Ti Pagkapet ti Tahong

KAS kadagiti barnacle, kumpet dagiti tahong iti batbato, kayo, ken bakrang ti barko. Ngem saan a kas kadagiti barnacle a permi a dumket, nakabitin laeng dagiti tahong babaen iti kasla sangareppet a naingpis a sinulid a maawagan iti byssus thread. Makatulong daytoy tapno nalaklaka a mangan ken umakar dagiti tahong. Ngem no kitkitaen, kasla nalaka la dagita a pugsaten ti ablat dagiti dalluyon ti baybay. Ania ti sekreto ti byssus ta matengngelna ti tahong ket saan a mayanud iti baybay?

Usigem: Nakidser ti maysa a murdong dagiti byssus thread ngem nalukneng ken mabennat ti sabali a murdongda. Natakuatan dagiti researcher a ti eksakto a ratio nga us-usaren ti tahong—80% ti nakidser ken 20% ti nalukneng a paset—ket nakapatpateg tapno makakapet a naimbag. Isu a maanduran ti byssus ti napigsa a puersa ti guyod ken duron ti dalluyon.

Awagan ni Propesor Guy Genin dagiti resulta daytoy a panagadal a “nakaskasdaaw,” sa innayonna: “Ti makapabilib iti daytoy nga organismo ket adda iti nakasaysayaat a pannakaaramid ti kombinasion ti nalap-it ken nakidser a pasetna.” Patien dagiti sientista nga adu ti mabalin a pakausaran ti disenio dagiti byssus thread kas iti panangikapet iti alikamen kadagiti patakder ken iti lugan iti uneg ti danum, panangikapet kadagiti pennet kadagiti tulang, ken panangdait iti sugat iti operasion. “Napno ti nakaparsuaan iti di mabilang a pagsidsiddaawan a pakasursuruantayo, kas kadagiti pamay-an ti panagikapet,” kuna ni J. Herbert Waite, maysa a propesor ti University of California idiay Santa Barbara, U.S.A.

Ania ti makunam? Resulta kadi ti ebolusion ti byssus ti tahong? Wenno adda nangdisenio iti dayta?