“Suratanyo ni Anton!”
● Ti maysa a tin-edyer a Saksi ni Jehova nga agnagan Anton ket agnanaed idi iti nasulinek a bario ti Schelkan idiay Stavropol’ Kray, Russia. Sipud kinaubingna, nadayagnos nga adda sakitna a Duchenne muscular dystrophy, a di maagasan, napartak a mangpalupoy kadagiti masel, ken gagangay a pakatayan sakbay a dumanon iti edad a 20. Idi siam ti tawenen ni Anton, din makapagna ken makabangon.
Ni Anton ket naam-ammo ti agassawa a da Yevgeny ken Diana idi binisitada ti maysa a kongregasion dagiti Saksi. “Nakaluplupoy ni Anton,” kuna ni Diana, “ngem nakatibtibker ti relasionna iti Dios. Agtawen ni manongna iti 19 idi natay iti kasta met la a sakit isu nga ammo ni Anton a mabilbilangen ti aldawna. Ngem kaskasdi a naragsak ken positibo.”
Ni Anton ket pinaregta da Yevgeny ken Diana a mangasaba iti ad-adu pay babaen ti panagaramidna kadagiti surat nga ipatulodna iti tattao kadagiti nasulinek a bario. Idi 2005, nakaipatulod iti agarup 500 a surat iti kabangibang a purpurok. Ngem nadismaya ta awan man la uray maysa ti nagsubalit kenkuana. Nupay kasta, intultuloyna ti nagsurat ken sipapasnek nga inkararagna a tulongan ti Dios nga agbalin a narang-ay a ministro iti laksid ti kasasaadna.
Naminsan, bayat nga agbasbasa ni Anton iti diario, nakabasa iti surat ti maysa a masakit a babai nga agkasapulan iti pammaregta. Sinuratan ni Anton, ket nayimprenta iti isu met la a diario ti dadduma a paset ti suratna: “Nupay awan agas ti sakitko, ti panagbasa iti Biblia ti tumultulong kaniak a manginanama iti masanguanan,” insuratna. “Maragsakanak nga umawat kadagiti surat ken kanayon a padpadaanak dagita.”
Yantangay natukay ti riknana, ti babai ket nagsurat iti dayta met la a diario. Nayimprenta dayta iti benneg a napauluan “Suratanyo ni Anton!” Inapresiarna dagiti makaparegta nga insurat ni Anton maipapan iti panagbasa iti Biblia ket innayonna: “Tulongantayo ni Anton! Subalitan ken suratanyo. Kasapulanna unay ti pammaregtatayo!” Naikabil met ti adres ni Anton.
Iti bassit a post office iti bariona, nangrugin nga agsangpet dagiti surat a para ken Anton—inggat’ 30 kada aldaw! Naggapu dagita manipud iti intero a Russia, Germany, pagpagilian iti asideg ti Baltic Sea ken uray iti France. Ginasut a surat ti naawatna manipud kadagiti agbasbasa iti diario. “Kasta unay ti ragsak ni Anton!” malagip ni Diana. “Ginasuten ti mabalinna a suratan ken pangiranudan kadagiti naibasar-Biblia a patpatienna.”
Nasurok a makatawen a nakisinsinnurat ni Anton, ket inranudna dagiti kinapudno ti Biblia kadakuada. Ngem in-inut a kimmapuy ti im-imana isu nga impaisuratnan dagita. Idi Setiembre 2008, natay ni Anton iti edad a 20. Nupay nakakapkapuy ti pammagi ni Anton, ti pammati ken ayatna a mangiwaragawag iti mensahe ti Biblia ti nangted kenkuana iti gundaway a mangdanon iti puso ti ginasut a tattao.