No Simminan Dagiti Annakyo

TI PROBLEMA

Kaaduanna a maipasango dagiti agassawa kadagiti karirigatan a problema iti relasionda no awanen dagiti annakda iti poderda. Mabalin a mariknada a kasla estrangherodan iti maysa ken maysa. Insurat ti family expert a ni M. Gary Neuman: “Adu kadagiti balbalakadak ti saan a makaammo no kasano nga isubli ti dati a relasionda iti asawada. Ita ta awanen dagiti annakda iti poderda, manmanon ti mabalinda a pagsaritaan wenno aramiden nga agkadua.”a

Kastakayo kadi nga agassawa? No wen, mapasayaatyo pay ti relasionyo. Ngem kitaem nga umuna dagiti posible a makagapu nga immadayo ti riknayo iti maysa ken maysa.

DAGITI MAKAGAPU

Adu a tawen a dagiti annak ti prioridad. Nasayaat met ti motibo ti adu a nagannak isu nga iyun-unada ti kasapulan ti annakda ngem iti kasapulanda kas agassawa. Kas resultana, nairuamda unayen iti akemda kas nagannak nga uray la nabaybay-andan ti papelda kas asawa. Dagus a madlaw dayta inton suminan dagiti annak. Kuna ti 59 anyos nga asawa: “Idi adda pay dagiti annakmi, adda rason a makapagkaduakami nga agassawa.” Ngem idi simminan dagiti annakda, inaminna, “agduman ti prioridadmi.” Naibagana pay idin ken lakayna, “Agdumata itan iti lubong.”

Saan a nakasagana ti dadduma iti daytoy baro a biagda. Kuna ti libro nga Empty Nesting: “Marikna ti adu nga agassawa a kasla mangrugrugida manen.” Gapu ta marikna ti adu nga agassawa a kasla bassit ti pagpadaanda, agsublida kadagiti indibidual a prioridadda, a kasla agkakuartoda laengen imbes nga agassawa.

Ngem nagsayaat ta posible a malisianyo dayta a problema, ket masagrapyo pay ketdi dagiti pagimbagan daytoy baro a panid ti biagyo. Matulongannakayo ti Biblia. Kitaentayo no kasano.

TI MABALINMO NGA ARAMIDEN

Akseptarenyo dayta a panagbalbaliw. Kuna ti Biblia maipapan iti adulton nga anak: “Ti maysa a lalaki panawannanto ti amana ken ti inana.” (Genesis 2:24) Kas nagannak, ti misionyo ket isagana dagiti annakyo para iti dayta nga aldaw ken tulongan ida a maaddaan kadagiti abilidad a kasapulandanto kas adulto. No kasta ti panunotenyo, mabigbigyo a ti ipapanaw ti annakyo ket maysa a banag a maipagpannakkelyo.​—Prinsipio ti Biblia: Marcos 10:7.

Siempre, dakayo latta ti nagannakda. Ngem ita, agbalinkayon a parabalakadda imbes a superbisorda. Makatulong daytoy tapno nadekket latta ti relasionyo iti annakyo ken mas maikkanyo iti atension ti asawayo.b​—Prinsipio ti Biblia: Mateo 19:6.

Iyebkasmo dagiti pakadanagam. Ibagam iti asawam no ania ti epektona kenka daytoy a panagbalbaliw, ken nakasaganaka met koma a dumngeg iti rikriknana. Naanus ken mannakaawatka koma. Kasapulan man ti panawen ken panagporsegi tapno mapatibkeryo ti relasionyo kas agassawa, sulit met dayta.​—Prinsipio ti Biblia: 1 Corinto 13:4.

Mangkita kadagiti banag nga aramidenyo a dua. Pagsaritaanyo dagiti bambanag a kayatyo a pagtinnulongan a gaw-aten wenno baro a banag a kayatyo a padasen kas agassawa. Nakapadakkelkayon iti annak isu nga adun ti kapadasanyo. Mausaryo dagita a tumulong iti sabsabali.​—Prinsipio ti Biblia: Job 12:12.

Pabaraenyo manen ti ayatyo. Panunotenyo dagiti ugali a nagustuanyo iti maysa ken maysa. Lagipenyo dagiti panagkadkaduayo ken dagiti arig-bagyo a problema a nalasatanyo. Makitayonto nga adda pagsayaatan daytoy a panagbalbaliw iti biagyo. Kinaagpaysuanna, adda itan gundawayyo nga agtinnulong a mangpasayaat iti kalidad ti panagassawayo ken mangpabara manen iti ayat a nangreppet kadakayo idi damo.