Ti Kudil ti Thorny Devil Lizard nga Agagsep iti Danum

AGSEPEN ti Australian thorny devil lizard (Moloch horridus) ti danum iti linnaaw, angin, ken nabasa a darat. Sa iturongna ti danum iti ngiwatna tapno inumenna. Ania ti sekretona? Mabalin nga adda iti nakaskasdaaw a kudilna.

Usigem: Nakalupkopan ti kudil ti thorny devil kadagiti siksik. Ibagbaga ti dadduma a sientista a ti naurnong a danum kadagiti siksik ket mapan iti nakersang a makinruar a paset ti kudilna sa sumrek kadagiti medio nakalukat a kasla kanal iti nagbaetan dagiti siksik. Agkokonektar dagita ken agturongda kadagiti igid ti ngiwat ti thorny devil.

Ngem kasano nga ipangato ti thorny devil ti danum kadagiti sakana, sa iti intero a bagina, agingga a mapan iti ngiwatna a di maapektaran ti grabidad? Ken kasano a makaagsep iti danum no iradradna ti tianna iti nabasa a darat?

Agparang a nadiskobren dagiti researcher ti sekreto ti thorny devil. Dagiti kasla kanal iti makinruar a paset ti kudil ti thorny devil ket naisilpo kadagiti agkokonektar a kasla kanal iti makin-uneg a paset ti kudilna babaen kadagiti arig tubo a pagayusan. Gapu iti dayta, mapaspasamak ti capillary action—ti panagpangato ti danum kadagiti nailet nga espasio uray pay maikontra iti grabidad. Ngarud, kasla espongha ti panagagsep ti kudil ti thorny devil.

Kuna ni Janine Benyus, a presidente ti Biomimicry Institute, a no tuladen dagiti inheniero ti kudil ti thorny devil nga agagsep iti danum, mabalin a makadisenioda iti teknik a makaikkat iti danum iti angin (humidity) nga usarenda tapno makaaramidda iti mas epektibo ken nain-inut a pangpalamiis kadagiti patakder. Ken makaala pay no kua iti danum a mainum.

Ania ti makunam? Resulta kadi ti ebolusion ti kudil ti thorny devil lizard nga agagsep iti danum? Wenno adda nangdisenio iti dayta?