Ti Problema iti Panagpungtot
Adda lalaki a nagorder iti sandwich iti maysa a fast-food restaurant. Nakarurod idi impagarupna a nagbayag a maited ti orderna. Simrek iti restaurant, binutbutengna ti maysa nga empleado, impidegna iti counter sana tinungpa. Kalpasanna, ginammatanna ti orderna a sandwich sa pimmanaw.
MAKAUNGETTAYO amin sagpaminsan. Ngamin, ti pungtot ket paset ti emosiontayo a kas iti ayat, namnama, danag, liday, ken buteng. Ti kontrolado a pungtot ket mabalin a maipeksa iti umiso a wagas ken mabalin nga adda pagsayaatanna. Kas pagarigan, makatulong dayta no papigsaenna ti determinasionmo a mangparmek kadagiti lapped wenno problema.
Kas naipakita iti ngato, adda met pagdaksan ti pungtot. Adda tattao a nalaklaka a makaunget, masansan nga agrurod, ken nakarkaro nga agpungtot. No mapagpungtotda, mabalin a nasakit ti panagsaoda wenno mangdangranda pay ketdi. No ar-arigen, ti pungtotda ti mangkonkontrol kadakuada imbes nga isuda ti mangkontrol iti dayta. Napeggad ti kasta a di mapengdan a pungtot isu a no dadduma, matukoy dayta kas “problema a panagpungtot.”a
Dagidiay managpungtot saanda la a pagladingiten ti bagida no di ket ti amin nga adda iti aglawlawda. Mabalin nga agpungtot ken mangdangranda a dagus uray gapu laeng iti babassit a banag ket agresulta dayta iti nakas-ang a trahedia. Usigem dagiti sumaganad a pagarigan:
Napaltogan ti tengnged ti maysa a lalaki a magmagna a kadua ti gagayyemna iti aduan tao a kalsada. Napasamak dayta gapu laeng ta ti bag ti kaduana ket naisagid iti maysa a lalaki.
Kinabil ti maysa a 19 anyos a lalaki ti 11 a bulan nga anak ti nobiana agingga a natay. Agay-ay-ayam ngamin iti naranggas a video game ket nakapungtot idi nasagid ti ubing ti control panel ti ay-ayamna isu a naabak.
Ipakita dagiti umasping a damag manipud iti intero a lubong nga umad-adu ti managpungpungtot. Apay?
[Footnote]
a Sigun iti broshur a Boiling Point—Problem Anger and What We Can Do About It, ti “problema a panagpungtot” ket “aniaman a di umiso a wagas ti panangipapas ken panangiliwliwag iti pungtot a kanayon a pakaigapuan dagiti nakaro a problema iti biag ti maysa a tao agraman iti panunot, rikna, kababalin ken pannakilangenna.”
[Kahon iti panid 3]
Ti pungtot ket maysa kadagiti adu a riknatayo. Isu nga adda dagiti gundaway a maitutop ti kontrolado a panagpungtot. Nupay kasta, salaysayen dagitoy nga artikulo ti di umiso a panagpungtot a makadangran iti emosion, bagi, ken espiritualidadtayo, kasta met iti sabsabali.