Emosion

PUNGTOT

PRINSIPIO TI BIBLIA: “Nasaysayaat ti tao a nabannayat nga agpungtot ngem ti nabileg a lalaki.”​—Proverbio 16:32.

TI KAIPAPANANNA: Pagsayaatantayo no makontroltayo ti emosiontayo. Uray no adda tiempo a nainkalintegan ti panagungettayo, makadangran ti di makontrol a panagpungtot. Kuna dagiti researcher a dagiti tattao nga agpungpungtot, mabalin a makaibaga wenno makaaramidda kadagiti pagbabawyandanto.

TI MABALINMO NGA ARAMIDEN: Sursuruem a kontrolen ti pungtotmo. Para iti dadduma, ti di makontrol a pungtot ket pagilasinan ti kinapigsa ngem masiribtayo no bigbigentayo a dayta ket talaga a pagilasinan ti kinakapuy. Kuna ti Biblia: “Ti tao a saan a makakontrol iti pungtotna, ket kas iti siudad a naserrek, nga awanan iti pader.” (Proverbio 25:28) Ti maysa a praktikal a pamay-an tapno makontrolmo ti pungtotmo ket ammuem nga umuna ti napasamak sakbay nga agungetka. “Ti pannakatarus ti tao ti mangpabannayat iti pungtotna.” (Proverbio 19:11) Pagsayaatantayo no ammuentayo ti intero a pasamak tapno malawlawagan ti isiptayo ken agkalmatayo.

KINAMANAGYAMAN

PRINSIPIO TI BIBLIA: “Ipakitayo a managyamankayo.”​—Colosas 3:15.

TI KAIPAPANANNA: Kuna ti kaaduan a daydiay laeng managyaman ti agbalin a naragsak. Paneknekan met laeng dayta uray dagidiay natayan wenno napukawan kadagiti importante a banag. Imbagada a ti kangrunaan a nakatulong iti panangiliwliwagda ket ti panagpokusda kadagiti banag a pagyamyamananda saan a kadagiti napukawda.

TI MABALINMO NGA ARAMIDEN: Inaldaw nga isuratmo dagiti banag a pagyamyamanam. Saan a kasapulan a naidumduma dagita. Panunotem uray dagiti simple a banag, kas iti napintas nga ilelennek ti init, naragsak a pannakisarita iti ay-ayatem, wenno uray ti maysa nga aldaw a nainayon manen iti biagmo. Nagdakkel ti maitulong dagita iti emosionmo​—no la ket ta iwayaam a kitaen ken apresiaren dagita.

Makatulong unay no panunotem no apay nga agyamanka iti pamiliam ken gagayyemmo. No adda dagiti banag nga apresiarem iti dadduma, ibagam dayta kadakuada, iti man personal wenno surat, e-mail, wenno teks. Mabalin a tumibker ti relasionyo ken mariknam ti kinaragsak ti panangted.​—Aramid 20:35.

DADDUMA PAY A PRINSIPIO TI BIBLIA

ADAYWAM DAGITI RIRI.

“Ti panangirugi iti riri ket kas iti panangilukat iti ruangan ti danum; sakbay a bumara dayta, pumanawkan.”​—PROVERBIO 17:14.

SAANMO A PAGDANAGAN TI MASANGUANAN.

“Diyo pakadanagan ti problema iti sumaganad nga aldaw, ta adda bukod a problema ti tunggal aldaw. Ti laeng problema ita nga aldaw ti panunotenyo.”​—MATEO 6:34.

PANUNOTEM A NAIMBAG TI NAPASAMAK IMBES NGA AGUNGETKA A DAGUS MAIBATAY ITI AGDAMA A RIKNAM.

“Bantayannakanto ti abilidad nga agpanunot, ken salaknibannakanto ti pannakatarus.”​—PROVERBIO 2:11.