No Kasanom a Kontrolen ti Panaggastom

Malaksid iti panangguyugoy dagiti aglaklako, dagiti mismo a rikna ken ugalitayo ti sabali pay a makagapu iti aglablabes a panaggastotayo. Adtoy ti innem a singasing a makatulong kenka a mangkontrol iti panaggastom.

Liklikam ti darasudos a panaggatang. Maay-ayatanka kadi a gumatang ken makakita iti nalalaka a tagilako? No wen, mabalin a kayatmo ti gumatang a dagus. Tapno maliklikam, agteppelka ken panunotem dagiti agpaut nga epekto ti pananggatang, panangtagikua, ken panangmantener iti kayatmo a gatangen. Lagipem dagiti dinadarasudos a ginatangmo a pinagbabawyam idi agangay. Agpanunotka pay laeng sakbay nga agdesisionka.
Dika aggatang tapno sumayaat ti riknam. Ti panaggatang ket apagbiit a makailiwliwag iti riknam. Ngem inton madi manen ti riknam, mabalin nga ad-adda nga ipamuspusam ti mabang-aran babaen ti panaggasto. Imbes nga aggatangka tapno sumayaat ti riknam, agpatulongka kadagiti naasi a gagayyem wenno agehersisioka kas iti panagpagnapagna.
Dimo pagbalinen a pagpalpaliwaan ti panaggatang. Dagiti dadakkel a shopping malls pinagbalindan a pagpalpaliwaan ti panaggatang. Nupay mabalin a mapanka iti mall wenno agkitakita wenno ag-browse iti Internet tapno agpalpaliwa, kaaduan a makitam ket nadisenio a mangallukoy iti tarigagaymo a gumatang. Gumatangka laeng no adda nasken a gatangem ken surotem ti planom.
Piliem a naimbag ti kakaduam. Adda dakkel nga impluensia kenka ti estilo ti panagbiag ken pannakisarsarita ti gagayyemmo. No sobra ti panaggastom tapno matuladmo ti gagayyemmo, ti piliem ngarud a gagayyem ket dagidiay di mangipangpangruna iti kuarta ken material a bambanag.
Usarem a nainsiriban dagiti credit cards. Nalakaka a gumatang babaen kadagiti credit cards no dimo pampanunoten dagiti resultana. Kada bulan, ikagumaam a bayadan ti intero nga utangmo iti credit card. Ammuem dagiti interest rates ken babayadam iti credit card. Pagdidiligem dagiti tukon tapno maammuam dagiti kalakaan. Agannadka kadagiti premium card a dakdakkel ti singirda iti inutangmo ken mangitukon kadagiti benepisio a dimo kasapulan. Imbes a credit card ti usarem no gumatangka, agurnongka pay laeng iti kuarta a pagbayadmonto kadagiti daddadakkel ti presiona a tagilako.
Ammuem ti pinansial a kasasaadmo. Nalaklaka ti aggasto iti aglablabes no dimo ammo ti pinansial a kasasaadmo. Kanayon nga ammuem ti intero a pinansial a kasasaadmo. Mangaramidka iti realistiko a binulan a listaan ti badyetmo sigun iti mateggedam a kuarta ken iti napalabas a naggastuam. Irekordmo dagiti nagastom ken idiligmo iti inaramidmo a listaan. Agpatulongka iti mapagtalkan a gayyem tapno maawatam dagiti pinansial a banag a dimo ammo.

Salaknibam ti Annakmo iti Biag a Naipamaysa iti Panaggatang

Dagiti annak ti espesial a puntiria dagiti agipatpatalastas ken natural laeng a kasta. Ad-adu nga amang ti gatgatangen ken gasgastuen ita dagiti agtutubo. Iti United States, tinawen a binilion a doliar ti gasgastuen dagiti tin-edyer.

Ngem sigun iti managsirarak a ni Juliet Schor, dagiti annak a naipamaysa iti panaggatang ket dakdakkel ti posibilidadna a maringgoran, makapasar iti depression, ken saan a nasayaat ti relasionda kadagiti nagannakda. Kasano a masalaknibam dagiti annakmo? Usigem dagiti makatulong a pamay-an nga inkagumaan nga inaramid ti dadduma a nagannak tapno masalaknibanda ti annakda.

ISUROM IDA: “Saanmo nga interamente a masalakniban dagiti annak manipud kadagiti patalastas ta agkaiwara dagita. Isu nga inlawlawagmi iti annakmi nga adda naagum a panggep dagiti agipatpatalastas ket ti kuartada ti kayat dagiti kompania a nangbayad kadagita. Dida pampanunoten ti pagimbaganda.”—James ken Jessica.

DIKA TUMULOK: “Pilitendaka dagiti annakmo a gumatang, ken talaga nga aramidenda ti amin tapno tumulokka. Ngem nasken a dika tumulok. Maamirisdanto met laeng a dida maala ti amin a kayatda. Idi padpadakkelenmi ti anakmi, masansan a pagsaritaanmi kas nagannak no kasano ti agbalin a balanse ken no ania dagiti ipaannurotmi a limitasion.”—Scott ken Kelli.

LIMITARAM TI PANAGBUYADA: “Manmano nga agbuya ti pamiliami iti TV. Saan a paset dayta ti rutinami. Adda dagiti sabali nga aramidenmi imbes nga agbuyakami iti TV. Agkakaduakami nga agluto ken mangan, ken managbasa dagiti babbaritomi.”—John ken Jenniffer.