Ti Panangmatmat ti Biblia

Ania ti Kalat ti Nagannak?

ANIA kadagiti sumaganad ti kayatmo a pagbalinan ti tin-edyer nga anakmo?

A. Kapadpadam.

B. Rebelde a dina pulos kayat ti tumulad kenka.

C. Responsable nga adulto a nalaing nga agdesision.

Adda nagannak a mangpili iti C ngem ipakita ti tigtignayda nga A ti talaga a kayatda. Ipapilitda dagiti prinsipioda iti tin-edyerda, kas ti panangidiktarda no ania a karera ti pilienna. Ania ti resultana? Apaman a makagun-od iti wayawaya, aramidenna ti maikontra iti kayatda. Nakalkaldaang ta ti B ti inapit ti adu a nagannak a nagmula iti A.

No Apay a Di Epektibo ti Nalabes a Kinaestrikto

Kayatmo nga agbalin anakmo a responsable nga adulto a nalaing nga agdesision. Ngem kasano a maragpatmo dayta a kalat? Maysa a banag ti sigurado: Saan a solusion ti nalabes a kinaestrikto. Usigem ti dua a rason.

1. Maikontra iti Biblia ti nalabes a kinaestrikto. Pinarsua ni Jehova a Dios dagiti tattao nga addaan iti wayawaya nga agpili. Palpalubosanna ida nga agpili iti kayatda nga aramiden iti biag, naimbag man wenno dakes. Kas pagarigan, idi nangimula ni Cain iti sakit ti nakem nga uray la kayatnan a patayen ni adingna nga Abel, kinuna ni Jehova kenkuana: “No tumurongka iti panagaramid iti naimbag, awanto aya ti pannakaitan-ok? Ngem no saanka a tumurong iti panagaramid iti naimbag, adda basol a kumkumleb iti pagserkan, ket sika ti paggargartemanna; ket sika, iti biangmo, maparukmamto kadi dayta?”—Genesis 4:7.

Nadlawmo kadi a nupay nalawag ti imbalakad ni Jehova ken ni Cain, dina pinilit nga agtulnog? Makaammo ni Cain nga agdesision no kontrolenna ti pungtotna wenno saan. Ania ti maadaltayo? No ni Jehova a mismo dina puersaen dagiti pinarsuana nga agtulnog kenkuana, dimo met koma ngarud aramiden ti kasta iti annakmo.a

2. Masansan a dakes ti resulta ti nalabes a kinaestrikto. Ipapanmon nga adda aglaklako a mangpilpilit kenka a gumatang iti produktona. No iyad-addanaka a piliten, lallalo nga agkedkedka. Uray no kasapulam ti produktona, nalabit dika gumatang ta masuronka iti pamay-anna nga aglako isu a kayatmon nga itarayan.

Kasta met ti mabalin a mapasamak no ipapilitmo dagiti prinsipiom, patpatiem, ken kalatmo iti anakmo. Akseptarenna kadi dagita? Sigurado a saan! Kinapudnona, amangan no ti kasupadi ti namnamaem ti mapasamak ta kaluksawnanton dagiti pagannurotam. Isu a no nalabes ti kinaestrikto ti nagannak, dakdakkel ti posibilidad nga agrebelde ti annak. Ania ngarud ti mabalinmo nga aramiden?

Imbes a naan-anay a kontrolem ti biag ti anakmo, nga ipapilitmo dagiti prinsipiom kenkuana a kas iti inaramidmo idi ubing pay, ipaamirismo no apay a nainsiriban ti panangaramidna iti umiso. Kas pagarigan, no maysaka a Kristiano, ipakitam no kasano a ti panangsurot kadagiti prinsipio ti Dios ket mangyeg kenkuana iti manayon a ragsak.—Isaias 48:17, 18.

Bayat nga ar-aramidem dayta, iyulidanmo iti anakmo ti kayatmo a pagbalinanna. (1 Corinto 11:1) Silalawag koma a makitana kenka dagiti prinsipio a kayatmo nga annuroten. (Proverbio 4:11) No masursuro ti anakmo nga ayaten ti Dios ken dagiti pagannurotanna, makaaramidto kadagiti nainsiriban a desision uray no awanka iti sibayna.—Salmo 119:97; Filipos 2:12.

Isurom Dagiti Praktikal a Paglaingan

Kas nailawlawag iti panid 2 daytoy a magasin, dumtengto ti aldaw—nalabit dimo pay ketdin mapupuotan—a ti adulto nga anakmo ‘panawannan ti amana ken ti inana.’ (Genesis 2:24) Kas nagannak, kayatmo a siertuen nga umdas dagiti abilidadna tapno makapagbiag a bukbukodna. Usigem ti sumagmamano a paglaingan a mabalinmo nga isuro bayat nga adda pay iti podermo.

Dagiti Trabaho iti Balay. Ammo kadin ti anakmo ti agluto? aglaba ken agplansa iti badona? mangdalus ken mangurnos iti kuartona? mangmantener ken mangtarimaan iti lugan? No masursurona dagita, kabaelannanto nga asikasuen ti bukodna a pamilia. Kinuna ni apostol Pablo: “Kadagiti aniaman a kasasaadko, naadalko ti mapnek [wenno, di agpannuray iti sabsabali].”—Filipos 4:11.

Pannakilangen. (Santiago 3:17) Nalaing kadi a makilangen ti anakmo? Kalmado ken natanang kadi a mangrisut kadagiti di pagkikinnaawatan? Sansanayem kadi a raemenna ti sabsabali ken sikakappia a solbarenna dagiti problema? (Efeso 4:29, 31, 32) Kuna ti Biblia: “Padayawanyo dagiti amin a kita ti tattao.”—1 Pedro 2:17.

Panagbadyet. (Lucas 14:28) Matulongam kadi ti anakmo tapno masursurona ti agtrabaho, mangyanay iti badyet, ken di agutang? Sansanayem kadi nga agurnong para iti napateg a bambanag, di nadarasudos nga aggatang, ken mapnek kadagiti kangrunaan a kasapulan iti biag? (Proverbio 22:7) Insurat ni Pablo: “No adda pagtaraon ken pagkawestayo, mapnektayon kadagitoy.”—1 Timoteo 6:8.

Dagiti tin-edyer a nakasursuro nga agbiag kadagiti umiso a prinsipio ken praktikal a paglaingan ket talaga a nakasaganan iti kinaadulto. Naragpat la ketdi dagiti nagannakda ti kalatda!—Proverbio 23:24.

[Footnote]

NAPANUNOTMO KADIN?

● Ania ti kalatmo kas nagannak?—Hebreo 5:14.

● Ania ti responsabilidad ti anakmo inton adulton?—Josue 24:15.

[Dagiti Ladawan iti panid 25]

Ania ti kayatmo a pagbalinan ti anakmo?

Kapadpadam . . .

Rebelde . . .

Responsable nga adulto