Ti Pakasaritaan da Ricardo ken Andres

Nakaskasdaaw ti pannakabalin ti edukasion a naibatay iti Biblia a mangpasayaat iti biag. Kitaem ti dua a pagarigan: da Ricardo ken Andres.

RICARDO: Idi agtawenak iti 15, nalakaak a maimpluensiaan isu a nakimiembroak iti gang. Dakkel ti impluensia kaniak dagiti kabbaro a gagayyemko. Kinapudnona, inarapaapko ti maibalud iti 10 a tawen! Mabalin a nakakatkatawa ngem iti lugarmi, maidaydayaw ken mararaem dagiti napadasandan ti naibalud. Kayatko ti agbalin a kas kadakuada.

Napadasak ti amin nga adda pakainaiganna iti gang, agraman ti droga, seks, ken kinaranggas. Maysa a rabii, nairamanak iti engkuentro. Impagarupko no matayak ngem nakalibasak a di naan-ano. Kalpasanna, pinampanunotko ti biagko ken dagiti kayatko pay nga aramiden, isu nga inkeddengko ti agbalbaliw. Ngem kasano? Pagpatulongak?

Naliday ti kaaduan a kabagiak. Problemadoda ngem naiduma ti pamilia ti maysa nga angkelko. Ammok a nasasayaatda ken sursurotenda dagiti prinsipio ti Biblia. Naammuak idin kadakuada a ti nagan ti Dios ket Jehova. Isu a di nagbayag kalpasan ti engkuentro, nagkararagak ken Jehova. Inawagak iti naganna ken nagpatulongak. Nasdaawak ta kabigatanna, adda Saksi ni Jehova a nagtuktok! Inyadalannak iti Biblia.

Ngem adda dakkel a problemak. Agkaraawag dagiti dati a gagayyemko. Aw-awisendak a makikadua kadakuada. Uray narigat, saanak a simmurot. Determinadoak a mangitultuloy iti panagadalko iti Biblia. Imbag ta inaramidko dayta! Nagdakkel ti simmayaatan ti biagko ken nagbalinak a pudpudno a naragsak.

Inkararagko idi iti Dios a kayatko ti maibalud iti 10 a tawen tapno agbalinak a mararaem a miembro ti gang. Ngem sabalin ti inkararagko. Kiniddawko a palubosannak nga agserbi kenkuana iti uray 10 a tawen laeng kas full-time a manangaskasaba tapno matulongak ti sabsabali a kas iti napasamak kaniak. Sinungbatan ti Dios ti kararagko ta 17 a tawenen nga agserserbiak kas full-time a manangaskasaba! Ken kayatko nga ibaga a saanak a pulos a naibalud.

Ngem adu kadagiti dati a gayyemko ti nabayagen a balud. Natayen ti dadduma. No lagipek ti napalabas, agyamanak unay kadagiti kabagiak a Saksi. Kayatda ti agpaiwanwan iti Biblia ken agbiag a naiduma. Isuda ti ad-adda a rinaemko ngem iti asinoman a miembro ti gang. Kangrunaanna, agyamanak iti Dios ta insurona ti kasayaatan a panagbiag.

ANDRES: Nayanak ken napadakkelak iti napanglaw a komunidad a gagangay ti panagdroga, panagkikil, panangpapatay, ken prostitusion. Mammartek ni Tatang ken adikto iti cocaine. Kanayonda nga agapa ken agkinnabil ken ni Nanang.

Ubingak pay idi rinugiak ti aginum ken agdroga. Kanayon nga addaak iti kalsada tapno agtakaw ken ilakok dagiti tinakawko. Idi dumakdakkelakon, pinadas ni Tatang nga umasideg ti riknak kenkuana ngem di umiso ti namay-anna. Sinuruannak nga agipuslit ken aglako iti droga ken dadduma pay a kontrabando. Alisto nga immadu ti kuartak. Pagammuan ta maysa nga aldaw, immay dagiti polis idiay balay. Inarestodak ken nasentensiaanak a maibalud iti lima a tawen gapu iti gandat a panangpapatay.

Maysa a bigat, inyanunsio ti pagbaludan a maawis dagiti balud a makipagadal iti Biblia kadagiti Saksi ni Jehova, isu a napanak. Umiso dagiti nangngegko ket nagpayadalak iti Biblia kadagiti Saksi. Naturedda a nangibaga iti kinapudno iti Biblia ken insuroda kaniak dagiti nangato a moral a pagalagadan ti Dios.

Di nagbayag, naamirisko a diak makapagbalbaliw a sisiak, nangruna ta adda dagiti padak a balud a dida kayat ti ar-aramidek ket pangpangtaandak. Isu nga inkararagko ken Jehova nga ikkannak iti bileg ken sirib ket tinulongannak. Timmuredak pay ketdi a nakisarita iti dadduma a balud maipapan iti Biblia.

Idi mawayawayaanakon, napalalo ti nerbiosko! Kaykayatko payen ti agbayag iti pagbaludan. Idi pumanawakon, adu a balud ti nagpayapay. Adda pay ketdi dagiti nangibaga, “Goodbye, pastor.”

Uray la sumgar ti dutdotko no panunotek ti nagbanagan koma ti biagko no saanak a nagpaisuro iti Dios. Agyamyamanak unay ta ay-ayatennak ti Dios ken imbilangna nga adda latta serbik.a