallo a Kangrunaan a Nagdumaan
1. Ti nagkauna nga Israel ket maysa a nasion nga addaan iti inted-Dios a literal a teritoria, ken napalikmutan dayta kadagiti nauyong a nasion. Gapuna, imbilin ti Dios iti ilina a salaknibanda ti dagada, a pinagballigina pay ida a mangparmek kadagiti kabusorda. (Uk-ukom 11:32, 33) Iti kasumbangirna, ti kongregasion Kristiano ket saan a literal a nasion nga addaan iti teritoria. Masarakan dagiti miembrona iti amin a paset ti daga. Isu a no dagiti pasurot ni Jesus iti maysa a pagilian ket makigubat iti sabali a pagilian, makirupakda kadagiti kapammatianda—dagiti naespirituan a kakabsatda—a naibilin nga ayatenda ken uray pakatayanda pay.—Mateo 5:44; Juan 15:12, 13.
2. Ti nagkauna nga Israel ket addaan idi iti tao nga ari nga idiay Jerusalem ti tronona. Ngem dagiti pudno a Kristiano ket iturturayan ni Jesu-Kristo, a mannakabalin itan nga espiritu a parsua nga idiay langit ti tronona. (Daniel 7:13, 14) Kinuna a mismo ni Jesus: “Ti pagariak saan a paset daytoy a lubong. No koma ti pagariak paset daytoy a lubong, nakibakal koma dagiti agserserbi kaniak tapno saanak a mayawat kadagiti Judio. Ngem, iti kinaagpaysuanna, ti pagariak saan a manipud itoy a gubuayan.” (Juan 18:36) Ditoy daga, awan ngarud ti napolitikaan a pagarian wenno turay ti makaibaga a kukua ni Kristo. Ania ti kaipapanan daytoy kadagiti “agserserbi,” wenno paspasurot ni Jesus? Ilawlawag dayta ti maikatlo a punto.
3. Ti nagkauna nga Israel, kas iti sabali a nasion, ket masansan nga agipatulod kadagiti mensahero wenno iti aw-awagantayo ita nga embahador wenno babaonen. (2 Ar-ari 18:13-15; Lucas 19:12-14) Kasta met ti inaramid ni Kristo, ngem adda dua a napateg a nakaidumaanna. Umuna, amin a pasurotna ket agserbi kas embahador wenno babaonen. Ni apostol Pablo, kas mangibagi iti padana a Kristiano, naisuratna: “Dakami ngarud ket embahador a mangisunsuno ken Kristo.” (2 Corinto 5:20) Kas mannakikappia nga embahador, dida nagusar iti armas. Maikadua, dagiti pasurot ni Jesus kasaritada ti amin a dumngeg iti mensaheda. Kinuna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion.” (Mateo 24:14) Kinunana pay: “Inkayo ngarud ket mangaramidkayo iti ad-adalan kadagiti tattao iti amin a nasion, . . . nga isuroyo kadakuada a tungpalenda ti amin a bambanag nga imbilinko kadakayo.”—Mateo 28:19, 20.
Nakalkaldaang ta saan a kanayon a nasayaat ti pannakapasangbay dagiti agserserbi ken Kristo. Gapuna, insurat ni Pablo iti Kristiano nga ebanghelisador a ni Timoteo: “Kas maysa a nasayaat a soldado ni Kristo Jesus makipasetka iti panagsagaba iti dakes.” (2 Timoteo 2:3) Siempre, saan a literal dagiti armas ni Timoteo no di ket naespirituan. Karaman kadagita ti naisurat a sao ti Dios a naawagan iti “kampilan ti espiritu.”—Efeso 6:11-17.
Apay a ti Kongregasion Kristiano ti Naisukat iti Israel?
Agarup 1,500 a tawen a tinagiragsak ti nasion ti Israel ti naisangsangayan a relasion iti Dios. Naibatay dayta iti tulag wenno kontrata. (Exodo 19:5) Karaman iti dayta a tulag—a ni Moises ti manangibabaet—ti Sangapulo a Bilin ken dadduma pay a linteg. Intandudo amin dagita ti pudno a panagdaydayaw ken nangato a pagalagadan iti moral. (Exodo 19:3, 7, 9; 20:1-17) Ngem nakalkaldaang ta ti Israel, kas maysa a nasion, ket di nagmatalek iti Dios. Pinapatayna pay dagiti propeta ti Dios.—2 Cronicas 36:15, 16; Lucas 11:47, 48.
Kamaudiananna, imbaon ni Jehova ti Anakna a ni Jesu-Kristo, a nayanak kas maysa a Judio. Imbes nga awatenda kas ti Mesias, dagiti Judio kas maysa a nasion inlaksidda ni Jesus. Gapu iti dayta, ti Dios pinagpatinggana ti nabayagen a tulagna iti Israel, ket nadadael ti piguratibo a pader nga adda iti nagbaetan dagiti Judio ken di-Judio.a (Efeso 2:13-18; Colosas 2:14) Agarup iti dayta met la a tiempo, impasdek ti Dios ti kongregasion Kristiano ken pinusganna ni Jesus kas Ulo. Kanayonanna, sakbay a nagngudo ti umuna a siglo, dayta a kongregasion ket buklenen ti nadumaduma a nasionalidad. Kinuna ti Judio nga apostol a ni Pedro nga ‘iti tunggal nasion, ti Dios anamonganna ti tao nga agbuteng kenkuana ken agaramid iti kinalinteg.’—Aramid 10:35.
Ikagkagumaan dagiti Saksi ni Jehova a tuladen dagiti nagkauna a Kristiano. Dayta ti makagapu a dagiti Saksi ket pagaammo iti trabahoda a panangasaba ken iti neutral a takderda maipapan iti politika ken gubat. (Mateo 26:52; Aramid 5:42) Wen, awan ti ipalubosda a mangsinga kadakuada iti panangiwaragawag iti naimbag a damag maipapan iti Pagarian ti Dios, ti kakaisuna a gobierno a mangikkat iti kinadakes ken mangyeg iti manayon a talna ditoy daga. Dayta a nagpateg a namnama ti adda iti panunot ni apostol Pablo idi insuratna: “Kas dagiti suno ni Kristo ipakaasimi: ‘Makikappiakayo iti Dios.’” (2 Corinto 5:20) Nagangganat manen ita dagita a sasao ta umas-asidegtayon iti ngudo kadagiti “maudi nga aldaw” daytoy agdama a nadangkes a lubong.—2 Timoteo 3:1-5.
[Footnote]
a Idi damo, ti termino a “Judio” ket agaplikar iti tao a nagtaud iti tribu ni Juda iti Israel. Idi agangay, dayta a nagan ket nagaplikaren iti amin a Hebreo.—Esdras 4:12.
NAPANUNOTMO KADIN?
● Ania a naisangsangayan a galad ti nasken nga ipakita dagiti Kristiano iti maysa ken maysa?—Juan 13:34, 35.
● Ania ti kangrunaan nga “armas” ti pudno a Kristiano?—Efeso 6:17.
● Ania a napateg a mensahe ti iwarwaragawag dagiti pannakabagi ni Kristo?—Mateo 24:14; 2 Corinto 5:20.
[Ladawan iti panid 23]
Dagiti Saksi ni Jehova ket panagkakabsat a buklen ti nadumaduma a nasionalidad ken neutralda no maipapan kadagiti gubat dagiti nasion