5 Mangikeddengka Kadagiti Nasayaat a Moral a Prinsipio
“Diak idi agbibiag maitunos kadagiti pagalagadan ti Biblia isu a narigatanak a mangisuro iti annakko. Ngem itan, nalaklakakon nga aramiden dayta gapu iti tulong ti Biblia.”—ELIZABETH, SOUTH AFRICA.
Ti karit.
Ti panangpilit dagiti gagayyem ken kapatadan iti eskuelaan ken ti agrakrakaya a moralidad ti lubong ket nagdakkel ti impluensiana kadagiti pamilia. Tapno malabanan dagiti annak dayta a dakes nga impluensia, kasapulanda dagiti nasayaat a pagalagadan. Ta no awan, imposible a dumakkelda a responsable, addaan prinsipio, ken disiplinado nga adulto.
Singasing.
Adu nga agsolsolo a nagannak, agraman dagiti nadakamat iti daytoy a serye dagiti artikulo, ti agpapaiwanwan iti Biblia. Ammoda ngamin a naglaon dayta iti awan kaartapna a sirib ti Dios. Alaentay a pagarigan ti ibagbaga ti Biblia maipapan iti kapatgan a prinsipio—ti panangipakita iti pudno nga ayat.
“Ti ayat mabayag-panagituredna ken manangngaasi. Ti ayat saan a managimon, saan nga agpangas, saan nga agtangsit, saan a naalas ti panagtigtignayna, saanna a sapulen dagiti bukodna a pagimbagan, saan a magargari nga agpungtot. Saanna nga ing-ingpen ti pannakadangran. Saanna a pagrag-oan ti kinakillo, no di ket makipagrag-o iti kinapudno. Anusanna ti amin a bambanag, . . . inanamaenna ti amin a bambanag, ibturanna ti amin a bambanag. Ti ayat saan a pulos aggibus.”—1 Corinto 13:4-8.
No ipakpakita dagiti nagannak ti kasta a kita ti ayat, dumakkel a nasayaat dagiti annakda. Insurat ti nadakamat iti panid 7 a ni Colette: “Kanayonko nga ibaga kadagiti annakko a dungdungnguek ida. Imbagak pay kadakuada a regalo ida ti Dios isu a rumbeng nga aywanak ida a naimbag. Masapul met ngarud nga agbalinda a nadayaw ken managraem kaniak ken iti amada [a dimin kabbalay]. Nakatulong dagita a prinsipio tapno adda panagtalek ken panagraemmi iti maysa ken maysa.”—Salmo 127:3.
Insurat met ni Anna a nadakamat iti panid 3: “No agaapa dagiti annakko, ipalagipko kadakuada ti imbaga ni Jesus a no ania ti kayattayo nga aramiden ti dadduma kadatayo, dayta ti rumbeng nga aramidentayo kadakuada.” (Mateo 7:12) Mapaspasaran ni Roberto a nadakamat iti panid 7 ti gagangay a problema ti adu nga agsolsolo a nagannak. Kinunana: “Maipaspasango dagiti annak iti dua a prinsipio—dagiti prinsipiom ken dagiti prinsipio ti dati nga asawam. No ipatungpalko dagiti prinsipio ti Biblia, ammok a kaykayatda ni nanangda iti dayta nga aldaw wenno lawas.” Kunana pay: “Mabalin a regaluan ida ni nanangda tapno isu ti kaykayatda. Narigat no kasta ti kasasaad, ngem makatulong ti nasayaat a pannakikomunikar kadagiti annak.”
Saan a kanayon a nalaka ti agbiag a maitunos kadagiti pagalagadan ti Biblia, ngem nagsayaat ti resultana! Kinuna ni Sarah a maysa nga agsolsolo a nagannak idiay South Africa: “Maragsakanak ta dumakdakkel ti annakko iti panangiwanwan ni Jehova. Agpayso nga adda dagiti problema ngem kanayon a tultulongannakami ti Dios.”