Kanayonkayo kadi nga agriri nga agassawa no agtungtongkayo? Kanayon kadi a madandanaganka di la ket ta makaisao wenno makaaramidka iti banag a pagapaanyo?
No wen, dika madanagan. Mabalinmo a pasayaaten ti kasasaadyo. Ngem nasken nga ammuem nga umuna no apay a masansan nga agririkayo.
DAGITI MAKAGAPU
Di panagkinnaawatan.
Inamin ti maysa a misis nga agnagan iti Jillian:a “No dadduma, adda maibagak ken lakayko ngem sabali ti panagsaadna kenkuana. Wenno adda tiempo nga ipapilitko a naibagakon ti maysa a banag kenkuana ngem saan pay met gayam!”
Agduma nga opinion.
Uray no kasla agkatunosankayo unay iti asawam, agduma latta dagiti opinionyo iti dadduma a banag. Apay? Ngamin, awan ti dua a tao nga eksakto nga agpada. Gapu iti dayta, posible nga agproblema wenno agbalin a naragsak ti biagyo. Ngem para iti adu a pagassawaan, problema dayta.
Saan a nasayaat nga ulidan.
“Agkaraapa dagiti dadakkelko ken awan panagraemda iti maysa ken maysa,” kuna ti maysa a misis nga agnagan iti Rachel, “isu nga idi adda asawakon, kas met la ken nanangkon ti panagsasaok ken lakayko. Diak nasursuro idi no kasano nga ipakita ti panagraem.”
Naun-uneg a rason.
Masansan nga adda naun-uneg a rason ti nakaro a riri malaksid iti pasamak a nangrugian dayta. Kas pagarigan, ti riri a nangrugi iti panangibaga iti “Kanayon laengen a maladawka!” ket mabalin a maigapu iti pannakarikna ti maysa nga asawa a saan a maipakpakitaan iti konsiderasion, imbes nga iti kinapateg ti kinamanagsapsapa.
Aniaman ti makagapu, makadangran iti salun-atmo ti masansan a panagriri ken mabalin pay ketdi nga agtungpal iti panagsina wenno diborsio. Ania ngarud ti aramidenyo tapno maisardeng ti masansan a panagririyo?
TI MABALINYO NGA ARAMIDEN
Tapno malapdan ti riri, ammuem no ania a talaga dagiti makagapu. Inton kalmadokayon a dua, padasenyo nga aramiden daytoy nga aktibidad.
1. Isuratyo a dua iti agduma a papel ti makagapu iti nabiit pay a panagririyo. Kas pagarigan, mabalin nga isurat ni mister, “Nagmalmalemka a nakikadua kadagiti gagayyemmo a dimo man la impakpakaammo kaniak no ayanmo.” Nalabit nga isurat ni misis, “Nakaungetka gapu ta nakikaduaak kadagiti gagayyemko.”
2. Pagsaritaanyo ti sumaganad a silulukat ti panunotyo: Serioso kadi a talaga dayta? Mabalin kadi a palabsen laengen? Iti dadduma a kasasaad, mabalin nga umdasen nga akseptarenyo nga agduma dagiti opinionyo ken kalubanyo laengen dayta iti ayat tapno agtalinaed ti talna.—Prinsipio ti Biblia:Proverbio 17:9.
No maamirisyo nga agassawa a saan unay a serioso dayta, agpinnakawankayo ken lipatenyon dayta. —Prinsipio ti Biblia:Colosas 3:13, 14.
Ngem no ibilangyo a dua wenno ti maysa kadakayo a serioso dayta, aramidenyo ti sumaganad.
3. Isuratmo ti nariknam bayat ti panagririyo, ken ibagam nga aramiden met dayta ti asawam. Kas pagarigan, nalabit isurat ni mister, “Panagriknak, kaykayatmo a kadua dagiti gagayyemmo ngem siak.” Nalabit isurat ni misis, “Panagriknak, trattratuennak a kasla ubing a masapul pay la nga agpakada ken tatangna.”
4. Agsinnukatkayo iti papel sayo basaen ti komento ti tunggal maysa. Ania a talaga ti pakaseknan ti asawam bayat ti panagririyo? Pagsaritaanyo no ania koma ti inaramid ti tunggal maysa kadakayo tapno marisut dagiti kangrunaan a makagapu a di kasapulan nga agririkayo. —Prinsipio ti Biblia:Proverbio 29:11.
5. Pagsaritaanyo dagiti nasursuroyo iti daytoy nga aktibidad. Kasanoyo nga iyaplikar dagiti nasursuroyo tapno masolbar wenno malapdan ti panagririyonto manen?
