DAMDAMAG ITI LUBONG

Israel

Dagiti ubbing “a nayanak nga addaan depekto a mabalin koma a naammuan idi na-check-up ti inada bayat a masikog pay laeng” ket di mabalin a mangidarum kadagiti doktor a nangipalubos a maipasngayda, kuna ti Haaretz.com. Ngem mabalin nga agdarum dagiti nagannak tapno makaalada iti danios para iti “dakkel a gastosda a nangpadakkel iti adda depektona nga ubing ken panangipaay iti kasapulanna iti unos ti panagbiagna.”

Australia

Iti Australia, 8 iti kada 10 nga agassawa ti nagkabbalay nga immuna sakbay a nagkasar.

Greece

Ipakita ti estadistika nga inruar ti Greek Ministry of Health nga 40% ti immaduan dagiti nagpakamatay iti Greece bayat ti immuna a 5 a bulan ti 2011 no idilig iti isu met la a bulbulan ti 2010. Napasamak dayta nga yaadu idi mangrugi ti nabiit pay a krisis ti ekonomia.

United States

Sigun iti Natural Resources Defense Council, gistay 40% ti masaysayang a taraon iti intero a pagilian. Kas pagarigan, mapattapatta a 7% ti di pulos maapit kadagiti naimula a pagtaraon, 17% ti di makmakan kadagiti naidasar iti restawran, ken 25% ti ibelleng dagiti pamilia kadagiti ginatangda a taraon.

Madagascar

Nabiit pay a nasarakan iti Madagascar ti kabassitan a chameleon iti lubong. Iti rukod a 1.1 a pulgada, ti dadduma kadagita a bassiusit ken kayumanggi a kapamilia ti alutiit ket umanay iti kuko. Agpegpeggadda a maungaw ta madaddadaelen ti pagnanaedanda.