Ti “Makakita” nga Iskeleton ti Brittle Star

DAYTOY brittle star nga agbibiag iti kadilian ket kabagian ti limalima wenno bituen iti baybay. Addaan iti nakaskasdaaw a salaknib iti rabaw ti bagina. Dayta a paset ti iskeletonna ket napno kadagiti bassiusit a lens nga agserbi a pannakamatana.

Usigem: Idi sinukimat dagiti sientista dagiti skeletal plates ti brittle star, nakitada dagiti “karkarna ti pannakaurnosna a nasedsed a tambukor a kas kalitnaw ti kristal. Tunggal maysa ket napimpino ngem iti buok ti tao,” kuna ti magasin a Natural History. Naaramid dagita a tambukor iti calcium carbonate (calcite). Agserbi dagita kas nangato ti kalidadna a babassiusit a lens a mangipokus iti lawag kadagiti sensitibo iti lawag a nerve nga adda la iti baba dagiti skeletal plates. Maitutop met unay ti sukog dagiti lens tapno nalawag ti makita a ladawan.

Sigun iti chemist a ni Joanna Aizenberg, ti dua ti usarna a shell ti brittle star ket “mangisuro iti napateg a prinsipio: iti biology, masansan nga adu ti pakausaran ti bambanag.”

Gapu iti nasursuro dagiti managsirarak iti abilidad ti brittle star, nakapartuatda iti simple ken nalaka a pamay-an ti panagaramid kadagiti naintar a babassiusit a lens a naaramid iti calcium carbonate. Karaman iti adu a pakausaran dagita ket iti telekomunikasion, a pakaaramatanda a mangyallatiw kadagiti signal ti lawag kadagiti optical fibers.

Ania ti makunam? Babaen kadi iti ebolusion a timmaud ti “makakita” nga iskeleton ti brittle star? Wenno nadisenio dayta?