Ipapatay ti Ay-ayaten iti Biag

Ni Ronaldo a taga-Brazil ket naaksidente iti lugan a nakatayan ti lima a kapamiliana, a pakairamanan da nanang ken tatangna. “Dua a bulankon iti ospital idi naammuak a natayda iti aksidente,” kinunana.

“Idi damo, diak patien nga awandan. Aminda? Kasla nagtupak ti langit kaniak idi naamirisko a pudno dayta. Idi pay la a nariknak ti kasta a saem. Iti simmaganad nga al-aldaw, panagriknak ket awanen serserbi ti biagko no awanda. Inaldaw a nagsangsangitak iti adu a bulan! Pabpabasolek ti bagik ta sabali ti pinagmanehok. No siak la koma ti nagmaneho, siguro sibibiagda pay.

“Sangapulo ket innem a tawenen ti naglabas ken naisublikon ti dati a rutina ti biagko. Ngem kasla adda latta kurang iti biagko gapu iti dayta a nakalkaldaang nga ipapatayda.”

TAPNO MAIBTURAM TI TRAHEDIA

Ipeksam ti ladingitmo. Kuna ti Biblia nga adda “tiempo ti panagsangit.” (Eclesiastes 3:​1, 4) Kuna ni Ronaldo: “No makasangsangitak, isangitko latta. Mabang-arannak pay kalpasanna. Awanto met la ti maitulongna no lapdak dayta.” Siempre, saan nga agpapada ti pamay-antayo nga agladingit. Gapuna, no saanmo man nga ipakita ti ladingitmo, dina kayat a sawen a laplapdam ti emosionmo wenno masapul a pilitem ti agsangit.

Dimo isinsina ti bagim. (Proverbio 18:⁠1) “Uray no kayatko koma nga isina ti bagik diak inaramid dayta,” kuna ni Ronaldo. “No adda bumisita kaniak, pastrekek ida. Ibagbagak met ti riknak ken baketko ken kadagiti nasinged a gagayyemko.”

Agtalinaedka a kalmado uray no makangngegka kadagiti nasakit a sasao. Mabalin a maibagada ti “Nasaysayaat laengen ti kasta.” Malagip ni Ronaldo, “Makapasakit ti dadduma a komento uray no nairanta koma a mangliwliwa kaniak.” Imbes a sangkapanunotmo dagiti makapasakit a sasao, ipangagmo ti nainsiriban a balakad ti Biblia: “Saanmo nga ipaay ta pusom kadagiti amin a sao a sawen dagiti tattao.”​—⁠Eclesiastes 7:⁠21.

Ammuem ti pudno a kasasaad dagiti natay. Kuna ni Ronaldo: “Ipakita ti Biblia iti Eclesiastes 9:5 a saan nga agrigrigat dagiti natay. Timmalna ti panunotko gapu iti dayta. Isursuro met ti Biblia nga addanto panagungar isu nga agbiagto manen dagiti natay. Gapu iti dayta, ibilangko a kasla nagbakasion laeng dagiti natay nga ay-ayatek.”​—⁠Aramid 24:⁠15.

Ammom kadi? Ikarkari ti Biblia nga addanto tiempo a ti Dios “alimonennanto ni patay iti agnanayon.”a​—⁠Isaias 25:⁠8.