NADALUS A DANUM

Ti Mangrugrugit iti Nadalus a Danum

Kaaduan a porsiento ti planetatayo ket danum. Ngem kuna ti World Meteorological Organization a “0.5% laengen ti danum ditoy Daga ti nadalus ken mabalin nga usaren.” Uray no bassit laeng a porsiento daytoy a danum, umanay koman nga usaren ti amin a sibibiag a parsua ditoy daga. Ngem marugrugitanen wenno rumigrigaten ti makaala iti nadalus a danum gapu ta umad-adu ti agus-usar ken gapu iti climate change. Ibagbaga dagiti eksperto nga iti uneg ti 30 a tawen, lima a bilion a tattao ti saanen a makaala iti umdas a nadalus a danum.

Ti Planetatayo—Nadisenio a Saan a Madadael

Adda dagiti natural a proseso ti daga a mangpreserba iti danum. Makatulong met ti daga, dagiti parsua iti danum, ken ti lawag ti init a mangdalus iti danum. Kitaem ti dadduma nga ebidensia a mangipakita a saan a madadael ti planetatayo.

• Napaneknekanen a kaya ti daga nga ikkaten ti adu a bambanag a mangrugrugit iti danum. Kadagiti kadandanuman, adda dagiti mula a pagaammo a mangikkat iti nitrogen, phosphorus, ken pesticide.

• Nakita dagiti sientista nga adda dagiti pisikal ken biolohikal a proseso a mangdalus iti kontaminado a danum. No mailaok ti rugit iti agay-ayus a danum, kanen dayta dagiti bakteria.

• Kabaelan dagiti kappo ken tahong a sagaten dagiti makadangran a kemikal iti danum iti sumagmamano laeng nga aldaw—ken mabalin a nasaysayaat pay dagita ngem kadagiti planta a mangdalus iti narugit a danum.

• Agtalinaed ti danum iti planetatayo babaen ti water cycle. Gapu iti water cycle ken ti dadduma pay a natural a proseso, agtalinaed ti danum iti atmosperatayo wenno saan nga agawaaw dayta.

Ti Solusion ti Tao

Ipalpalagip dagiti eksperto a saantayo koma a saysayangen ti danum. Tapno saan a makontaminaran ti danum, irekrekomendada a tarimaanentayo ti lugantayo tapno saan nga agtedted ti langis ken saantayo nga agi-flush kadagiti agas iti inidoro wenno mangibukbok kadagiti makadangran a kemikal kadagiti pagayusan ti danum.

Nakabirok dagiti engineer kadagiti moderno a pamay-an ti desalination (panangikkat iti asin manipud iti danum-apgad). Iti kasta, umadu ti suplay ti danum a mabalin nga inumen.

Ngem saan pay nga umdas dayta. Agparang a saan a nasayaat a solusion ti desalination gapu ta nagdakkel ti magastos ken adu unay nga enerhia ti mausar. Iti report idi 2021 maipapan iti panangprotektar iti suplay ti danum a mainum, kuna ti United Nations: “Iti intero a lubong, masapul a doblienda ti panagreggetda.”

Namnama Manipud iti Biblia

“Ti Dios . . . ipangatona dagiti tedted ti danum; maurnong dagiti angepna sa agbalin a tudo; kalpasanna, ibuyat dayta dagiti ulep; agtinnagda a kas arbis kadagiti tattao.”—Job 36:​26-28.

Inaramid ti Dios dagiti natural a siklo tapno maprotektaran dagiti danum ti daga.—Eclesiastes 1:7.

Panunotem: Gapu ta nangaramid ti Namarsua kadagiti natural a proseso a mangdalus iti danum, kabaelanna kadi ken kayatna a solusionan dagiti problema nga inaramid ti tao? Kitaem ti artikulo nga “Ikarkari ti Dios a Saan a Madadael ti Planetatayo,” iti panid 15.